డయాబెటిస్ ఉన్నవారు పచ్చి కొబ్బరి తినవచ్చా?..తింటే ఏం జరుగుతుంది..?

Can people with diabetes eat raw coconut? What happens if you eat it?

. పచ్చి కొబ్బరి పోషక విలువలు

. డయాబెటిస్‌పై పచ్చి కొబ్బరి ప్రభావం

. ఎంత మోతాదులో తీసుకోవాలి? జాగ్రత్తలు

Coconut: మన దైనందిన ఆహారంలో పచ్చి కొబ్బరికి ప్రత్యేక స్థానం ఉంది. నేరుగా తినడమే కాకుండా కూరలు, చట్నీలు, స్వీట్లు వంటి అనేక వంటకాల్లో పచ్చి కొబ్బరిని వినియోగిస్తుంటాం. సహజమైన తియ్యదనం ప్రత్యేకమైన రుచి కారణంగా ఇది చాలా మందికి ఇష్టమైన ఆహారం. రుచితో పాటు ఆరోగ్య పరంగానూ పచ్చి కొబ్బరి అనేక లాభాలను అందిస్తుంది. ఇందులో ఫైబర్ ఆరోగ్యకరమైన కొవ్వులు, విటమిన్లు, ఖనిజాలు, యాంటీ ఆక్సిడెంట్లు సమృద్ధిగా ఉంటాయి. అయితే డయాబెటిస్ ఉన్నవారు పచ్చి కొబ్బరి తీసుకోవాలా? వద్దా? అనే సందేహం చాలామందికి ఉంటుంది. ఈ విషయంపై పోషకాహార నిపుణులు ఏం చెబుతున్నారో ఇప్పుడు తెలుసుకుందాం.

పచ్చి కొబ్బరి తక్కువ గ్లైసెమిక్ ఇండెక్స్ కలిగిన ఆహారం. అంటే ఇది తిన్న వెంటనే రక్తంలో చక్కెర స్థాయిలు వేగంగా పెరగవు. ముఖ్యంగా ఇందులో ఉండే ఫైబర్ జీర్ణక్రియను నెమ్మదింపజేస్తుంది. దీంతో గ్లూకోజ్ రక్తంలోకి మెల్లగా విడుదలవుతుంది. ఇది డయాబెటిస్ ఉన్నవారికి చాలా ఉపయోగకరం. అంతేకాకుండా పచ్చి కొబ్బరిలో ఉండే ఆరోగ్యకరమైన కొవ్వులు శరీరానికి అవసరమైన శక్తిని అందిస్తాయి. మాంగనీస్, రాగి, ఐరన్ వంటి ఖనిజాలు జీవక్రియను మెరుగుపరచడంలో సహాయపడతాయి. ఎముకల బలాన్ని పెంచడంతో పాటు రోగనిరోధక శక్తిని కూడా పెంచుతాయి.

డయాబెటిస్‌తో బాధపడే వారు పరిమిత మోతాదులో పచ్చి కొబ్బరి తీసుకుంటే ఇన్సులిన్ సెన్సిటివిటీ మెరుగుపడే అవకాశం ఉందని నిపుణులు చెబుతున్నారు. దీని వల్ల శరీరం ఇన్సులిన్‌ను సమర్థవంతంగా ఉపయోగించుకోగలుగుతుంది. ఫలితంగా రక్తంలో చక్కెర స్థాయిల్లో వచ్చే అకస్మాత్తు మార్పులు తగ్గుతాయి.
పచ్చి కొబ్బరి తిన్నప్పుడు ఎక్కువసేపు కడుపు నిండిన భావన కలుగుతుంది. దీంతో అవసరం లేని ఆహారం తీసుకోవడం తగ్గుతుంది. శరీర బరువు అదుపులో ఉంటుంది. బరువు నియంత్రణలో ఉండటం వల్ల టైప్-2 డయాబెటిస్‌ను కూడా మెరుగ్గా నియంత్రించవచ్చు.

పచ్చి కొబ్బరి ఆరోగ్యకరమైనదే అయినప్పటికీ డయాబెటిస్ ఉన్నవారు మితంగా తీసుకోవాలని వైద్యులు సూచిస్తున్నారు. రోజుకు సుమారు 30 నుంచి 40 గ్రాముల పచ్చి కొబ్బరి సరిపోతుంది. దీన్ని అధికంగా తీసుకుంటే అందులోని సాచురేటెడ్ ఫ్యాట్స్ కారణంగా గుండె సంబంధిత సమస్యలు వచ్చే ప్రమాదం ఉంది. కొంతమంది పచ్చి కొబ్బరిని చక్కెర కలిపి తినడానికి ఇష్టపడతారు. అయితే డయాబెటిస్ ఉన్నవారు ఈ అలవాటు తప్పక మానుకోవాలి. చక్కెర కలిపితే క్యాలరీలు పెరగడమే కాకుండా రక్తంలో చక్కెర స్థాయిలు కూడా ఒక్కసారిగా పెరుగుతాయి. సరైన మోతాదులో తీసుకుంటే పచ్చి కొబ్బరి డయాబెటిస్ బాధితులకు ఆరోగ్యకరమైన ఎంపికగా ఉపయోగపడుతుందని పోషకాహార నిపుణులు స్పష్టం చేస్తున్నారు.

Follow us