Virat Kohli: ఇంగ్లండ్ టెస్టు సిరీస్‌కు ముందు టీమిండియాకు బిగ్ షాక్‌.. విరాట్ కోహ్లీ కూడా రిటైర్మెంట్?
2011లో టెస్ట్ క్రికెట్‌లో అరంగేట్రం చేసిన కోహ్లీ గత దశాబ్దంలో భారత రెడ్ బాల్ క్రికెట్‌లో అత్యుత్తమ ఆటగాడిగా నిలిచాడు. ఈ సమయంలో అతను దూకుడైన కెప్టెన్సీ, అద్భుతమైన బ్యాటింగ్‌తో భారత్‌ను ఇంటా, విదేశాల్లోనూ ప్రపంచంలోనే ఉత్తమ జట్టుగా తీర్చిదిద్దాడు.
- By Gopichand Published Date - 03:07 PM, Sat - 10 May 25
Virat Kohli: భారత క్రికెట్ దిగ్గజ బ్యాట్స్‌మన్ విరాట్ కోహ్లీ (Virat Kohli) టీ-20 ఇంటర్నేషనల్ తర్వాత ఇప్పుడు టెస్ట్ క్రికెట్ నుంచి కూడా రిటైర్మెంట్ తీసుకోవాలని నిర్ణయించుకున్నట్లు తెలుస్తోంది. ఈ విషయాన్ని అతను బీసీసీఐకి కూడా తెలియజేసినట్లు సమాచారం. అతని ఈ నిర్ణయం క్రికెట్ ప్రపంచంలో కలకలం రేపింది. ఈ నిర్ణయంపై బీసీసీఐ అధికారి ఒకరు స్పందిస్తూ కోహ్లీ నిజంగా రిటైర్మెంట్ తీసుకోబోతున్నాడా లేదా అనే విషయాన్ని స్పష్టం చేశారు.
రిపోర్ట్ ప్రకారం.. ఆ అధికారి వెల్లడించిన వివరాల ప్రకారం బోర్డు కోహ్లీని తుది నిర్ణయం తీసుకునే ముందు కొంత సమయం తీసుకోవాలని కోరింది. పేరు వెల్లడించకూడదనే షరతుపై ఆయన మాట్లాడుతూ ‘అతను ఇప్పటికీ అద్భుతమైన ఫిట్‌నెస్‌లో ఉన్నాడు. రన్స్ కోసం ఆకలితో ఉన్నాడు. డ్రెస్సింగ్ రూమ్‌లో అతని ఉనికి జట్టు మొత్తాన్ని ఉత్సాహపరుస్తుంది’ అని అన్నారు.
టెస్టుల్లో విరాట్ పేరిట 30 సెంచరీలు
2011లో టెస్ట్ క్రికెట్‌లో అరంగేట్రం చేసిన కోహ్లీ గత దశాబ్దంలో భారత రెడ్ బాల్ క్రికెట్‌లో అత్యుత్తమ ఆటగాడిగా నిలిచాడు. ఈ సమయంలో అతను దూకుడైన కెప్టెన్సీ, అద్భుతమైన బ్యాటింగ్‌తో భారత్‌ను ఇంటా, విదేశాల్లోనూ ప్రపంచంలోనే ఉత్తమ జట్టుగా తీర్చిదిద్దాడు. క్రికెట్ అతిపెద్ద ఫార్మాట్‌లో అతని పేరిట 9,000కి పైగా రన్స్, 30 సెంచరీలు ఉన్నాయి.
Also Read: Pak Nuclear Bombs: అణుబాంబుల విభాగంతో పాక్ ప్రధాని భేటీ.. ఎందుకు ?
భారత్‌కు పెద్ద దెబ్బ
దిగ్గజ కెప్టెన్ రోహిత్ శర్మ రిటైర్మెంట్ తీసుకున్న తర్వాత కోహ్లీ కూడా రిటైర్మెంట్ నిర్ణయం తీసుకుంటే అది భారత్‌కు పెద్ద దెబ్బగా పరిగణించబడుతుంది. ఎందుకంటే ఈ ఇద్దరు సీనియర్ ఆటగాళ్లు లేని సమయంలో తక్కువ అనుభవం ఉన్న జట్టు ఇంగ్లండ్‌కు వెళ్తుంది. అక్కడ కేఎల్ రాహుల్, రిషభ్ పంత్ అత్యంత అనుభవజ్ఞులైన బ్యాట్స్‌మెన్‌లుగా ఉంటారు.
ఫామ్‌తో సతమతమవుతున్న కోహ్లీ
విరాట్ కోహ్లీ ప్రస్తుతం టెస్ట్ క్రికెట్‌లో చెడు దశను ఎదుర్కొంటున్నాడు. ఆస్ట్రేలియాతో జరిగిన బోర్డర్-గవాస్కర్ ట్రోఫీలో పెర్త్‌లో జరిగిన తొలి టెస్టులో అతను సెంచరీ సాధించాడు. అయితే ఆ తర్వాత అతని ఫామ్ పడిపోయింది. అతని బ్యాట్ రన్స్ చేయడం మరచిపోయింది. గత ఐదేళ్లలో విరాట్ కేవలం 1,990 రన్స్ మాత్రమే చేశాడు. ఇందులో మూడు సెంచరీలు ఉన్నాయి. మొత్తంగా అతను భారత్ తరపున 123 టెస్టులు ఆడి, 46.85 సగటుతో 9,230 రన్స్ సాధించాడు.
