అహ్మదాబాద్‌లో అడుగుపెట్టిన సూర్య‌ సేన

Team India players reach Ahmedabad

India vs New Zealand  టీ20 వరల్డ్ కప్ 2026 ఫైనల్‌కు ముందు భారత జట్టు అహ్మదాబాద్‌కు చేరుకుంది. ముంబైలో ఇంగ్లండ్‌పై ఉత్కంఠభరితమైన సెమీఫైనల్‌లో 7 పరుగుల తేడాతో గెలిచిన భారత జట్టు ఆదివారం సాయంత్రం అహ్మదాబాద్ విమానాశ్రయానికి చేరుకుంది. మార్చి 8న నరేంద్ర మోదీ స్టేడియంలో న్యూజిలాండ్‌తో ఫైనల్ మ్యాచ్ జరగనుంది. ఈ మ్యాచ్ గెలిస్తే టీ20 వరల్డ్ కప్ చరిత్రలో వరుసగా రెండు టైటిళ్లు గెలిచిన తొలి జట్టుగా భారత్ నిలుస్తుంది. అంతేకాదు స్వదేశంలో టీ20 వరల్డ్ కప్ గెలిచిన మొదటి జట్టుగా కూడా కొత్త రికార్డు సృష్టించే అవకాశముంది.

• మార్చి 8న టీ20 వరల్డ్‌కప్ ఫైనల్
• ఫైనల్ పోరులో న్యూజిలాండ్‌తో తలపడనున్న భారత్
• గెలుపే లక్ష్యంగా అహ్మదాబాద్‌లో టీమిండియా

టీ20 వరల్డ్ కప్ 2026 ఫైనల్‌కు ముందు భారత జట్టు అహ్మదాబాద్ చేరుకుంది. సెమీఫైనల్స్ అనంతరం ముంబై నుంచి బయలుదేరిన టీమిండియా అహ్మదాబాద్ విమానాశ్రయానికి చేరింది. సెమీఫైనల్‌లో ఇంగ్లండ్‌పై ఉత్కంఠభరితంగా 7 పరుగుల తేడాతో విజయం సాధించిన తర్వాత భారత జట్టు ఇప్పుడు మార్చి 8న జరిగే ఫైనల్ పోరుకు సిద్ధమవుతోంది.

ముంబైలోని వాంఖడే స్టేడియంలో జరిగిన సెమీఫైనల్ మ్యాచ్‌లో భారత్ అద్భుత ప్రదర్శనతో ఫైనల్‌కు చేరుకుంది. ఆ మ్యాచ్ అనంతరం జట్టు ప్రత్యేక విమానంలో అహ్మదాబాద్‌కు ప్రయాణించింది. విమానాశ్రయానికి చేరుకున్న తర్వాత ఆటగాళ్లు తమ తమ వాహనాల్లో టీమ్ హోటల్‌కు వెళ్లారు. స్టార్ ఆల్‌రౌండర్ అక్షర్ పటేల్, పేస్ బౌలర్ జస్ప్రీత్ బుమ్రా వేర్వేరు కార్లలో బయలుదేరగా, జట్టు ప్రధాన కోచ్ గౌతమ్ గంభీర్, కెప్టెన్ సూర్యకుమార్ యాదవ్‌తో పాటు మిగతా ఆటగాళ్లు జట్టు బస చేస్తున్న హోటల్‌కు చేరుకున్నారు.

ఇప్పుడు భారత జట్టు ముందు ఉన్న అవకాశాలు చరిత్రాత్మకంగా నిలిచేలా ఉన్నాయి. గత ఎడిషన్‌లో టీ20 వరల్డ్ కప్ గెలిచిన భారత్ ఈసారి కూడా టైటిల్‌ను గెలిస్తే వరుసగా రెండు సార్లు టీ20 వరల్డ్ కప్ గెలిచిన తొలి జట్టుగా చరిత్ర సృష్టిస్తుంది. ఇప్పటివరకు ఏ జట్టూ ఈ ఘనత సాధించలేదు.

ఇప్పటికే వరుసగా రెండు టీ20 వరల్డ్ కప్ ఫైనల్స్‌కు చేరిన తొలి జట్టుగా భారత్ రికార్డు సృష్టించింది. అయితే ఫైనల్‌లో విజయం సాధిస్తే ఆ ఘనత మరింత ప్రత్యేకంగా మారనుంది. ఇంకా ఒక ప్రత్యేక రికార్డు కూడా భారత్‌కు అందుబాటులో ఉంది.

ఇప్పటివరకు ఏ దేశం కూడా స్వదేశంలో టీ20 వరల్డ్ కప్ టైటిల్‌ను గెలవలేదు. ఈసారి ఫైనల్ మ్యాచ్ ప్రపంచంలోనే అతిపెద్ద క్రికెట్ స్టేడియంగా పేరొందిన నరేంద్రమోదీ క్రికెట్ స్టేడియంలో జరగనుండటంతో, స్వదేశ అభిమానుల ముందే చరిత్రను తిరగరాసే అవకాశం భారత్‌కు దక్కింది. ఈ స్టేడియంలో సుమారు 1.30 లక్షలకుపైగా ప్రేక్షకులు మ్యాచ్‌ను ప్రత్యక్షంగా వీక్షించే సామర్థ్యం ఉంది. ఫైనల్ మ్యాచ్ కోసం స్టేడియం పూర్తిగా అభిమానులతో నిండిపోతుందని అంచనా వేస్తున్నారు.

అయితే ప్రత్యర్థి జట్టు న్యూజిలాండ్‌ను తేలికగా తీసుకునే పరిస్థితి లేదు. నాకౌట్ మ్యాచ్‌ల్లో అంచనాలకు మించి ప్రదర్శన చేయడంలో కివీస్‌కు ప్రత్యేక గుర్తింపు ఉంది. అందుకే ఈ ఫైనల్ పోరు మరింత ఉత్కంఠభరితంగా మారే అవకాశముంది. అయినా భారత్‌కు అనుకూలంగా అనేక అంశాలు కనిపిస్తున్నాయి. స్వదేశ మైదానం, అభిమానుల మద్దతు, మంచి ఫామ్‌లో ఉన్న ఆటగాళ్లు ఇవన్నీ కలిసి భారత జట్టుకు బలంగా నిలుస్తున్నాయి.

Follow us