ఈ ఎన్నికలో నాకు , స్టాలిన్‌కు మధ్య యుద్ధమే : విజయ్

This election is a battle between me and Stalin: Vijay

Vijay : తమిళనాడు రాజకీయాలు మళ్లీ వేడెక్కుతున్నాయి. ఎంకే స్టాలిన్ పై విజయ్ మరోసారి తీవ్ర స్థాయిలో విమర్శలు గుప్పించారు. రాబోయే అసెంబ్లీ ఎన్నికలు ఢిల్లీ రాజకీయాలకు సంబంధించినవి కావని అవి పూర్తిగా రాష్ట్రంలోని అవినీతి, పాలన, ప్రజా సమస్యలపై జరుగుతున్న పోరాటమని స్పష్టం చేశారు. ఈ ఎన్నికలు ప్రత్యక్షంగా తనకు, స్టాలిన్‌కు మధ్య జరిగే సమరం అని సంచలన వ్యాఖ్యలు చేశారు. వెల్లూరు జిల్లా కొల్లమంగళంలో జరిగిన పార్టీ అంతర్గత సమావేశంలో మాట్లాడుతూ ఆయన పలు కీలక వ్యాఖ్యలు చేశారు. ఈ సమావేశానికి క్యూఆర్ కోడ్ పాసులు కలిగిన సుమారు 4,900 మంది ముఖ్య నేతలు, కార్యకర్తలకు మాత్రమే అనుమతి ఇచ్చారు.

“ఇది ప్రజలు-అవినీతి మధ్య యుద్ధం”

విజయ్ మాట్లాడుతూ.. “స్పష్టంగా చెప్పాలంటే ఈ ఎన్నికలు విజయ్, స్టాలిన్‌ల మధ్య యుద్ధం. ఇది తమిళనాడు ప్రజలకు, అవినీతికి మధ్య జరుగుతున్న సమరం. ప్రజలకు, లంచగొండితనానికి మధ్య జరుగుతున్న పోరాటం. ప్రజలకు, డీఎంకే ప్రభుత్వానికి మధ్య జరుగుతున్న యుద్ధం” అని అన్నారు. ఓటు హక్కు ప్రజల స్వాధీనం అని దాన్ని ఎవరూ కొనలేరని ఆయన ఘాటుగా వ్యాఖ్యానించారు. రాజకీయ పరిస్థితిని వివరిస్తూ ఆయన జల్లికట్టు ఎద్దు కథను ఉదాహరణగా చెప్పారు. ఆ కథలోని ఎద్దు ప్రస్తుత తమిళనాడు రాజకీయాలకు ప్రతీక అని దానితో పోరాడేది తాను ఒక్కరే కాదని ప్రజలంతా కలిసి మార్పు కోసం పోరాడాలని పిలుపునిచ్చారు. ప్రజలు మార్పు కోసం ఆకలితో ఉన్నప్పుడు వారికి భయం కాదు పరిష్కారాలు కావాలని ఆయన పేర్కొన్నారు.

ప్రభుత్వ హామీలపై ప్రశ్నలు

డీఎంకే ప్రభుత్వం ఇచ్చిన నెలవారీ కరెంట్ బిల్లుల హామీ ఏమైందని విజయ్ ప్రశ్నించారు. రాష్ట్రంలో శాంతిభద్రతల పరిస్థితి, మహిళల భద్రతపై ఆందోళన వ్యక్తం చేశారు. కొండ గ్రామాల్లో బస్సు సౌకర్యాల కొరత, సరైన వైద్య సదుపాయాల లేమి వంటి సమస్యలను ప్రస్తావించారు. తమ ప్రభుత్వం ఏర్పడితే అమ్మాయిలు, అబ్బాయిల భద్రతకు అత్యంత ప్రాధాన్యత ఇస్తామని హామీ ఇచ్చారు. అలాగే ప్రభుత్వ పాఠశాలలను ప్రైవేట్ విద్యాసంస్థలకు దీటుగా అభివృద్ధి చేస్తామని చెప్పారు. రాజకీయాల్లోకి రాకముందు వచ్చిన తర్వాత నేతలు తమ ఆస్తుల వివరాలను ప్రకటించాలని సవాల్ విసిరారు. గతంలో స్టాలిన్ తనను “స్నేహితుడు”గా అభివర్ణించిన విషయాన్ని గుర్తుచేస్తూ, “నేనే మీ స్నేహితుడినైతే వివాదాల్లోకి నా పేరు ఎందుకు లాగుతున్నారు?” అని ప్రశ్నించారు. అవినీతిని వ్యతిరేకిస్తున్నందుకే తనను లక్ష్యంగా చేసుకుంటున్నారని ఆరోపించారు. ప్రతి పోలింగ్ బూత్‌ను విజయ బూత్‌గా మార్చాలని కార్యకర్తలకు పిలుపునిచ్చారు. రాష్ట్ర రాజకీయాల్లో కొత్త మార్పుకు ఇదే సరైన సమయం అని ఆయన పేర్కొన్నారు.

Follow us