Amaravati : ఏపీ మీదుగా రెండు బుల్లెట్ రైలు కారిడార్లకు ప్రాథమిక ఆమోదం

Preliminary approval for two bullet train corridors through AP

Amaravati : ఆంధ్రప్రదేశ్ రాష్ట్రంలో బుల్లెట్ రైలు పరుగులు పెట్టేందుకు మార్గం సుగమమవుతోంది. రాష్ట్రంలోని కీలక ప్రాంతాల మీదుగా రెండు హై-స్పీడ్ రైల్ కారిడార్ల నిర్మాణానికి కేంద్ర ప్రభుత్వం ప్రాథమిక ఆమోదం తెలిపింది. ఈ ప్రాజెక్టులు పూర్తయిన తర్వాత రాష్ట్ర రవాణా రంగంలో విప్లవాత్మక మార్పులు చోటుచేసుకోనున్నాయని అధికారులు అంచనా వేస్తున్నారు. అమరావతి, రాయలసీమ ప్రాంతాలను కేంద్రంగా చేసుకుని రూపొందిస్తున్న ఈ కారిడార్లు భవిష్యత్తులో ఏపీ అభివృద్ధికి కీలకంగా మారనున్నాయి.

అమరావతి మీదుగా హైదరాబాద్-చెన్నై కారిడార్

హైదరాబాద్-చెన్నై బుల్లెట్ రైలు మార్గం కొత్తగా రూపొందించబడుతున్న కారిడార్‌లో కీలకమైనది. ఈ మార్గం ఆంధ్రప్రదేశ్ రాజధాని అమరావతి (సీఆర్‌డీఏ) మీదుగా సాగేలా ప్లాన్ చేశారు. మొత్తం పొడవు 744.5 కిలోమీటర్లు కాగా, అందులో 448.11 కిలోమీటర్లు ఏపీ పరిధిలోనే ఉన్నాయి. ఈ మార్గంలో అమరావతి, గుంటూరు, చీరాల, ఒంగోలు, కావలి, నెల్లూరు, నాయుడుపేట, తడ వద్ద బుల్లెట్ రైలు స్టేషన్లను ఏర్పాటు చేయనున్నారు. తెలంగాణలో ఈ మార్గానికి సంబంధించి ఆరు స్టేషన్లు నిర్మించనున్నట్లు సమాచారం. ఈ రైలు మార్గం హైదరాబాద్ శంషాబాద్ నుంచి ప్రారంభమై, నార్కట్‌పల్లి, సూర్యాపేట, ఖమ్మం మీదుగా ఏపీలోకి ప్రవేశించి, అమరావతిని దాటి చెన్నై వైపు సాగుతుంది. ఈ మార్గం పూర్తయితే హైదరాబాద్ నుంచి చెన్నై వరకు ప్రయాణ సమయం గంటలకొద్దీ తగ్గనుంది. ప్రస్తుతం వాణిజ్యంగా, విద్యా, ఆరోగ్యంగా అమరావతి మారుతున్న కేంద్రం కావడంతో, ఈ కారిడార్ దాని ప్రాముఖ్యతను మరింత పెంచనుంది.

రాయలసీమకు లాభాన్ని చేకూర్చే హైదరాబాద్-బెంగళూరు కారిడార్

రాయలసీమ ప్రాంతానికి సుళువైన ప్రయాణ మార్గంగా రూపొందిస్తున్న మరో హై-స్పీడ్ రైల్ కారిడార్ హైదరాబాద్-బెంగళూరు మధ్య నిర్మించనున్నారు. ఈ మార్గం మొత్తం పొడవు 576.6 కిలోమీటర్లు కాగా, దాంట్లో 263.3 కిలోమీటర్లు ఏపీ పరిధిలో ఉంటాయి. ఈ కారిడార్ కర్నూలు, డోన్, గుత్తి, అనంతపురం, హిందూపురం వంటి ముఖ్య పట్టణాలను కలుపుతూ సాగనుంది. అంతేకాదు, కియా మోటార్స్ కంపెనీ ప్రాముఖ్యత దృష్టిలో ఉంచుకుని శ్రీ సత్యసాయి జిల్లా దుద్దేబండ వద్ద ప్రత్యేకంగా స్టేషన్‌ను ప్రతిపాదించారు. ఈ మార్గం ఎక్కువగా ప్రస్తుత జాతీయ రహదారికి సమాంతరంగా ఉండటం విశేషం. ఈ కారిడార్ రాయలసీమలోని పరిశ్రమలు, విద్యా సంస్థలు, వ్యవసాయ ఉత్పత్తుల రవాణాకు కీలకంగా మారనుంది. హై-స్పీడ్ కనెక్షన్ ద్వారా బెంగళూరు వంటి ఐటీ హబ్‌తో సమీప సంబంధం ఏర్పడి, ఉద్యోగ అవకాశాలు, పెట్టుబడుల ఆకర్షణ పెరిగే అవకాశముంది.

బుల్లెట్ రైలు చతుర్భుజం రూపుదిద్దుకుంటోంది

ఈ రెండు కారిడార్లతో పాటు, ఇప్పటికే ప్రతిపాదనలో ఉన్న బెంగళూరు-చెన్నై హై-స్పీడ్ ప్రాజెక్టు కూడా త్వరలో ముందుకు సాగనున్నది. ఈ మూడు మార్గాలు పూర్తయితే హైదరాబాద్ – అమరావతి – చెన్నై – బెంగళూరు నగరాల మధ్య బుల్లెట్ రైలు చతుర్భుజం రూపుదిద్దుకోనుంది. దీని వలన ప్రయాణ సమయం గణనీయంగా తగ్గి, నాలుగు నగరాల మధ్య సంబంధాలు మరింత బలోపేతం కావడం ఖాయం. సుమారు 1-2 గంటల్లో నగరాల మధ్య ప్రయాణించవచ్చని అంచనా. ఇది పరిశ్రమల అభివృద్ధికి, వ్యాపార వృద్ధికి, ఉద్యోగ అవకాశాల విస్తరణకు గట్టిపునాది వేస్తుందని నిపుణుల అభిప్రాయం.

అభివృద్ధికి దిక్సూచి

ఈ రెండు కారిడార్లు పూర్తయిన తర్వాత రాష్ట్రం పూర్తిగా మారిన రవాణా దృశ్యాన్ని చూడబోతోంది. నగరాలు మాత్రమే కాదు, చిన్న పట్టణాలు, గ్రామాలు కూడా బుల్లెట్ రైలు ప్రయోజనాన్ని పొందేలా మారబోతున్నాయి. కేంద్రం ప్రాథమిక ఆమోదం ఇచ్చిన ఈ ప్రాజెక్టులకు త్వరలోనే నిధుల కేటాయింపు, టెండర్లు మొదలయ్యే అవకాశముంది. ఇది ఆంధ్రప్రదేశ్‌కు అభివృద్ధి వైపు తీసుకెళ్లే మరో అడుగుగా మారనుంది.

Read Also: US : జేడీ వాన్స్‌ సంచలన వ్యాఖ్యలు.. అసాధారణ పరిస్థితుల్లో అధ్యక్ష బాధ్యతలు తీసుకోవడానికి సిద్ధం

Follow us