టీ20 ప్రపంచకప్ ఫైనల్.. న్యూజిలాండ్‌పై భార‌త్‌దే పైచేయి?!

India vs New Zealand

India vs New Zealand: 2026 టీ20 ప్రపంచకప్ ఫైనల్ మ్యాచ్ మార్చి 8న అహ్మదాబాద్‌లోని నరేంద్ర మోదీ స్టేడియంలో భారత్- న్యూజిలాండ్ జట్ల మధ్య జరగనుంది. డిఫెండింగ్ ఛాంపియన్‌గా బరిలోకి దిగుతున్న భారత్, వరుసగా రెండోసారి టీ20 ప్రపంచకప్‌ను గెలుచుకుని ప్రపంచ రికార్డు సృష్టించాలని చూస్తోంది. మరోవైపు తొలిసారి టీ20 ప్రపంచ ఛాంపియన్‌గా నిలవాలనే పట్టుదలతో న్యూజిలాండ్ జట్టు ఉంది. గణాంకాల ప్రకారం భారత జట్టు గెలిచే అవకాశాలు ఎలా ఉన్నాయో ఇప్పుడు చూద్దాం.

హెడ్-టు-హెడ్ రికార్డులో ఎవరిదే పైచేయి?

అంతర్జాతీయ టీ20 మ్యాచ్‌లలో రెండు జట్లు ఇప్పటివరకు 30 సార్లు తలపడగా, భారత్ 18 సార్లు, న్యూజిలాండ్ 11 సార్లు గెలిచాయి. ఒక మ్యాచ్ టైగా ముగిసింది. 2022 నుండి ఇప్పటివరకు భారత్-న్యూజిలాండ్ జట్లు 10 సార్లు ముఖాముఖి తలపడగా, అందులో కివీస్ జట్టు కేవలం 2 సార్లు మాత్రమే గెలిచింది. కాబట్టి హెడ్-టు-హెడ్ రికార్డుల్లో భారత్ స్పష్టమైన ఆధిక్యంలో ఉంది.

అహ్మదాబాద్‌లోని నరేంద్ర మోదీ స్టేడియం విషయానికి వస్తే ఇక్కడ భారత్- న్యూజిలాండ్ మధ్య ఇప్పటివరకు ఒకే ఒక్క టీ20 మ్యాచ్ జరిగింది. 2023లో జరిగిన ఆ మ్యాచ్‌లో భారత్ ఏకంగా 168 పరుగుల భారీ తేడాతో విజయం సాధించింది. ఈ మైదానంలో కూడా టీమిండియా ప్రత్యర్థిపై పూర్తి ఆధిపత్యం ప్రదర్శిస్తోంది.

Also Read: దిండుపై త‌ప్పుగా ప‌డుకుంటున్నారా?!

ఇక్కడ న్యూజిలాండ్ ముందుంది

టీ20 ప్రపంచకప్‌లలో మాత్రం న్యూజిలాండ్ జట్టు భారత్‌పై ఎప్పుడూ పైచేయి సాధిస్తూ వస్తోంది. ఇప్పటివరకు టీ20 ప్రపంచకప్‌లో భారత్- న్యూజిలాండ్ 3 సార్లు తలపడగా, ఆ మూడు సందర్భాల్లోనూ కివీస్ జట్టే విజయం సాధించింది. 2007, 2016, 2021 ప్రపంచకప్‌లలో న్యూజిలాండ్ భారత్‌ను ఓడించింది.

గుర్తుంచుకోవాల్సిన విషయం ఏమిటంటే.. ఇదే మైదానంలో 2023 వన్డే ప్రపంచకప్ ఫైనల్‌లో ఆస్ట్రేలియా చేతిలో భారత్ ఓడిపోయింది. మార్చి 8న జరగబోయే ఫైనల్ మ్యాచ్‌లో ‘టాస్’ చాలా కీలకం కానుంది. ఇక్కడ ఛేజింగ్ చేయడం కష్టమైన పని. ఇప్పటివరకు ఇక్కడ జరిగిన 14 అంతర్జాతీయ టీ20 మ్యాచ్‌లలో 9 సార్లు మొదట బ్యాటింగ్ చేసిన జట్టే విజయం సాధించింది. మొత్తం గణాంకాలను బట్టి చూస్తే టీ20 ప్రపంచకప్‌లో ఇప్పటివరకు న్యూజిలాండ్‌పై భారత్‌కు విజయం లేకపోయినా ప్రస్తుత ఫామ్, గణాంకాల ప్రకారం ఫైనల్‌లో భారత్ గెలిచే అవకాశాలే ఎక్కువగా కనిపిస్తున్నాయి.

Follow us