మీ కారు టైర్లను ఎప్పుడు మార్చాలి?

Tyre Safety Tips

Tyre Safety Tips: కారు నడిపేటప్పుడు మనం తరచుగా ఇంజిన్, మైలేజీ, సర్వీసింగ్ గురించి ఆలోచిస్తాం. కానీ అన్నింటికంటే ముఖ్యమైన టైర్లను చాలాసార్లు నిర్లక్ష్యం చేస్తాం. సాధారణంగా టైర్లు పూర్తిగా అరిగిపోయే వరకు చాలామంది వాటిని మార్చరు. కానీ టైర్లు పాడవుతున్నాయని చెప్పడానికి ముందే కొన్ని సంకేతాలను ఇస్తాయి. వీటిని నిర్లక్ష్యం చేస్తే బ్రేకింగ్ వ్యవస్థ బలహీనపడటమే కాకుండా కారు నియంత్రణ కోల్పోయి ప్రమాదాలు జరిగే అవకాశం ఉంది. అందుకే టైర్లను ఎప్పుడు మార్చాలో ఈ క్రింది అంశాల ద్వారా తెలుసుకోండి.

టైర్ల జీవితకాలం ఎంత?

కారు టైర్లు శాశ్వతంగా రావు. సాధారణంగా ఒక టైర్ జీవితకాలం 5 నుండి 6 ఏళ్లు ఉంటుంది. దూరం పరంగా చూస్తే ఇవి సుమారు 40,000 నుండి 80,000 కిలోమీటర్ల వరకు పనిచేస్తాయి. కొన్నిసార్లు టైర్లు పైకి బానే ఉన్నట్లు అనిపించినా, కాలక్రమేణా లోపల రబ్బరు బలహీనపడుతుంది. అందుకే 6 ఏళ్ల కంటే పాత టైర్లను వాడటం సురక్షితం కాదు. టైర్లు అరిగిపోకపోయినా సరే, 10 ఏళ్లు దాటిన వాటిని అస్సలు వాడకూడదని నిపుణులు హెచ్చరిస్తున్నారు.

Also Read: Gaddar Awards : ‘తెలంగాణ కోడలికి’ గద్దర్ అవార్డ్..ఫ్యాన్స్ ఫుల్ హ్యాపీ

టైర్ గ్రిప్ తగ్గినప్పుడు

వర్షం పడినప్పుడు లేదా తడి రోడ్లపై కారు నడుపుతున్నప్పుడు కారు జారిపోతున్నట్లు అనిపించినా లేదా బ్రేక్ వేసినప్పుడు పట్టు దొరకకపోయినా.. అది టైర్ గ్రిప్ బలహీనపడిందని అర్థం. టైర్లపై ఉండే ‘ట్రెడ్’ నమూనా రోడ్డుపై పట్టుని ఇస్తుంది. ఇవి అరిగిపోయే కొద్దీ కారుపై నియంత్రణ తగ్గుతుంది. ఇటువంటి సమయంలో టైర్లు మార్చడం ఉత్తమం.

టైర్లపై పగుళ్లు లేదా కోతలు

కాలక్రమేణా టైర్ రబ్బరు గట్టిపడిపోతుంది. ముఖ్యంగా కారును ఎండలో ఎక్కువ సేపు ఉంచితే ఈ ప్రక్రియ వేగవంతమవుతుంది. టైర్ పక్క భాగాల్లో చిన్న చిన్న పగుళ్లు, కోతలు లేదా ఉబ్బెత్తు భాగాలు కనిపిస్తే వాటిని తేలికగా తీసుకోకండి. హైవేలపై వేగంగా వెళ్తున్నప్పుడు ఇవి ఏ క్షణమైనా పేలిపోయే ప్రమాదం ఉంది.

ప్రయాణించిన దూరం

సాధారణంగా 40,000 నుండి 50,000 కిలోమీటర్ల తర్వాత టైర్ల పరిస్థితిని ఒకసారి నిపుణులతో తనిఖీ చేయించడం మంచిది. మీ డ్రైవింగ్ శైలి, రోడ్ల పరిస్థితిని బట్టి ఇవి త్వరగా కూడా అరిగిపోవచ్చు. పైకి బానే ఉన్నా లోపలి భాగం బలహీనపడే అవకాశం ఉంటుంది.

టైర్లు అసమానంగా అరిగిపోవడం

టైర్ ఒక పక్క మాత్రమే ఎక్కువగా అరిగిపోయినా లేదా మధ్య భాగం బాగా పల్చబడినా.. అది వీల్ అలైన్‌మెంట్ లేదా సస్పెన్షన్ సమస్యకు సంకేతం. ఇలాంటి టైర్లతో ప్రయాణించడం వల్ల కారు బ్యాలెన్స్ దెబ్బతింటుంది మరియు మైలేజీ కూడా తగ్గుతుంది.

రక్షణ కోసం సమయానికి టైర్లు మార్చండి

మీరు, మీ కుటుంబ సభ్యుల భద్రత ఈ నాలుగు టైర్లపైనే ఆధారపడి ఉంటుంది. పైన పేర్కొన్న సంకేతాలలో ఏ ఒక్కటి కనిపించినా వెంటనే స్పందించండి. సరైన సమయంలో టైర్లు మార్చడం వల్ల కారు పనితీరు మెరుగుపడటమే కాకుండా రోడ్డుపై మీ ప్రయాణం సురక్షితంగా సాగుతుంది.

Follow us