India Vs Australia Day 1: పెర్త్ తొలిరోజు.. పలు రికార్డులు బద్ద‌లు కొట్టిన టీమిండియా!
భారత్-ఆస్ట్రేలియా జట్ల మధ్య జరుగుతున్న పెర్త్ టెస్టు తొలిరోజు ఆటను ఆస్వాదించేందుకు అభిమానులు భారీగా స్టేడియానికి త‌ర‌లివ‌చ్చారు. టెస్టు తొలిరోజు 31,302 మంది ప్రేక్షకులు మైదానంలోకి రావడంతో ఈ మైదానంలో సరికొత్త రికార్డు కూడా నమోదు అయింది.
- By Gopichand Published Date - 07:49 PM, Fri - 22 November 24
India Vs Australia Day 1: బోర్డర్-గవాస్కర్ సిరీస్‌లో తొలి టెస్ట్ మ్యాచ్ అట్టహాసంగా ప్రారంభమైంది. పెర్త్ టెస్టు తొలిరోజు (India Vs Australia Day 1) ఫాస్ట్ బౌలర్లు అద‌ర‌గొట్టారు. మొదట కంగారూ ఫాస్ట్ బౌలర్లు విధ్వంసం సృష్టించారు. దీంతో భారత జట్టును కేవలం 150 పరుగులకే కట్టడి చేశారు. దీని తర్వాత టీమిండియా కెప్టెన్ జస్ప్రీత్ బుమ్రా నేతృత్వంలోని భారత బౌలర్లు కూడా ఆస్ట్రేలియా బలమైన బ్యాటింగ్ ఆర్డర్‌ను దెబ్బ‌కొట్టారు. వ‌చ్చిన ప్ర‌తి అవ‌కాశాన్ని సద్వినియోగం చేసుకున్నారు. టెస్టు తొలిరోజు ఆప్టస్ స్టేడియంలో మొత్తం 17 వికెట్లు పడిపోవడంతో కంగారూ గడ్డపై సరికొత్త రికార్డు కూడా నమోదు అయింది. ఇదొక్కటే కాదు.. టెస్ట్ మొదటి రోజు అనేక విధాలుగా చరిత్రాత్మకమైనదిగా నిరూపించింది.
ఈ ఘనత 1952 తర్వాత తొలిసారి జరిగింది
ఆస్ట్రేలియా గడ్డపై టెస్టు క్రికెట్‌లో గత 72 ఏళ్లలో జరగని ఘటన పెర్త్ మైదానంలో చోటుచేసుకుంది. 1952 తర్వాత ఆస్ట్రేలియాలో జరుగుతున్న టెస్టు మ్యాచ్‌లో తొలిరోజు 17 వికెట్లు పడటం ఇదే తొలిసారి. పిచ్ అందించిన సహాయాన్ని ఇరు జట్ల ఫాస్ట్ బౌలర్లు పూర్తిగా సద్వినియోగం చేసుకున్నారు. ఆస్ట్రేలియా తరఫున జోష్ హేజిల్‌వుడ్ గరిష్టంగా నాలుగు వికెట్లు తీయగా, మిచెల్ స్టార్క్, మిచెల్ మార్ష్, పాట్ కమిన్స్ తలో రెండు వికెట్లు తీశారు. భారత్ తరఫున కెప్టెన్ జస్ప్రీత్ బుమ్రా నాలుగు వికెట్లు తీయగా, సిరాజ్ రెండు వికెట్లు, హర్షిత్ రాణా ఒక వికెట్ తీశారు.
Also Read: Australia: 43 ఏళ్ల తర్వాత మ‌రో చెత్త రికార్డు నమోదు చేయ‌నున్న ఆస్ట్రేలియా!
ప్రేక్షకులు రికార్డు సృష్టించారు
భారత్-ఆస్ట్రేలియా జట్ల మధ్య జరుగుతున్న పెర్త్ టెస్టు తొలిరోజు ఆటను ఆస్వాదించేందుకు అభిమానులు భారీగా స్టేడియానికి త‌ర‌లివ‌చ్చారు. టెస్టు తొలిరోజు 31,302 మంది ప్రేక్షకులు మైదానంలోకి రావడంతో ఈ మైదానంలో సరికొత్త రికార్డు కూడా నమోదు అయింది. అభిమానులు కూడా తమ తమ టీమ్‌లను ఉత్సాహంగా ప్రోత్సహించడం కనిపించింది.
1980 తర్వాత టెస్టు క్రికెట్‌లో కంగారూ జట్టులోని టాప్‌5 బ్యాట్స్‌మెన్‌లు 40 కంటే తక్కువ స్కోరుతో పెవిలియన్‌కు చేరడం ఇది రెండోసారి మాత్రమే. ఇంతకుముందు 2016లో దక్షిణాఫ్రికాపై ఈ ఘనత సాధించింది. పెర్త్ టెస్టు తొలి ఇన్నింగ్స్‌లో కంగారూ జట్టు కేవలం 38 పరుగుల స్కోరు వద్ద తొలి ఐదు వికెట్లు కోల్పోయింది.
బూమ్-బూమ్ బుమ్రా అద్భుత ప్ర‌ద‌ర్శ‌న
స్టీవ్ స్మిత్‌ను గోల్డెన్ డక్ చేయ‌డం ద్వారా జస్ప్రీత్ బుమ్రా చరిత్ర పుటల్లో తన పేరును నమోదు చేసుకున్నాడు. స్మిత్‌ను గోల్డెన్ డక్‌గా ఔట్ చేసిన రెండో బౌలర్‌గా బుమ్రా నిలిచాడు. అంతకుముందు 2014లో డేల్ స్టెయిన్ టెస్టులో తొలి బంతికే స్మిత్‌ను అవుట్ చేశాడు.
