IND vs WI: విరాట్ కోహ్లీ రికార్డును బ్రేక్ చేసిన శుభ్‌మన్ గిల్‌!

IND vs WI: భారత్, వెస్టిండీస్ (IND vs WI) మధ్య ఢిల్లీలోని అరుణ్ జైట్లీ స్టేడియంలో జరుగుతున్న రెండో టెస్ట్ మ్యాచ్‌లో టీమిండియా అద్భుతమైన బ్యాటింగ్ ప్రదర్శన కనబరిచింది. ముందుగా యశస్వి జైస్వాల్ 175 పరుగుల అద్భుతమైన ఇన్నింగ్స్ ఆడగా.. రెండో రోజు కెప్టెన్ శుభ్‌మన్ గిల్ శతకం సాధించాడు. సెంచరీతో కెప్టెన్ శుభ్‌మన్ గిల్.. విరాట్ కోహ్లీ కూడా చేయలేని ఒక ఘనతను సాధించాడు.

గిల్ ప్రత్యేక ఘనత

ఢిల్లీ టెస్ట్‌లో కెప్టెన్ శుభ్‌మన్ గిల్ అద్భుతమైన బ్యాటింగ్‌తో ఆకట్టుకున్నాడు. కెప్టెన్‌గా శుభ్‌మన్ గిల్‌కు ఇది రెండో టెస్ట్ సిరీస్ మాత్రమే. కానీ రెండో సిరీస్‌లోనే అతను అద్భుతం చేశాడు. రెండో టెస్ట్ రెండో రోజున శుభ్‌మన్ గిల్ తన టెస్ట్ కెరీర్‌లో 10వ శతకాన్ని నమోదు చేయగా, కెప్టెన్‌గా ఇది అతని 5వ శతకం. కేవలం 12 ఇన్నింగ్స్‌లలోనే గిల్ కెప్టెన్‌గా 5 శతకాలు సాధించడం ఒక గొప్ప రికార్డు. విరాట్ కోహ్లీ కూడా తన కెరీర్‌లో కెప్టెన్‌గా ఇంత త్వరగా 5 టెస్ట్ సెంచరీలు చేయలేకపోయాడు.

Also Read: Hardik Pandya: ప్రేయ‌సిని ప‌రిచ‌యం చేసిన హార్దిక్ పాండ్యా.. ఆమె ఎవ‌రంటే?

అయితే భారత క్రికెట్ చరిత్రలో టెస్ట్ కెప్టెన్‌గా అత్యంత వేగంగా 5 శతకాలు చేసిన రికార్డు దిగ్గజం సునీల్ గవాస్కర్ పేరిట ఉంది. ఆయన కేవలం 10 ఇన్నింగ్స్‌లలోనే ఈ ఘనతను సాధించారు. ఇక ప్రపంచ క్రికెట్‌లో ఈ రికార్డు ఇంగ్లాండ్‌ మాజీ కెప్టెన్ అలిస్టర్ కుక్ పేరిట ఉంది. ఆయన 9 ఇన్నింగ్స్‌లలో ఈ చరిత్ర సృష్టించాడు.

ఒక క్యాలెండర్ ఇయర్‌లో 5 టెస్ట్ సెంచరీలు

శుభ్‌మన్ గిల్ పేరు మీద ఇప్పుడు టెస్ట్ క్రికెట్‌లో 10 శతకాలు నమోదయ్యాయి. వీటిలో 5 సెంచరీలను గిల్ ఒకే క్యాలెండర్ ఇయర్‌లో సాధించాడు. వెస్టిండీస్‌పై గిల్‌కు ఇది తొలి టెస్ట్ సెంచరీ. ఒకే క్యాలెండర్ ఇయర్‌లో 5 సెంచరీలు సాధించిన ఘనతను టీమ్ ఇండియా తరఫున విరాట్ కోహ్లీ 2 సార్లు (2013, 2017లో) సాధించాడు. ఢిల్లీ టెస్ట్ రెండో రోజున టీమ్ ఇండియా 518 పరుగులు చేసి ఇన్నింగ్స్‌ను డిక్లేర్ చేసింది. రెండో సెషన్‌లో టీమ్ ఇండియా 5వ వికెట్‌ను ధ్రువ్ జురెల్ రూపంలో కోల్పోయింది. జురెల్ 44 పరుగులు చేసి ఔట్ కాగా, కెప్టెన్ గిల్ 129 పరుగులతో నాటౌట్‌గా నిలిచాడు.