Happy Birthday Rahul Dravid: నేడు గ్రేట్‌వాల్‌ ద్రవిడ్‌ పుట్టిన రోజు.. ద్రవిడ్‌ గురించి ఇవి తెలుసా..?

గ్రేట్‌ వాల్‌ ఆఫ్‌ ఇండియాగా పిలవబడే భారత మాజీ క్రికెటర్‌ రాహుల్‌ ద్రవిడ్‌ (Rahul Dravid) బుధవారం తన 50వ పుట్టిన రోజును జరుపుకుంటున్నారు. ఈ సందర్భంగా పలువురు క్రికెటర్లు, అభిమానులు ఆయనకు పుట్టిన రోజు శుభాకాంక్షలు తెలిపారు. టీమిండియాకు ఆయన 13 ఏళ్లపాటు క్రికెట్‌ సేవలందించారు. భారత్‌ కష్టాల్లో ఉన్న ప్రతీసారి వికెట్ల మధ్య అడ్డుగోడలా నిలబడి జట్టును విజయ తీరాలకు చేర్చిన సందర్భాలు ఉన్నాయి. ఇప్పుడు ఆ విషయాలను అభిమానులు గుర్తు చేసుకుంటున్నారు.

ది వాల్, మిస్టర్ డిఫెండబుల్‌గా పేరుగాంచిన ద్రావిడ్.. తన కెరీర్‌లో ఎన్నో మైలురాళ్లను అధిగమించాడు. క్రికెట్ నుంచి రిటైరైనా.. అండర్-19, ఇండియా-ఏ జట్లకు కోచ్ గా వ్యవహరించారు. ప్రస్తుతం టీమిండియా కోచ్ గా బాధ్యతలు నిర్వహిస్తున్నారు. జనవరి 11, 1973 ఇండోర్‌లో జన్మించిన ద్రవిడ్‌.. టెస్టు మ్యాచ్ తో క్రికెట్‌ ఇన్నింగ్స్‌ ప్రారంభించాడు.

Also Read: Rohit Sharma: క్రీడా స్పూర్తిని చాటుకున్న రోహిత్ శర్మ.. ఏం చేశాడో తెలుసా..!

టెస్టు క్రికెట్‌లో అత్యధిక బంతులు: టెస్టు క్రికెట్‌లో అత్యధిక బంతులు ఎదుర్కొన్న ఏకైక బ్యాట్స్‌మెన్ ద్రవిడ్ మాత్రమే. అతను గేమ్‌లోని సుదీర్ఘ ఫార్మాట్‌లో మొత్తం 31,258 బంతులు ఎదుర్కొన్నాడు.

టెస్టుల్లో గోల్డెన్ డక్‌ లేదు: తాను ఆడిన 286 టెస్టు ఇన్నింగ్స్‌లో గోల్డెన్ డకౌట్ లేని రికార్డును కలిగి ఉన్న ఏకైక బ్యాట్స్‌మెన్ భారత కోచ్ ద్రవిడ్.

అత్యధిక వంద పరుగుల భాగస్వామ్యాలు: మిస్టర్ డిపెండబుల్ టెస్టుల్లో అత్యధికంగా వంద పరుగుల భాగస్వామ్యాన్ని కలిగి ఉన్నాడు.

టెస్ట్ క్రికెట్‌లో అత్యధిక క్యాచ్‌లు: టెస్ట్ క్రికెట్ చరిత్రలో అత్యధిక క్యాచ్‌లు పట్టిన ఫీల్డర్‌గా కూడా పిలుస్తారు. మొత్తం 210 క్యాచ్‌లు ద్రవిడ్ పేరు మీద ఉన్నాయి.

క్రీజ్‌లో బ్యాట్స్‌మెన్ గడిపిన అత్యధిక నిమిషాలు: క్రీజులో అత్యధిక నిమిషాలు గడిపిన ఏకైక టెస్టు బ్యాట్స్‌మెన్ ద్రవిడ్ . అతను మొత్తం 735 గంటల 52 నిమిషాల పాటు బ్యాటింగ్ చేశాడు. అంటే 44,152 నిమిషాలకు సమానం.