Eyesight: దృష్టి లోపం, కంటి సమస్యలు.. ఏ విటమిన్ల లోపం కారణమంటే?

Eyesight: శరీరానికి విటమిన్లు అనేక విధాలుగా ప్రయోజనకరంగా ఉంటాయి. అయితే కొన్ని విటమిన్లు శరీరంలో తక్కువైతే కంటి చూపు (Eyesight) మసకబారడం వంటి సమస్యలు తలెత్తుతాయి. మీ వయస్సు పెద్దగా లేనప్పటికీ కంటి చూపు తగ్గడం లేదా మసకగా కనిపించడం జరుగుతుంటే.. ఏయే విటమిన్ల లోపం దీనికి కారణం కావచ్చు. ఆ లోపాన్ని ఎలా అధిగమించవచ్చో ఇప్పుడు తెలుసుకుందాం.

విటమిన్ ఏ (Vitamin A) లోపం

కళ్లకు అత్యంత ప్రయోజనకరమైన విటమిన్లలో విటమిన్ ఏ ఒకటి. శరీరంలో విటమిన్ ఏ లోపించినట్లయితే రెటీనా సంబంధిత సమస్యలు తలెత్తుతాయి. దీనివల్ల రేచీకటి, కళ్లు పొడిబారడం, శాశ్వత దృష్టి నష్టం కూడా సంభవించవచ్చు.

విటమిన్ ఏ లోపాన్ని ఎలా సరిచేయాలి?

ఆహారంలో చీజ్, గుడ్లు, ఆయిల్ ఫిష్ (కొవ్వు చేపలు), ఫోర్టిఫైడ్ ఫుడ్స్, పాలు-పెరుగు చేర్చవచ్చు. వీటితో పాటు క్యారెట్లు, ఎరుపు- ఆకుపచ్చ కూరగాయలు, అలాగే మామిడి, బొప్పాయి, ఆప్రికాట్ వంటి పసుపు పండ్లు తినడం ద్వారా శరీరానికి విటమిన్ ఏ లభిస్తుంది.

విటమిన్ బి12 (Vitamin B12) లోపం

విటమిన్ బి12 లోపం శరీర అంతర్గత నిర్మాణాన్ని బలహీనపరుస్తుందని అంటారు. శరీరంలో విటమిన్ బి12 తగ్గితే ఇది ఆప్టిక్ నరం దెబ్బతినడానికి దారితీయవచ్చు. దీనివల్ల కంటిచూపు మసకబారుతుంది. రంగులను గుర్తించడంలో ఇబ్బంది కలగవచ్చు.

Also Read: IPL 2026: కోల్‌కతా నైట్ రైడర్స్‌లోకి టిమ్ సౌథీ, షేన్ వాట్సన్!

విటమిన్ బి12 లోపాన్ని ఎలా సరిచేయాలి?

శాఖాహార ఆహారాలలో విటమిన్ బి12 తక్కువగా ఉంటుంది. క్లామ్స్, ఆయిస్టర్, సాల్మన్, ట్రౌట్ చేపలు, గుడ్లు, మాంసం విటమిన్ బి12కి మంచి వనరులు. వీటితో పాటు పాలు, చీజ్, పెరుగు నుండి కూడా ఈ విటమిన్ లభిస్తుంది.

విటమిన్ డి (Vitamin D) లోపం

కళ్లపై విటమిన్ డి లోపం ప్రభావం కూడా కనిపిస్తుంది. శరీర మొత్తం ఆరోగ్యాన్ని కాపాడుకోవడానికి ఈ విటమిన్ చాలా అవసరం. విటమిన్ డి లోపిస్తే కళ్లు పొడిబారడం, ఆప్టిక్ నరంపై ప్రభావం పడటం, డ్రై ఐ సిండ్రోమ్ సమస్యలు రావొచ్చు.

విటమిన్ డి లోపాన్ని ఎలా సరిచేయాలి?

ఆయిలీ ఫిష్, రెడ్ మీట్, సాల్మన్, సార్డిన్, ట్రౌట్, హెర్రింగ్, మాకెరెల్ వంటి చేపలు, గుడ్డు పచ్చసొన, ఫోర్టిఫైడ్ ఫుడ్స్ ద్వారా శరీరానికి విటమిన్ డి అందుతుంది. విటమిన్ డికి ప్రధాన వనరు సూర్యరశ్మి. అందుకే ప్రతిరోజూ ఉదయం 10 నుండి 15 నిమిషాల పాటు సూర్యరశ్మిని తీసుకోవడం ద్వారా శరీరానికి తగినంత విటమిన్ డి లభిస్తుంది.