త్వరలో మంత్రివర్గ విస్తరణ.. రేవంత్ సర్కార్ కీల‌క నిర్ణ‌యం!

Telangana Cabinet

Telangana Cabinet: తెలంగాణలో కాంగ్రెస్ ప్రభుత్వం కొలువుదీరినప్పటి నుండి మంత్రివర్గ విస్తరణ ఎప్పుడెప్పుడు జరుగుతుందా అని పార్టీ శ్రేణులతో పాటు రాజకీయ వర్గాల్లో తీవ్ర ఉత్కంఠ నెలకొంది. తాజాగా ఈ అంశం మరోసారి తెరపైకి వచ్చింది. ఐదు రాష్ట్రాల ఎన్నికల ప్రక్రియ ముగిసిన వెంటనే తెలంగాణలో పూర్తిస్థాయి కేబినెట్‌ను ఏర్పాటు చేసేందుకు ముఖ్యమంత్రి రేవంత్ రెడ్డి కసరత్తులు ముమ్మరం చేస్తున్నారు.

ఐదు రాష్ట్రాల ఎన్నికల తర్వాతే నిర్ణయం!

ప్రస్తుతం కాంగ్రెస్ అధిష్టానం మొత్తం ఐదు రాష్ట్రాల్లో జరుగుతున్న ఎన్నికల ప్రచారాలు, వ్యూహాలపై దృష్టి సారించింది. ఈ కీలక ఎన్నికల కోసం ముఖ్యమంత్రి రేవంత్ రెడ్డితో పాటు రాష్ట్రంలోని పలువురు మంత్రులకు కూడా పార్టీ కీలక బాధ్యతలను అప్పగించింది. ఈ నేపథ్యంలో ఆ ఎన్నికలు పూర్తయ్యాక తెలంగాణ కేబినెట్‌పై ఒక స్పష్టత వచ్చే అవకాశం ఉందని తెలుస్తోంది. ఇటీవల కేరళ పర్యటనలో ఉన్న సమయంలో కూడా సీఎం రేవంత్ రెడ్డి ఇదే విషయాన్ని సూచాయగా వెల్లడించారు. ఎన్నికల ఫలితాల అనంతరం రాష్ట్రంలో పూర్తిస్థాయి మంత్రివర్గం ఉంటుందని ఆయన హింట్ ఇచ్చారు.

Also Read: పాక్ లో వ్యతిరేకత మొదలయింది.

పనితీరు ఆధారంగా ‘కేబినెట్ ప్రక్షాళన’

కేవలం ఖాళీగా ఉన్న రెండు స్థానాలను భర్తీ చేయడమే కాకుండా ప్రస్తుతం ఉన్న మంత్రుల పనితీరు ఆధారంగా కేబినెట్‌లో మార్పులు చేర్పులు ఉండవచ్చని రాజకీయ విశ్లేషకులు భావిస్తున్నారు. పాలనలో పారదర్శకత, వేగం పెంచే క్రమంలో భాగంగా ఈ నిర్ణయం తీసుకునే అవకాశం ఉంది. ఇప్పటికే మంత్రుల పనితీరుపై ముఖ్యమంత్రి ఒక సమగ్రమైన ‘ప్రోగ్రెస్ రిపోర్ట్’ను సిద్ధం చేసినట్లు సమాచారం. ఎవరెవరు తమ శాఖలను ఎంత సమర్థవంతంగా నిర్వహిస్తున్నారు. ప్రజా సమస్యల పరిష్కారంలో ఎంత చురుగ్గా ఉంటున్నారు. ప్రభుత్వ గ్యారెంటీలను ప్రజల్లోకి ఎంతవరకు తీసుకువెళ్లారు అనే అంశాలను బట్టి మంత్రుల గ్రేడింగ్ ఖరారు చేసినట్లు తెలుస్తోంది. ఈ రిపోర్ట్ ఆధారంగానే ఎవరిని కొనసాగించాలి, ఎవరికి ఉద్వాసన పలకాలి అనే దానిపై సీఎం ఒక అంచనాకు వచ్చారు.

అధిష్టానం నుండి ‘గ్రీన్ సిగ్నల్’ కోసం నిరీక్షణ

మంత్రివర్గ విస్తరణకు సంబంధించి ఢిల్లీ పెద్దల నుండి తుది అనుమతి లభించాల్సి ఉంది. ముఖ్యంగా ఏఐసీసీ అధిష్టానం నుండి గ్రీన్ సిగ్నల్ రాగానే సీఎం రేవంత్ రెడ్డి ఈ ప్రక్రియను లాంఛనంగా పూర్తి చేయనున్నారు. మరోవైపు కాంగ్రెస్ అగ్రనేత రాహుల్ గాంధీ కూడా రాష్ట్ర నాయకత్వానికి కొన్ని కీలక సూచనలు చేసినట్లు తెలుస్తోంది. పార్టీలో ఎలాంటి అంతర్గత విభేదాలు రాకుండా సీనియర్లు, జూనియర్ల మధ్య సమన్వయం దెబ్బతినకుండా జాగ్రత్త పడాలని ఆయన కోరారు. ఏవైనా అసమ్మతి స్వరాలు ఉంటే వాటిని ముందే పరిష్కరించుకుని, ఐక్యంగా ముందుకు సాగాలని రాహుల్ గాంధీ సూచించినట్లు సమాచారం.

ఆశావహుల్లో మొదలైన టెన్షన్

మంత్రివర్గంలో చోటు దక్కుతుందనే ఆశతో చాలా మంది సీనియర్ ఎమ్మెల్యేలు ఇప్పటి నుండే తమ ప్రయత్నాలను ముమ్మరం చేశారు. సామాజిక సమీకరణలు, జిల్లాల వారీ ప్రాతినిధ్యం, పార్టీ పట్ల విధేయత వంటి అంశాలను పరిగణనలోకి తీసుకుని కొత్త మంత్రులను ఎంపిక చేసే అవకాశం ఉంది. ఈ విస్తరణతో రాష్ట్రంలో పాలన మరింత వేగవంతం అవుతుందని, రాబోయే రోజుల్లో ప్రభుత్వం మరింత పటిష్టంగా ప్రజా సమస్యలపై దృష్టి సారిస్తుందని కాంగ్రెస్ వర్గాలు ధీమా వ్యక్తం చేస్తున్నాయి.

Follow us