Ponguleti Srinivas Reddy : ఇందిరమ్మ ఇల్లు మోడల్ హౌస్‌ను ప్రారంభించిన మంత్రి పొంగులేటి శ్రీనివాసరెడ్డి

Indiramma House Statu

Ponguleti Srinivas Reddy : ఖమ్మం జిల్లా కూసుమంచి మండల కేంద్రంలోని ఎంపీడీవో కార్యాలయంలో ఇందిరమ్మ ఇల్లు మోడల్ హౌస్‌ను మంత్రి పొంగులేటి శ్రీనివాసరెడ్డి ప్రారంభించారు. రూ. 5 లక్షల వ్యయంతో నిర్మించిన ఈ మోడల్ హౌస్ వసతులు, నిర్మాణ తీరుపై ఆయన అధికారుల వద్ద విశేషాలు తెలుసుకున్నారు. ప్రారంభోత్సవ కార్యక్రమంలో మంత్రి మాట్లాడుతూ పేద ప్రజల కలల్ని నిజం చేసేందుకు ఇదొక మంచి ఆరంభమని అన్నారు. పేదల సొంతింటి ఆశని నెరవేర్చడంలో ఇందిరమ్మ ప్రభుత్వం చారిత్రక పాత్ర పోషించిందని, ఉమ్మడి ఆంధ్రప్రదేశ్ కాలంలో 25 లక్షల ఇళ్లు నిర్మించిన ఘనత కాంగ్రెస్ ప్రభుత్వానిదని ప్రశంసించారు.

ఇందిరమ్మ ఇళ్ల పథకం పేదల జీవనోపాధికి చిహ్నంగా నిలిచిందని మంత్రి తెలిపారు. పేదల బాగోగుల పట్ల శ్రద్ధచూపడం అందులో భాగమని పేర్కొన్నారు. “ఇందిరమ్మ ఇళ్లు అంటేనే కాంగ్రెస్ గుర్తుకు వస్తోంది. పేద ప్రజల కలల ఇళ్ల రూపంలో ప్రతిబింబించడానికి ఈ పథకం దోహదపడింది” అని మంత్రి వివరించారు.

పొంగులేటి శ్రీనివాసరెడ్డి గత ప్రభుత్వాలపై విమర్శలు గుప్పించారు. పేదల కోసం ఇళ్ల నిర్మాణం విషయంలో గత పాలకులు విఫలమయ్యారని, కేవలం హామీలతోనే పరిమితం అయ్యారని ఆరోపించారు. తమ ప్రభుత్వం మాత్రం అసంపూర్తిగా ఉన్న ఇళ్లను పూర్తిచేసి ప్రజలకు అందజేస్తోందని స్పష్టం చేశారు. “ప్రతి అసెంబ్లీకి 3,500 ఇళ్లను కేటాయించాం. గ్రీన్ ఛానల్ ద్వారా అర్హులైన ప్రతి పేదవాడికి ఇళ్లు అందజేస్తాం. ఇళ్ల పంపిణీ విషయంలో ఎలాంటి దళారులు ఉండరు” అని మంత్రి హామీ ఇచ్చారు.

Director Trinadha Rao Nakkina : నాగ్ హీరోయిన్ పై డైరెక్టర్ అభ్యంతరకర వ్యాఖ్యలు

ఇళ్ల పంపిణీలో అర్హతల విషయంలో మంత్రి కొద్ది మార్పులు సూచించారు. రేషన్ కార్డు కలిగిఉండటం కేవలం అర్హతకు సంకేతం కాదని, నిజంగా పేదవాడి అవసరాన్ని గుర్తించి ఆయనకు ఇళ్లు ఇవ్వడం ముఖ్యమని తెలిపారు. “ఇందిరమ్మ ప్రభుత్వం ఉన్నంతకాలం ఇళ్ల పథకం కొనసాగుతుంది. ఈ పథకం పార్టీ భేదాలకు అతీతంగా అమలు చేస్తాం” అని మంత్రి పేర్కొన్నారు.

రైతుల ప్రాధాన్యం పట్ల తమ ప్రభుత్వం కట్టుబడి ఉందని మంత్రి తెలిపారు. “గత ప్రభుత్వాలు వరి వేస్తే ఊరమని రైతులను నిరుత్సాహపరిచాయి. కానీ మా ప్రభుత్వం మాత్రం రైతులే వెన్నుముకగా భావిస్తోంది. ఆర్థిక ఇబ్బందులు ఉన్నప్పటికీ రైతుల భరోసాకు రూ. 12 వేలు అందిస్తోంది. భూమిలేని పేదలకూ మద్దతుగా ఈ పథకం కొనసాగుతుంది. దేశంలో ఎక్కడా లేని విధంగా పేదలకు ప్రత్యేక పథకాలు రూపొందించాం” అని వివరించారు.

మరి కొద్ది సంవత్సరాల్లో 20 లక్షల ఇళ్లను నిర్మిస్తామని పొంగులేటి శ్రీనివాసరెడ్డి తెలిపారు. “పేదల చిరు కోరికను నెరవేర్చడమే మా లక్ష్యం. వచ్చే జనవరి 26 న రైతు భరోసా కార్యక్రమం ప్రారంభమవుతుంది. పేద ప్రజలు, రైతుల సంక్షేమం కోసం మా ప్రభుత్వం అన్ని చర్యలు తీసుకుంటోంది” అని మంత్రి వ్యాఖ్యానించారు. మోడల్ హౌస్ ప్రారంభోత్సవం సందర్భంగా మంత్రి పేదల అభివృద్ధి పట్ల తమ ప్రభుత్వం ఎలా కట్టుబడి ఉందో వివరించారు. “ఇందిరమ్మ ఇళ్ల పథకం పేదల ఆకాంక్షలను నెరవేర్చడానికి గొప్ప ఉదాహరణ. పేద ప్రజల సంక్షేమం కోసం ప్రతి ఒక్కరికి సొంతింటిని కల్పించడం మా ప్రభుత్వ లక్ష్యం. ప్రజలు మా ప్రభుత్వంపై నమ్మకం ఉంచి మద్దతు ఇవ్వాలని కోరుతున్నాం” అని పొంగులేటి శ్రీనివాసరెడ్డి అన్నారు. ఇతర రాష్ట్రాలకు ఆదర్శంగా నిలిచేలా మోడల్ హౌస్ నిర్మాణం సాగింది. పేదవాడు సురక్షితమైన గూడు కలగడమే ఇందిరమ్మ పథకం ముఖ్య ఉద్దేశ్యమని మంత్రి అన్నారు.

Director Trinadha Rao Nakkina : నాగ్ హీరోయిన్ పై డైరెక్టర్ అభ్యంతరకర వ్యాఖ్యలు

Follow us