Telangana Forests : తెలంగాణ ల్లో 70 షూటింగ్స్ లొకేషన్లు రెడీ..!

Telangana Forest Movie Shoo

తెలంగాణలో పర్యాటక రంగం, ముఖ్యంగా సినీ పర్యాటకాన్ని ప్రోత్సహించేందుకు ప్రభుత్వం విప్లవాత్మక నిర్ణయం తీసుకుంది. రాష్ట్రంలోని పలు అటవీ ప్రాంతాలలో సినిమా షూటింగ్లకు అనుమతులు మంజూరు చేయాలని నిర్ణయించింది. ఈ మేరకు అటవీ శాఖ అధికారులు సినీ పరిశ్రమతో చర్చించి.. షూటింగ్లకు అనుకూలంగా ఉండే సుమారు 70 అటవీ ప్రాంతాలను గుర్తించారు. హైదరాబాద్ చుట్టుపక్కల ఉన్న 52 అర్బన్ ఫారెస్ట్ పార్కులను కూడా ఈ జాబితాలో చేర్చడం విశేషం.

సినిమా రంగాభివృద్ధిని దృష్టిలో ఉంచుకుని, ప్రభుత్వం ‘ఫిలిమ్స్ ఇన్ తెలంగాణ’ పేరుతో ఒక ప్రత్యేక వెబ్సైట్ను అందుబాటులోకి తెచ్చింది. ఈ సింగిల్ విండో విధానం ద్వారా సినిమా షూటింగ్లు, థియేటర్ల నిర్వహణకు సంబంధించిన అన్ని అనుమతులను సులభంగా పొందవచ్చు. ముఖ్యమైన అంశం ఏమిటంటే.. అటవీ ప్రాంతాలలో షూటింగ్ల కోసం దరఖాస్తు చేసుకున్న 24 గంటల్లోనే అనుమతులు మంజూరు కానున్నాయి. ఒకవేళ సాంకేతిక కారణాల వల్ల ఆలస్యమైనా షూటింగ్ షెడ్యూల్ ప్రకారం చిత్రీకరణ చేసుకునే వెసులుబాటును కల్పించారు.

షూటింగ్ల కోసం అనుమతి పొందిన ప్రాంతాల్లో వికారాబాద్, అమ్రాబాద్, నర్సాపూర్, వరంగల్, ఆదిలాబాద్ జిల్లాల్లోని దట్టమైన అడవులతో పాటు అనేక అర్బన్ ఫారెస్ట్ పార్కులు ఉన్నాయి. ముఖ్యంగా నారపల్లి నందనవనంలో జింకల ఎన్క్లోజర్, చిలుకూరు ఫారెస్ట్ ట్రెక్ పార్కు, కండ్లకోయ ఆక్సిజన్ పార్కు, మహబూబ్నగర్లోని మయూరి హరితవనం వంటి ప్రాంతాలు ప్రత్యేక ఆకర్షణగా నిలవనున్నాయి. ఈ లొకేషన్లలో షూటింగ్కు రోజుకు రూ.50 వేల చొప్పున ఫీజును ఫారెస్ట్ డెవలప్మెంట్ కార్పొరేషన్ (ఎఫ్డీసీ)కు ఆన్లైన్లో చెల్లించాల్సి ఉంటుంది.

‘ఆర్ఆర్ఆర్’ వంటి పెద్ద సినిమాలలో కొన్ని సన్నివేశాలు వికారాబాద్ అడవుల్లో చిత్రీకరించిన నేపథ్యంలో ఈ కొత్త విధానం సినీ పరిశ్రమకు గొప్ప ఊరటనిస్తుంది. హైదరాబాద్కు కేవలం 60 నుంచి 100 కిలోమీటర్ల దూరంలోనే అనేక అద్భుతమైన లొకేషన్లు అందుబాటులోకి రావడం, అద్భుతమైన రవాణా సౌకర్యాలు ఉండటం వల్ల నిర్మాతలకు ఖర్చు, సమయం గణనీయంగా ఆదా అవుతుంది. విభిన్నమైన, అద్భుతమైన లొకేషన్లు సులభంగా అందుబాటులోకి రావడంతో ఈ నిర్ణయం తెలంగాణలో సినీ రంగాభివృద్ధికి, తద్వారా పర్యాటక రంగానికి కొత్త ఉత్సాహాన్ని ఇవ్వనుంది. ఈ నూతన విధానం అమలు, సమన్వయం కోసం చార్మినార్ సీసీఎఫ్ ప్రియాంక వర్గీస్ను నోడల్ ఆఫీసర్గా నియమించారు.

Follow us