IND vs SA : మీరు ఉన్నప్పుడే కదా వైట్‌వాష్ ..అశ్విన్‌కు సునీల్ గవాస్కర్ అదిరిపోయే కౌంటర్!

దక్షిణాఫ్రికా టెస్టు సిరీస్ ఓటమిపై టీమిండియాపై విమర్శలు వెల్లువెత్తుతున్నాయి. ఈ నేపథ్యంలో విరాట్ కోహ్లి, రోహిత్ శర్మ, అశ్విన్ ఉంటే ఫలితాలు వేరేలా ఉండేవన్న వ్యాఖ్యలు బయట వినిపిస్తున్నాయి. ఇదే విషయాన్ని అశ్విన్ కూడా తన యూట్యూబ్ ఛానల్‌లో చెప్పాడు. అయితే అశ్విన్ చేసిన వ్యాఖ్యలకు సునీల్ గవాస్కర్ గట్టిగా బదులిచ్చారు. న్యూజిలాండ్, ఆస్ట్రేలియా సిరీస్‌ల ఓటములను గుర్తుచేస్తూ గవాస్కర్ కౌంటర్ అటాక్ చేశారు. అప్పుడు ఓడిపోయి ఇప్పుడు జట్టును గెలిపిస్తారని ఎలా చెప్తారంటూ ప్రశ్నించారు.

దక్షిణాఫ్రికాతో టెస్టు సిరీస్ ఓడిపోయిన తర్వాత టీమిండియాతో పాటు గౌతమ్ గంభీర్‌పై తీవ్ర స్థాయిలో విమర్శలు వస్తున్నాయి. భారత జట్టు అభిమానులతో పాటు మాజీ ఆటగాళ్లు కూడా విమర్శలు చేస్తున్నారు. ఈ క్రమంలో రవిచంద్రన్ అశ్విన్ చేసిన వ్యాఖ్యలపై, టీమిండియా లెజండ్రీ క్రికెటర్ సునీల్ గవాస్కర్ గట్టి కౌంటర్ ఇచ్చాడు.

హెడ్ కోచ్ గౌతమ్ గంభీర్ ఆధ్వర్యంలో టీమిండియా వైట్ బాల్ క్రికెట్ బాగానే సాగుతున్నా, రెడ్-బాల్ ఫార్మాట్‌లో మాత్రం దారుణంగా విఫమవుతోంది. దక్షిణాఫ్రికా చేతుల్లో 0 – 2 తేడాతో హోం సిరీస్ ఓటమి తర్వాత విమర్శలు వచ్చాయి. ముఖ్యంగా సెలెక్షన్ కమిటీ నిర్ణయాలు, సీనియర్లను పక్కన పెట్టిన తీరుపై పెద్ద చర్చ మొదలైంది.

టీమిండియా మాజీ క్రికెటర్ రవిచంద్రన్ అశ్విన్ తన యూట్యూబ్ ఛానల్‌లో మాట్లాడుతూ.. తాను, విరాట్ కోహ్లి, రోహిత్ శర్మ ముగ్గురం ఉండుంటే జట్టును సరిగా గైడ్ చేసేవాళ్లమని చెప్పాడు. ముగ్గురికి టీమ్ మేనేజ్‌మెంట్ తమ భవిష్యత్‌పై క్లారిటీ ఇవ్వలేదని తెలిపాడు. తాము ఉండుంటే ప్లేయర్లని మంచిగా నడిపించేవాళ్లమంటూ చెప్పుకొచ్చాడు.

ట్రాన్సిషన్‌కు ఒక సిస్టమ్ ఉండాలి. క్లారిటీ లేకపోతే ఆటగాళ్లు వ్యక్తిగత నిర్ణయాలు తీసుకుంటారు. కోహ్లీ కూడా ప్లేయర్స్‌ని గైడ్ చేయగలిగేవాడు, రోహిత్ కూడా, నేనూ చేయగలిగేవాడ్ని. ‘నాలెడ్జ్ ట్రాన్స్‌ఫర్’ మన బలమై ఉండాలి కానీ అలా జరగలేదు” అని అశ్విన్ వ్యాఖ్యానించాడు. అశ్విన్ చెప్పిన ఈ మాటల తర్వాత అభిమానులు కూడా “కోహ్లీ, రోహిత్, అశ్విన్ ఉండి ఉంటే దక్షిణాఫ్రికా సిరీస్ ఫలితాలు వేరేలా ఉండేవి” అని సోషల్ మీడియాలో స్పందించారు.

అయితే సీనియర్ క్రికెటర్ సునీల్ గవాస్కర్ మాత్రం అశ్విన్ మాటలను పూర్తిగా కొట్టిపారేశారు. “రిటైర్మెంట్ తీసుకోవడం వాళ్ల వ్యక్తిగత నిర్ణయమే. ఎవరికోసమో జట్టు విడిచి పెట్టలేదు. వాళ్లు ఉన్నప్పుడే న్యూజిలాండ్‌లో 0–3 తేడాతో ఓడిపోయాం. ఆస్ట్రేలియాలో కూడా ఫలితాలు మార్చలేకపోయారు. మరి ఇప్పుడు వాళ్లు ఉంటే సిరీస్ గెలిచేవాళ్లం అని ఎలా చెప్పగలం?” అని గవాస్కర్ ఓ ఇంటర్వ్యూలో చెప్పారు.