Shreyas Iyer: టీమిండియా వన్డే కెప్టెన్గా శ్రేయస్ అయ్యర్?!
ఈ సమావేశంలో రోహిత్ శర్మ, విరాట్ కోహ్లీలతో కూడా మాట్లాడి భవిష్యత్తు ప్రణాళికను సిద్ధం చేయనున్నట్లు నివేదికలోని వర్గాలు తెలిపాయి. వారిద్దరూ తీసుకునే నిర్ణయంపై చాలా విషయాలు ఆధారపడి ఉంటాయి.
- Author : Gopi
Date : 21-08-2025 - 3:53 IST
Published By : Hashtagu Telugu Desk
Shreyas Iyer: భారత క్రికెట్ జట్టు ప్రస్తుతం ఒక కీలకమైన మార్పు దశలో ఉంది. అజిత్ అగార్కర్ నేతృత్వంలోని సెలక్షన్ కమిటీ జట్టులో పెద్ద మార్పులు చేస్తోంది. ఈ క్రమంలో వన్డే జట్టు కెప్టెన్ను మార్చాలని జట్టు మేనేజ్మెంట్ యోచిస్తోంది. నివేదికల ప్రకారం.. రోహిత్ శర్మ (Rohit Sharma) స్థానంలో యువ ఆటగాడు బాధ్యతలు చేపట్టే అవకాశం ఉంది. అయితే ఆ ఆటగాడు శుభ్మన్ గిల్ (Shubman Gill) కాకుండా శ్రేయాస్ అయ్యర్ (Shreyas Iyer) అయ్యే అవకాశాలు ఉన్నాయని తెలుస్తోంది.
అభిషేక్ త్రిపాఠి నివేదిక ప్రకారం.. రోహిత్ స్థానంలో శ్రేయాస్ అయ్యర్ను భారత వన్డే జట్టుకు కొత్త కెప్టెన్గా నియమించే అవకాశం ఉంది. ఈ ప్రకటన ఆసియా కప్ ముగిసిన వెంటనే వెలువడవచ్చని తెలుస్తోంది. ఇటీవల జరిగిన ఆసియా కప్ కోసం ప్రకటించిన జట్టులో శుభ్మన్ గిల్ను టీ20 వైస్ కెప్టెన్గా నియమించారు. కొన్ని నెలల క్రితమే గిల్ను టెస్ట్ జట్టు కెప్టెన్గా కూడా ప్రకటించారు.
ఆసియా కప్ తర్వాత సమావేశం
నివేదిక ప్రకారం.. ఆసియా కప్ ముగిసిన తర్వాత భారత జట్టు మేనేజ్మెంట్ ఒక సమావేశం నిర్వహించనుంది. ఈ సమావేశంలో ఆస్ట్రేలియా సిరీస్లో అయ్యర్ జట్టును నడిపిస్తారా లేదా అనే దానిపై నిర్ణయం తీసుకుంటారు. ఈ సమావేశంలో రోహిత్ శర్మ, విరాట్ కోహ్లీలతో కూడా మాట్లాడి భవిష్యత్తు ప్రణాళికను సిద్ధం చేయనున్నట్లు నివేదికలోని వర్గాలు తెలిపాయి. వారిద్దరూ తీసుకునే నిర్ణయంపై చాలా విషయాలు ఆధారపడి ఉంటాయి. ఒకవేళ రోహిత్ రిటైర్మెంట్ గురించి ఆలోచిస్తే, శ్రేయాస్కు వెంటనే కెప్టెన్సీ అప్పగిస్తారు.
Also Read: Online Gaming Bill: లోక్సభలో ఆన్లైన్ గేమింగ్ బిల్లు ఆమోదం.. ప్రముఖ బెట్టింగ్ యాప్లపై నిషేధం?!
అయితే శుభ్మన్ గిల్కు కెప్టెన్సీ ఎందుకు ఇవ్వడం లేదనే దానిపై కూడా నివేదికలో స్పష్టత ఇచ్చారు. ఒక ఆటగాడిగా మూడు ఫార్మాట్లు ఆడటం వేరు. అదే మూడు ఫార్మాట్లలో కెప్టెన్గా ఆడటం వేరని ఆ వర్గాలు పేర్కొన్నాయి. చాలా బిజీ షెడ్యూల్ కారణంగా ఒక ఆటగాడు మూడు ఫార్మాట్లలో కెప్టెన్గా కొనసాగడం సాధ్యం కాదని ఆ వర్గాలు అభిప్రాయపడ్డాయి. గిల్ను టీ20ఐ వైస్ కెప్టెన్గా చూస్తున్నందున, భవిష్యత్తులో మూడు ఫార్మాట్లలో కెప్టెన్గా బాధ్యతలు నిర్వహించడం కష్టమవుతుంది.
శ్రేయాస్ అయ్యర్ ప్రదర్శన
శ్రేయాస్ అయ్యర్ ఇప్పటివరకు 70 వన్డే మ్యాచ్లు ఆడి 48.22 సగటుతో 2845 పరుగులు చేశారు. అతని స్ట్రైక్ రేట్ 100. ఇందులో ఐదు సెంచరీలు, 22 హాఫ్ సెంచరీలు ఉన్నాయి. అయ్యర్ ప్రపంచ కప్ 2023, ఛాంపియన్స్ ట్రోఫీ 2025లో అద్భుతమైన ప్రదర్శన కనబరిచారు. ప్రపంచ కప్ 2023లో 11 మ్యాచ్ల్లో 566 పరుగులు, ఛాంపియన్స్ ట్రోఫీ 2025లో ఐదు మ్యాచ్ల్లో 243 పరుగులు సాధించారు. ఈ ప్రదర్శనను దృష్టిలో పెట్టుకుని శ్రేయాస్కు కెప్టెన్సీ బాధ్యతలు అప్పగించే అవకాశం ఉందని తెలుస్తోంది.
Follow us
