Ind vs Eng : ఓవల్‌లో చరిత్ర సృష్టించిన టీమిండియా – 6 పరుగుల తేడాతో ఉత్కంఠభరిత విజయం

Ind vs Eng : లండన్‌లోని ఓవల్ మైదానం సోమవారం నరాలు తెగే ఉత్కంఠకు వేదికైంది. భారత్‌-ఇంగ్లాండ్ మధ్య జరిగిన చివరి టెస్టు రసవత్తర మలుపులతో సాగి, చివరికి టీమిండియా అద్భుత విజయాన్ని నమోదు చేసింది. సాధారణంగా ఇలాంటి మ్యాచ్‌లలో హోమ్‌ జట్టుకే అనుకూలంగా ఫలితం తేలుతుందని భావిస్తారు. ఈ సారి కూడా ఇంగ్లాండ్ సునాయాసంగా గెలిచేస్తుందని అందరూ అనుకున్నారు. కానీ భారత బౌలర్లు చివరి క్షణాల్లో చూపిన పోరాట స్పూర్తి సిరీస్‌ మొత్తాన్నే మార్చేసింది. చివరికి 6 పరుగుల తేడాతో భారత్ గెలవడం ద్వారా టెస్టుల చరిత్రలోనే అరుదైన రికార్డును సృష్టించింది.

మ్యాచ్ ఆరంభం నుంచే భారత బ్యాటర్లకు అనుకున్న రన్‌లు రావడం కష్టమైంది. టాస్ గెలిచిన భారత్ బ్యాటింగ్ ఎంచుకున్నప్పటికీ, ఇంగ్లాండ్ బౌలర్ల అద్భుత ప్రదర్శనకు తట్టుకోలేకపోయింది. కరుణ్ నాయర్ మాత్రమే 58 పరుగులతో ప్రతిఘటన చూపించాడు. మిగతా బ్యాటర్లు పెద్దగా రాణించలేకపోవడంతో భారత్ 224 పరుగులకే ఆలౌట్ అయింది.

తమ తొలి ఇన్నింగ్స్‌ను అగ్రెసివ్‌గా ప్రారంభించిన ఇంగ్లాండ్ కూడా ఒక దశలో ఆధిపత్యం చెలాయించినట్లు కనిపించింది. కానీ మధ్య దశలో భారత బౌలర్లు మ్యాచ్‌ను పూర్తిగా తారుమారు చేశారు. మొహమ్మద్ సిరాజ్, ప్రసిద్ధ్ కృష్ణ చెలరేగి చెరో నాలుగు వికెట్లు పడగొట్టారు. ఫలితంగా ఇంగ్లాండ్ 247 పరుగులకే ఆలౌట్ అయింది.

మొదటి ఇన్నింగ్స్‌లో వెనుకబడ్డ భారత్, రెండో ఇన్నింగ్స్‌లో బ్యాటింగ్ విభాగంతో సత్తా చాటింది. ఓపెనర్ యశస్వి జైస్వాల్ అద్భుత శతకంతో (118) రాణించాడు. అతనికి తోడుగా ఆకాశ్ దీప్ (66), రవీంద్ర జడేజా (53), వాషింగ్టన్ సుందర్ (53) అద్భుతంగా ఆడి జట్టుకు బలమైన స్కోరు అందించారు. 396 పరుగుల భారీ స్కోరుతో భారత్ ఇంగ్లాండ్‌కు కఠినమైన లక్ష్యం ఇచ్చింది.

రెండో ఇన్నింగ్స్‌లో ఇంగ్లాండ్ బలంగా ఆడింది. టాప్ ఆర్డర్ చక్కగా రాణించడంతో విజయానికి కేవలం 35 పరుగులు మాత్రమే అవసరమయ్యాయి. చేతిలో మూడు వికెట్లు ఉండటంతో, ఈ మ్యాచ్‌ను నాలుగో రోజే ముగిస్తుందని అందరూ భావించారు. కానీ వర్షం అంతరాయం కలిగించడంతో ఆట కొంతసేపు నిలిచిపోయింది. ఈ విరామం భారత బౌలర్లకు ఊపిరి పోశినట్టైంది.

వర్షం తర్వాత బరిలోకి దిగిన సిరాజ్ అద్భుతంగా బౌలింగ్ చేసి మ్యాచ్‌ను పూర్తిగా తారుమారు చేశాడు. కీలక సమయాల్లో వికెట్లు తీస్తూ ఇంగ్లాండ్‌ను ఒత్తిడిలోకి నెట్టాడు. చివరికి ఐదు వికెట్లు తీసి, ప్రసిద్ధ్ కృష్ణకు అద్భుత సహకారం అందించాడు. ఫలితంగా ఇంగ్లాండ్ 368 పరుగులకే ఆలౌట్ అయ్యింది.

ఈ విజయంతో భారత్ టెస్టు చరిత్రలో 6 పరుగుల తేడాతో గెలిచిన తొలి జట్టుగా నిలిచింది. టెస్టు ఫార్మాట్‌లో ఇంత తక్కువ తేడాతో గెలవడం అత్యంత అరుదైన విషయం. ఈ విజయంతో సిరీస్‌ను భారత్ సమం చేయడమే కాకుండా, యువ ఆటగాళ్ల ప్రతిభను ప్రపంచానికి చాటిచెప్పింది.

BJP : బీసీలకు 42% రిజర్వేషన్లకు బీజేపీ పూర్తి మద్దతు: రామచందర్ రావు