Mohammed Siraj: మహ్మద్ సిరాజ్ గంటకు 181.6 కిలోమీటర్ల వేగంతో బంతిని వేశాడా? నిజం ఇదే!
వాస్తవానికి ఈ మ్యాచ్‌లో సాంకేతిక లోపాలు కనిపించాయి. దీంతో మహ్మద్ సిరాజ్ వేసిన ఒక బంతి వేగం గంటకు 181.6 కిలోమీటర్లుగా కనిపించింది. 24వ ఓవర్ చివరి బంతికి అతని వేగం 181.6గా చూపింది.
- By Gopichand Published Date - 09:26 PM, Fri - 6 December 24
Mohammed Siraj: భారత్-ఆస్ట్రేలియా మధ్య ఐదు టెస్టు మ్యాచ్‌ల సిరీస్‌లో రెండో మ్యాచ్ అడిలైడ్ ఓవల్ వేదికగా జరుగుతోంది. ఈ డే-నైట్ టెస్ట్ మ్యాచ్‌లో టీమిండియా కెప్టెన్ రోహిత్ శర్మ టాస్ గెలిచి ముందుగా బ్యాటింగ్ ఎంచుకున్నాడు. అయితే ఈ మ్యాచ్‌లో టీమిండియా బ్యాట్స్‌మెన్‌ల పేల‌వ ప్ర‌ద‌ర్శ‌న‌తో టీమిండియా మొత్తం 180 పరుగులకే పరిమితమైంది. మొద‌టి రోజు ఆట ముగిసే సమయానికి ఆస్ట్రేలియా 1 వికెట్ కోల్పోయి 86 పరుగులు చేసింది. ఈ మ్యాచ్‌లో మహ్మద్ సిరాజ్ వార్త‌ల్లో నిలిచాడు.
సోషల్ మీడియాలో ట్రెండింగ్‌గా సిరాజ్
వాస్తవానికి ఈ మ్యాచ్‌లో సాంకేతిక లోపాలు కనిపించాయి. దీంతో మహ్మద్ సిరాజ్ (Mohammed Siraj) వేసిన ఒక బంతి వేగం గంటకు 181.6 కిలోమీటర్లుగా కనిపించింది. 24వ ఓవర్ చివరి బంతికి అతని వేగం 181.6గా చూపింది. దీని తర్వాత మహ్మద్ సిరాజ్ సోషల్ మీడియాలో హాట్ టాపిక్‌గా నిలిచాడు. భారత క్రికెట్ అభిమానులు ప్రముఖ ‘DSP సిరాజ్’ మీమ్‌లను షేర్ చేయ‌డం ప్రారంభించారు. అయితే వాస్తవానికి సిరాజ్ వేసిన బంతి అంత వేగం లేద‌ని తర్వాత తెలిసింది. సాంకేతిక లోపం కారణంగా వేగం త‌ప్పుగా చూపిన‌ట్లు ఆస్ట్రేలియా మీడియా పేర్కొంది.
Also Read: IMDb’s Most Popular Indian Stars of 2024 : 2024 టాప్ 10 మోస్ట్ పాపులర్ ఇండియన్ స్టార్స్ వీరే
సిరాజ్ మార్నస్ లాబుస్చాగ్నేతో వాగ్వాదం
ఈ ఓవర్‌లోనే మార్నస్ లాబుస్చాగ్నే, మహ్మద్ సిరాజ్ మధ్య వాగ్వివాదం చోటుచేసుకుంది. ఈ ఓవర్‌లో బీర్ పామును పట్టుకున్న అభిమాని సైట్ స్క్రీన్ దగ్గర పరుగెత్తాడు. దీని కారణంగా మార్నస్ లాబుస్చాగ్నే పరధ్యానంతో క్రీజు నుండి వైదొలిగాడు. లాబుస్చాగ్నే ఇలా చేయ‌టంతో బౌలింగ్ చేస్తున్న మహ్మద్ సిరాజ్ చాలా నిరాశగా కనిపించి స్టంప్స్‌ వైపు బంతిని విసిరాడు.
పటిష్ట స్థితిలో ఆస్ట్రేలియా
తొలి రోజు ఆట ముగిసే సమయానికి ఆస్ట్రేలియా 1 వికెట్ నష్టానికి 86 పరుగులు చేసింది. మార్నస్ లాబుషాగ్నే 20 పరుగులతో నాటౌట్‌గా వెనుదిరిగాడు. నాథన్ మెక్‌స్వీనీ 38 పరుగులు చేశాడు. ఆస్ట్రేలియా తరఫున స్టీవ్ స్మిత్, ట్రావిస్ హెడ్ ఇంకా బ్యాటింగ్‌కు రాలేదు. ఇలాంటి పరిస్థితుల్లో టీమిండియా పునరాగమనం చేయాలంటే బౌలర్లు మళ్లీ తమ సత్తా చాటాలి.
