ఆరావళి పర్వతాల పరిరక్షణపై ఆందోళన.. సుప్రీంకోర్టు తీర్పుతో 100 గ్రామాలపై ముప్పు!

Aravalli

Aravalli: ఉత్తర భారతదేశానికి సహజ రక్షణ కవచంగా భావించే ఆరావళి పర్వత శ్రేణుల విషయంలో ప్రస్తుతం దేశవ్యాప్తంగా తీవ్ర చర్చ జరుగుతోంది. సుప్రీంకోర్టు వెలువరించిన ఒక తీర్పు తర్వాత రాజస్థాన్, హర్యానా, ఢిల్లీ సహా ఉత్తర భారతం అంతటా ఆందోళనలు వ్యక్తమవుతున్నాయి. దీనివల్ల హర్యానా, రాజస్థాన్‌లలోని సుమారు 6 జిల్లాలకు చెందిన 100కు పైగా గ్రామాల మనుగడ ప్రమాదంలో పడింది.

వివాదం ఏమిటి?

100 మీటర్ల కంటే తక్కువ ఎత్తు ఉన్న పర్వతాలను మైనింగ్ కోసం అనుమతించాలని సుప్రీంకోర్టు తీర్పునిచ్చింది. ఈ నిర్ణయంతో ఆరావళి పర్వతాలను కాపాడుకోవాలంటూ ప్రజలు పెద్ద ఎత్తున నిరసనలు మొదలుపెట్టారు. మేవాత్, నుహ్, రాజస్థాన్‌లోని పలు ప్రాంతాల్లో ఆందోళనలు జరుగుతున్నాయి. ప్రస్తుతం ఈ తీర్పుపై పునఃసమీక్షా పిటిషన్ దాఖలైంది.

ప్రభావితమవుతున్న గ్రామాలు

ఢిల్లీ నుండి బయలుదేరిన పరిశీలన బృందం ఫరీదాబాద్‌లోని సూరజ్ కుండ్ మీదుగా హర్యానాలోని నుహ్ జిల్లాకు చేరుకుంది. ఇక్కడ సుమారు 60 గ్రామాలు కోర్టు తీర్పు వల్ల ప్రభావితం కానున్నాయి.

సత్తావారి గ్రామం (నుహ్): ఇక్కడ 100 మీటర్ల కంటే తక్కువ ఎత్తు ఉన్న పర్వతాలు 6 ఉండగా, 50కి పైగా గుట్టలు ఉన్నాయి. ఇక్కడి సుమారు 5,000 జనాభాపై మైనింగ్ ప్రభావం పడనుంది. దాదాపు 2,000 మంది నేరుగా పర్వతం పైన నివసిస్తూ జీవనం సాగిస్తున్నారు. మైనింగ్ జరిగితే వీరి ఇళ్లు నేలమట్టం కావడం ఖాయం.

Also Read: ఢిల్లీ క్యాపిటల్స్ కొత్త కెప్టెన్‌గా జెమీమా రోడ్రిగ్స్!

నాగల్ ముబారక్‌పూర్ (మేవాత్): ఈ గ్రామం జనాభా 6,000. ఇందులో సుమారు 2,000 నుండి 3,000 మంది పర్వతం మీదే ఉంటున్నారు. అంటే 200 నుండి 250 ఇళ్లు కొండపైనే ఉన్నాయి. ఈ పర్వతం ఎత్తు కేవలం 70 మీటర్లు మాత్రమే. తమ ఆశ్రయం కోల్పోతామని తెలిసి ఈ ప్రజలు ఆందోళన చెందుతున్నారు.

ప్రభావిత ప్రాంతాల జాబితా

సుప్రీంకోర్టు తీర్పు ప్రభావం హర్యానా, రాజస్థాన్‌లోని సుమారు 100 గ్రామాలపై పడనుంది. ప్రధానంగా నుహ్ పరిసర ప్రాంతాల్లో సుమారు 40 గ్రామాలపై ప్ర‌భావం ప‌డ‌నుంది. రాజస్థాన్ సరిహద్దు ప్రాంతాలైన‌ తిజారా, ఖైర్తల్, కిషన్‌గఢ్‌వాస్, అల్వార్, జుర్హేడా, నగర్, పహాడీ, గోపాల్‌గఢ్, కామాన్ వంటి ప్రాంతాల్లోని 60కి పైగా గ్రామాలు ప్ర‌భావితం కానున్నాయి. ప్రకృతికి రక్షణగా ఉన్న ఆరావళి పర్వతాలను మైనింగ్ పేరుతో నాశనం చేయడం వల్ల పర్యావరణ సమతుల్యత దెబ్బతినడమే కాకుండా వేలాది మంది ప్రజలు నిరాశ్రయులయ్యే అవకాశం ఉంది.

Follow us