టీమిండియాపై రాహుల్ ద్ర‌విడ్ కీల‌క వ్యాఖ్య‌లు!

Rahul Dravid

Rahul Dravid: టీమ్ ఇండియాకు 2024 టీ20 వరల్డ్ కప్ టైటిల్‌ను అందించిన మాజీ హెడ్ కోచ్ రాహుల్ ద్రవిడ్ ఐసీసీ టీ20 వరల్డ్ కప్ 2026 గురించి ఒక పెద్ద జోస్యం చెప్పారు. ఒకవేళ భారత్‌తో పాటు జింబాబ్వే జట్టు ఫైనల్‌కు చేరుకుంటే అది క్రికెట్‌కు చాలా మంచిదని ఆయన అభిప్రాయపడ్డారు. ఫలితం ఏదైనా సరే టీమ్ ఇండియా తన గేమ్ ప్లాన్‌కు కట్టుబడి ఉండాలని ఆయన సూచించారు. సూర్యకుమార్ యాదవ్ నేతృత్వంలోని భారత జట్టు ఆదివారం (ఫిబ్రవరి 22) అహ్మదాబాద్‌లో సౌత్ ఆఫ్రికాతో తలపడడం ద్వారా తన సూపర్-8 ప్రయాణాన్ని ప్రారంభించనుంది.

రాహుల్ ద్రవిడ్ ఇంటర్వ్యూ విశేషాలు

ద్రవిడ్ ఓ ప్ర‌ముఖ ఛానెల్‌తో మాట్లాడుతూ ఇలా అన్నారు. భారత జట్టుకు ఉన్న అతిపెద్ద బలం ఏమిటంటే మనం కేవలం ఒకటి లేదా ఇద్దరు ఆటగాళ్లపైనే ఆధారపడటం లేదు. మన జట్టులో మంచి లోతు ఉంది. కాబట్టి ఆ లోతు సమయానికి ఆదుకుంటుందని ఆశించవచ్చు. టీ20 క్రికెట్‌లో అనిశ్చితి ఎక్కువగా ఉంటుంది. ఇది ఆటలో అత్యంత అస్థిరమైన ఫార్మాట్. నేను కోచ్‌గా ఉన్నప్పుడు నేర్చుకున్న విషయం ఏమిటంటే ఏ రోజైనా మనం ఓడిపోయే అవకాశం ఉంటుంది. కాబట్టి ప్రక్రియ మీద దృష్టి పెట్టండి. మీ వంతు ప్రయత్నం చేయండి. మంచి జరుగుతుందని ఆశించండి అని పేర్కొన్నారు.

Also Read: ఇరాన్‌లో ఉద్రిక్తతలు .. భారతీయులు తక్షణమే దేశం విడిచి రావాలి : ఎంబసీ హెచ్చరిక

ద్రవిడ్ ఇంకా కొనసాగిస్తూ.. ఫైనల్‌లో భారత్ వర్సెస్ ఏదైనా జట్టు ఉన్నా నాకు ఓకే. భారత్ వర్సెస్ జింబాబ్వేనా? అది జింబాబ్వే క్రికెట్‌కు అద్భుతమైన క్షణం అవుతుంది. ఒకవేళ జింబాబ్వే ఫైనల్‌కు చేరుకుంటే అది అద్భుతంగా ఉంటుంది. భారత్‌తో పాటు ఏదైనా చిన్న జట్టు ఫైనల్‌కు రావాలని నేను కోరుకుంటున్నాను. అది చూడటానికి చాలా బాగుంటుంది అని అన్నారు.

అసోసియేట్ జట్లపై ద్రవిడ్ ఏమన్నారంటే?

ఈ టీ20 వరల్డ్ కప్‌లో తనను బాగా ఆకట్టుకున్న అంశం గురించి ద్రవిడ్ స్పందిస్తూ.. “చాలా అసోసియేట్ జట్లు అద్భుతమైన క్రికెట్ ఆడటం ఈ వరల్డ్ కప్‌లో ప్రత్యేకత. అసోసియేట్ దేశాల్లో ఇంతటి ప్రతిభ ఉండటం చూడటం సంతోషంగా ఉంది. అన్ని జట్లు మంచి ప్రదర్శన ఇచ్చాయి. వాటిలో కొన్ని సూపర్-8కు అర్హత సాధించలేకపోయి ఉండవచ్చు. ఈ ఫార్మాట్‌లో అది ఎప్పుడూ కష్టమే. అయినప్పటికీ వారు అత్యుత్తమ ఆటను ప్రదర్శించి, తమ వద్ద మంచి యువ ప్రతిభ ఉందని నిరూపించుకున్నారు” అని కొనియాడారు.

Follow us