Oil purchases : అమెరికా బెదిరింపులను లెక్కచేయని భారత రిఫైనరీలు

Oil purchases : అంతర్జాతీయ చమురు మార్కెట్‌లో భారత్‌ చేపడుతున్న వ్యూహాత్మక నిర్ణయాలు మరోసారి చర్చనీయాంశంగా మారాయి. ఇటీవల రష్యా నుండి భారత్‌ చేపడుతున్న చమురు దిగుమతులపై అమెరికా తీవ్ర అసంతృప్తి వ్యక్తం చేసిన విషయం తెలిసిందే. ఈ అసంతృప్తిని చాటిస్తూ అమెరికా అధ్యక్షుడు డొనాల్డ్ ట్రంప్ భారత్‌పై 25 శాతం అదనపు సుంకాలు కూడా విధించారు. అయినప్పటికీ భారత ప్రభుత్వం మరియు దేశీయ ఆయిల్ కంపెనీలు ఈ ఆంక్షలను పెద్దగా పట్టించుకోకుండా తమ వ్యాపార ఉద్దేశాలను కొనసాగిస్తున్నాయి. రష్యాతో మైత్రి సంబంధాల నేపథ్యంలో భారత్ చమురు కొనుగోళ్లను మరింతగా పెంచుతుంది. దీనితో రష్యా కూడా చమురుకు తగ్గింపు ధరను ఆఫర్ చేస్తూ భారత్‌కు గణనీయమైన మేలు కలిగిస్తోంది. బ్రెంట్‌ చమురు ధరతో పోలిస్తే రష్యా అందిస్తున్న ఉరల్స్‌ గ్రేడ్‌ చమురు బ్యారెల్‌కు 3 నుండి 4 డాలర్ల తక్కువ ధరకు లభిస్తోంది. ఈ తగ్గింపు ధరలు సెప్టెంబర్‌ చివరి వారం నుంచి అక్టోబర్‌ నెలలో జరగనున్న కొనుగోళ్లకు వర్తించనున్నట్లు సమాచారం.

Read Also: TG High Court : కేసీఆర్, హరీశ్ రావులకు ఊరట..కాళేశ్వరం నివేదిక ఆధారంగా చర్యలు వద్దన్న హైకోర్టు

ఒక ప్రముఖ అంతర్జాతీయ మీడియా సంస్థ వెల్లడించిన వివరాల ప్రకారం, ఇటీవల జరిగిన చమురు ఒప్పందాల్లో బ్యారెల్‌కు సుమారు 2.5 డాలర్ల డిస్కౌంట్‌ భారత్‌కు లభించింది. ఈ ఆఫర్లు ప్రధానంగా రష్యా ప్రభుత్వం అనుమతించిన ప్రైవేట్ గ్రిడ్‌ ద్వారా అందుతున్నాయి. దీని ద్వారా భారత ఆయిల్ కంపెనీలు అంతర్జాతీయ మార్కెట్‌తో పోలిస్తే తక్కువ ఖర్చుతో అధిక మోతాదులో చమురు నిల్వలు పెంచుకునే అవకాశాన్ని వినియోగించుకుంటున్నాయి. ప్రస్తుతం భారత్‌ దిగుమతుల్లో రష్యా వాటా అత్యధికంగా 31.4 శాతంగా ఉంది. తరువాతి స్థానాల్లో ఇరాక్‌ (17.1%), సౌదీ అరేబియా (16.1%), యునైటెడ్‌ అరబ్‌ ఎమిరేట్స్‌ (11.8%) ఉన్నాయి. గతంలో అమెరికా మరియు గల్ఫ్ దేశాలపై అధికంగా ఆధారపడిన భారత్‌ ఇప్పుడు చమురు సరఫరా దృక్పథంలో స్పష్టమైన మార్పులు చేస్తోంది.

ఉరల్స్‌ గ్రేడ్‌ చమురు రష్యా నుండి ఎగుమతి అయ్యే ముఖ్యమైన రకం. ఇది అధిక సల్పర్‌ కంటెంట్ కలిగి ఉండి, శుద్ధి ప్రక్రియలో కాస్త ఎక్కువ ఖర్చు అయ్యే అవకాశమున్నా, ధర పరంగా కలిగే లాభాలను దృష్టిలో ఉంచుకుని భారత ఆయిల్ కంపెనీలు దీన్ని ప్రాధాన్యంగా ఎంచుకుంటున్నాయి. సముద్ర మార్గం ద్వారా ఉరల్స్‌ చమురును అధికంగా దిగుమతి చేసుకొంటున్న దేశాల జాబితాలో భారత్‌ అగ్రస్థానంలో ఉంది. ఈ పరిణామాలపై నిపుణులు అభిప్రాయపడుతూ..భారత్‌ తన దేశ ప్రయోజనాలను ప్రథమంగా పరిగణిస్తూ ఇంధన అవసరాలను తీర్చుకునే విధంగా వ్యూహాత్మక నిర్ణయాలు తీసుకుంటోంది. ఈ నేపథ్యంలో అమెరికా అభ్యంతరాలను సైతం భారత్‌ పరిగణనలోకి తీసుకుంటున్నప్పటికీ, ప్రత్యామ్నాయ వ్యాపార అవకాశాలను వదులుకోవడం లేదు అని పేర్కొన్నారు. ఈ తత్వదృష్టి వలన భారత్‌ స్థిరమైన ఇంధన సరఫరా మరియు అధిక లాభదాయకతను సాధించగలుగుతోందని తెలుస్తోంది. కాగా, రాబోయే రోజుల్లో అమెరికా-భారత్‌ మధ్య వాణిజ్య సంబంధాలపై ఈ చమురు వ్యవహార ప్రభావం పడే అవకాశం ఉందని పరిశీలకులు చెబుతున్నారు.

 Read Also: PM Modi : భారత్ తయారు చేసిన చిన్న చిప్ ప్రపంచాన్ని మార్చే శక్తి కలిగి ఉంది: ప్రధాని మోడీ