Brahmaji : అందుకే.. ఇంతకాలం పాటు నేను ఇండస్ట్రీలో ఉండగలిగా

Brahmaji : టాలీవుడ్‌లో ఎన్నో విభిన్నమైన పాత్రలు పోషించి ప్రేక్షకుల మనసులు గెలుచుకున్న బ్రహ్మాజీ, తన అనుభవాన్ని, ఇండస్ట్రీలో మారుతున్న పరిస్థితులను తాజాగా ‘హిట్ టీవీ’కు ఇచ్చిన ఇంటర్వ్యూలో పంచుకున్నారు. దశాబ్దాలుగా సినీ పరిశ్రమలో కొనసాగుతున్న ఆయన, ఇప్పటికీ బిజీగా ఉంటూ ప్రేక్షకులను అలరిస్తున్నారు.

హీరో అవ్వాలనే ఆలోచనతో ఇండస్ట్రీలోకి రాలేదు
తన సినీ ప్రయాణం గురించి చెప్పిన బ్రహ్మాజీ, “నేను హీరో కావాలనే ఆశతో ఇండస్ట్రీలోకి రాలేదు. అందుకే నా కెరీర్ గురించి ఎప్పుడూ అసంతృప్తిగా అనుకోలేదు. ఒకప్పుడు కొన్ని పాత్రలు నాకోసమే అని భావించి, నన్నే ఎంచుకునేవారు. అలాంటి పాత్రల కోసం ప్రయత్నించినప్పుడు, కొన్నిసార్లు కొంత ఇబ్బంది ఎదురైనా భరించేవారు. కానీ ఇప్పుడు పరిస్థితి పూర్తిగా మారిపోయింది. మనం అందుబాటులో లేకపోతే, మరో నలుగురు ఆర్టిస్టుల పేర్లు ముందుగానే లిస్ట్‌లో పెడతారు,” అంటూ సినీ పరిశ్రమలో జరిగిన మార్పులను వివరించారు.

Indiramma Housing Scheme Rules : ఇందిరమ్మ ఇండ్ల నిర్మాణానికి నిబంధనలు

 సక్సెస్ రహస్యం
తన నటనా జీవితంలో ఎంతో కాలం కొనసాగడానికి గల కారణాలను చెబుతూ, “బ్రహ్మాజీ బాగా నటిస్తాడు, సరదాగా ఉంటాడు, ఎవరితోనూ గొడవలు పెట్టుకోడు, సమయానికి వస్తాడు, నవ్వుతూ సెట్‌లో ఉండి, నవ్వుతూ వెళ్లిపోతాడు… అనే ఓ గుర్తింపును నేను సంపాదించుకున్నాను. అదే నా కెరీర్‌ను ఇంతకాలం కొనసాగించేందుకు సహాయపడింది. దర్శకులు, నిర్మాతలు కూడా నన్ను గౌరవిస్తూ నాతో పని చేసుకోవడానికి ఆసక్తి చూపించారు. నేను ఎవరైనా హర్ట్ చేస్తే, ఆ విషయాన్ని అప్పటికప్పుడే చెప్పేస్తా. ఏదైనా చెప్తే దాన్ని చిన్న విషయంగా తీసుకుని నవ్వుతూ వదిలేయడంలో నేను నమ్మకం పెట్టుకోను,” అని స్పష్టంగా చెప్పుకొచ్చారు.

ఇండస్ట్రీలో కొత్తగా చోటుచేసుకుంటున్న మార్పుల గురించి ప్రస్తావిస్తూ, “ఇటీవల ఒక తెలుగు సినిమా చూశాను. అందులో ప్రధానమైన పాత్రలన్నీ తమిళ, మలయాళ, హిందీ నటులతో చేయించారు. తెలుగువాళ్లకు మాత్రం చిన్నచిన్న పాత్రలే ఇచ్చారు. దాన్ని చూసినప్పుడు చాలా బాధ వేసింది. అలా చేస్తే, అటువంటి సినిమాను ఇక్కడ డబ్ చేసుకోవచ్చు గదా అనిపించింది. అందుకే నేను ఇటీవల తెలుగు నటులకు తగిన అవకాశాలు ఇవ్వాలని కోరుతూ మాట్లాడాను” అని బ్రహ్మాజీ తెలిపారు. సినీ పరిశ్రమలో అనుభవజ్ఞుడిగా కొనసాగుతున్న బ్రహ్మాజీ, తన ప్రస్థానం, నటనకు న్యాయం చేసే విధంగా అవకాశాలు కల్పించడం గురించి చెప్పిన ఈ విషయాలు, సినీ ప్రేమికులకు ఆలోచన కలిగించేలా ఉన్నాయి.

Jagan : జగన్ ఇంటివద్ద పోలీస్ సెక్యూరిటీ