బ్యాంకు మోసాలకు ఇక చెక్.. ఆర్బీఐ కొత్త నిబంధనలు ఇవే!

RBI New Rules

RBI New Rules: తరచుగా బ్యాంక్ ఉద్యోగులు తమ టార్గెట్లను పూర్తి చేయడం కోసం కస్టమర్లకు అవసరం లేని పథకాలను విక్రయిస్తుంటారు. ఉదాహరణకు ఫిక్స్‌డ్ డిపాజిట్ (FD) చేయడానికి వెళ్లిన కస్టమర్‌కు బలవంతంగా ఇన్సూరెన్స్ పాలసీని అంటగట్టడం, క్రెడిట్ కార్డ్ ప్రయోజనాల గురించి అబద్ధాలు చెప్పడం లేదా దాచిన ఛార్జీల గురించి వివరించకపోవడం వంటివి జరుగుతుంటాయి. అలాగే ప్రమాదకరమైన ఇన్వెస్ట్‌మెంట్ ప్లాన్‌లను ‘గ్యారెంటీ రిటర్న్స్’ వస్తాయని ఆశ చూపి అమ్ముతుంటారు.

దీనిని అరికట్టడానికి ఆర్బీఐ ఒక కొత్త డ్రాఫ్ట్‌ను విడుదల చేసింది. దీని ప్రకారం.. ఇకపై బ్యాంకులు మీకు ఎలాంటి స్కీమ్‌ను లేదా పాలసీని తప్పుడు పద్ధతిలో లేదా అబద్ధాలు చెప్పి విక్రయించలేవు. ఒకవేళ అలా చేస్తే వారు భారీ మూల్యాన్ని చెల్లించుకోవాల్సి ఉంటుంది.

ఇకపై బ్యాంకులు ఏమి చేయాలి?

ఇప్పటి వరకు బ్యాంకులు ఏదైనా తప్పుడు ఉత్పత్తిని విక్రయిస్తే ఫిర్యాదు కోసం కస్టమర్లు కార్యాలయాల చుట్టూ తిరగాల్సి వచ్చేది. కానీ జూలై 1, 2026 నుండి అమల్లోకి రానున్న నిబంధన ప్రకారం.. ఒక ఉత్పత్తిని తప్పుడు పద్ధతిలో విక్రయించినట్లు రుజువైతే బ్యాంక్ కస్టమర్ పూర్తి డబ్బును తిరిగి ఇచ్చేయాలి. ఇందులో బ్యాంక్ ఎటువంటి క్యాన్సిలేషన్ ఛార్జీలు లేదా ప్రాసెసింగ్ ఫీజులను మినహాయించుకోవడానికి వీలుండదు.

Also Read: ఆస్ట్రేలియాకు భారీ షాక్ ఇచ్చిన జింబాబ్వే!

నష్ట పరిహారం

కేవలం డబ్బు తిరిగి ఇవ్వడం మాత్రమే సరిపోదు. ఆ తప్పుడు ఉత్పత్తి కారణంగా కస్టమర్‌కు ఏదైనా ఆర్థిక నష్టం జరిగితే (ఉదాహరణకు: ఇతర చోట్ల పెట్టుబడి పెట్టలేకపోవడం వల్ల వచ్చిన నష్టం లేదా వడ్డీ నష్టం), బ్యాంక్ ఆ నష్టాన్ని కూడా భరించాలి.

బ్యాంకుల బాధ్యత పెరిగింది

ఈ కొత్త నిబంధన ప్రకారం.. బ్యాంకులు కస్టమర్ అవసరాలను, వారి ఆర్థిక స్థితిని అర్థం చేసుకున్న తర్వాతే ఏదైనా ఉత్పత్తిని విక్రయించాలి. ఆ ఉత్పత్తిలోని నష్టాల గురించి స్పష్టంగా వివరించాలి. ఒకవేళ బ్యాంక్ ఏజెంట్ లేదా థర్డ్-పార్టీ సంస్థ తప్పు చేసినా దాని పూర్తి బాధ్యత బ్యాంకుదే అవుతుంది.

ఎప్పటి నుండి అమలు అవుతుంది?

ఈ నిబంధనను జూలై 1, 2026 నుండి అమలు చేయాలని ప్రతిపాదించారు. బ్యాంకులు, ప్రజల నుండి అభిప్రాయాలను సేకరించడానికి ఆర్బీఐ ప్రస్తుతం ఈ డ్రాఫ్ట్‌ను విడుదల చేసింది. ఈ నిబంధన అమల్లోకి వస్తే బ్యాంకుల ఇష్టారాజ్యం అంతమవుతుంది. టార్గెట్ల పేరుతో కస్టమర్లను మోసం చేసే ఆటకు బ్రేక్ పడుతుంది. ఇకపై బ్యాంక్ ఉద్యోగులు “సార్, ఈ స్కీమ్ తీసుకోండి.. చాలా లాభం ఉంటుంది” అని చెప్పేముందు వంద సార్లు ఆలోచించాల్సి ఉంటుంది.

Follow us