TDP-JSP-BJP: రెండు రోజుల్లో తేలనున్న టీడీపీ-జేఎస్పీ-బీజేపీ సీట్ల పంపకాలు

TDP-JSP-BJP

TDP-JSP-BJP: మహాకూటమి భాగస్వామ్య పక్షాలైన టీడీపీ-జనసేన-బీజేపీల మధ్య సీట్ల పంపకాల వివరాలు రెండు రోజుల్లో వెల్లడిస్తానని బీజేపీ రాష్ట్ర అధ్యక్షురాలు దగ్గుబాటి పురందేశ్వరి తెలిపారు. వచ్చే ఎన్నికల్లో వైఎస్సార్‌సీపీని ఓడించడమే లక్ష్యంగా మూడు పార్టీలు కూటమిగా ఏర్పడ్డాయన్నారు. రాష్ట్ర పార్టీ కార్యాలయంలో బీజేపీ ఎన్నికల ప్రచార వాహనాలను జెండా ఊపి ప్రారంభించిన అనంతరం ఆమె మీడియాతో మాట్లాడారు.

బీజేపీ జాతీయ నాయకత్వం నిర్ణయానికి రాష్ట్ర పార్టీ కట్టుబడి ఉంటుందని పురంధేశ్వరి తెలిపారు. రాష్ట్రంలో ఏ నియోజకవర్గం నుంచి పోటీ చేస్తారనే దానిపై త్వరలోనే స్పష్టత వస్తుందని, రెండు రోజుల్లో మీడియాకు వివరాలు వెల్లడిస్తానని ఆమె చెప్పారు. పార్టీ ప్రచార వాహనాలను ఆమె ప్రస్తావిస్తూ.. దేశంలో 10 ఏళ్ల బీజేపీ పాలనపై బీజేపీ క్యాడర్ ప్రజలకు వివరిస్తామన్నారు. రాష్ట్ర, జాతీయ బీజేపీ మేనిఫెస్టోల తయారీ కోసం ప్రజల అభిప్రాయాలను సేకరించాలని నిర్ణయించినట్లు ఆమె తెలిపారు. ప్రచార వాహనాల్లో ఒకటి రాష్ట్ర మేనిఫెస్టో, మరొకటి కేంద్ర మేనిఫెస్టో కోసం రెండు వేర్వేరు బాక్సులను ఏర్పాటు చేస్తామని, ప్రజలు అభిప్రాయ సేకరణ కార్యక్రమంలో పాల్గొనవచ్చని ఆమె తెలిపారు.

రాష్ట్ర, కేంద్ర ప్రభుత్వాల నుంచి తాము ఏమి ఆశిస్తున్నామో ప్రజలు తమ అభిప్రాయాన్ని తెలియజేయవచ్చని, ప్రజల ఆకాంక్షల ఆధారంగా బీజేపీ రెండు మేనిఫెస్టోలను రూపొందిస్తుందని ఆమె అన్నారు. రాష్ట్ర మేనిఫెస్టో కమిటీ రెండుసార్లు సమావేశాలు ఏర్పాటు చేసి మేనిఫెస్టోను రూపొందించిందని ఆమె గుర్తు చేశారు. దేశవ్యాప్తంగా కోటి మంది ప్రజల నుంచి అభిప్రాయాలు తీసుకోవడమే బీజేపీ లక్ష్యమని ఆమె చెప్పారు.

రాబోయే ఐదేళ్లలో కేంద్రంలోని బీజేపీ ప్రభుత్వం ఏం చేస్తుందో ఎన్నికల ప్రచార బృందాలు ప్రజలకు వివరిస్తాయని, మేనిఫెస్టో తయారీకి సంబంధించి 45 వేల కుటుంబాలను కలుస్తామని, వారి అభిప్రాయాలను తెలుసుకునేందుకు బీజేపీ కేడర్‌ను సిద్ధం చేస్తామని పురంధేశ్వరి తెలిపారు. కార్యక్రమంలో బీజేపీ రాష్ట్ర ప్రధాన కార్యదర్శి బిట్ర శివన్నారాయణ, బీజేపీ కోర్ కమిటీ సభ్యుడు చంద్రమౌళి, బీజేపీ మీడియా రాష్ట్ర ఇంచార్జి పాతూరి నాగభూషణం, మైనారిటీ మోర్చా రాష్ట్ర అధ్యక్షుడు షేక్ బాజీ తదితరులు పాల్గొన్నారు. మూడు పార్టీల పొత్తు ఖరారు కావడంతో రాష్ట్రంలో మూడు పార్టీలు ప్రచారాన్ని ముమ్మరం చేయనున్నాయి.

Also Read: Mudragada Padmanabham: వైసీపీలోకి ముద్రగడ చేరికకు టైం ఫిక్స్

Follow us