అంతరిక్షంలో చైనా ఆధిపత్యం పెరుగుతుందా?
భారతదేశానికి స్వంత అంతరిక్ష కేంద్రం ఉండటం వల్ల కలిగే అతిపెద్ద ప్రయోజనం ఏమిటంటే.. మనం ఏ ప్రయోగం చేయాలన్నా ఇతర దేశాలపై ఆధారపడాల్సిన అవసరం ఉండదు.
- Author : Gopichand
Date : 07-02-2026 - 10:18 IST
Published By : Hashtagu Telugu Desk
China Space: గత 25 ఏళ్లుగా మానవాళికి అంతరిక్ష నివాసంగా ఉన్న అంతర్జాతీయ అంతరిక్ష కేంద్రం (ISS) ఇప్పుడు తన చివరి ప్రయాణానికి సిద్ధమవుతోంది. 2030 నాటికి ఈ భారీ ప్రయోగశాల భూమికి తిరిగి రానుంది. దీనిని సురక్షితంగా కూల్చివేసే బాధ్యతను నాసా (NASA), ఎలాన్ మస్క్ నేతృత్వంలోని స్పేస్ఎక్స్ (SpaceX) సంస్థకు అప్పగించింది. ఒక ప్రత్యేక నౌక ద్వారా దీనిని పసిఫిక్ మహాసముద్రంలోని మనుషులకు, భూభాగానికి అత్యంత దూరంగా ఉండే ‘పాయింట్ నెమో’ అనే ప్రాంతంలో పడేలా చేస్తారు. ISS ముగింపు అనేది కేవలం ఒక యంత్రం అంతం మాత్రమే కాదు, ప్రపంచ శాస్త్రవేత్తలను ఏకం చేసిన ఒక శాంతియుత అంతర్జాతీయ సహకార యుగానికి ముగింపు.
అంతరిక్షంలో చైనా ఆధిపత్యం పెరుగుతుందా?
ISS సేవలు నిలిచిపోయిన తర్వాత భూకక్ష్యలో చైనాకు చెందిన ‘తియాంగాంగ్’ మాత్రమే ఏకైక ప్రభుత్వ అంతరిక్ష కేంద్రంగా మిగిలిపోనుంది. అయితే అమెరికా ఇప్పుడు పూర్తిగా ప్రైవేట్ కంపెనీలపై విశ్వాసం ఉంచుతోంది. జెఫ్ బెజోస్కు చెందిన ‘బ్లూ ఒరిజిన్’,‘ఆక్సియమ్ స్పేస్’ వంటి సంస్థలు తమ స్వంత స్టేషన్లను నిర్మించే పనిలో ఉన్నాయి. రాబోయే కాలంలో అంతరిక్ష కేంద్రాలు ఒక బిజినెస్ మోడల్లా మారనున్నాయి. అక్కడ ప్రభుత్వాలు కేవలం తమ వ్యోమగాములను పంపడానికి ఈ కంపెనీల సేవలను అద్దెకు తీసుకుంటాయి. దీనితో పాటు ఇప్పుడు ప్రపంచ దేశాల దృష్టి చంద్రునిపై బేస్ క్యాంప్ల ఏర్పాటుపై పడింది. ఇక్కడ అమెరికా, చైనా మధ్య గట్టి పోటీ నెలకొనే అవకాశం ఉంది.
Also Read: టీమిండియాకు చెమటలు పట్టించిన యూఎస్ఏ!
ఇస్రో (ISRO) చేస్తున్న భారీ ఏర్పాట్లు ఏమిటి?
చైనా ఆధిపత్యానికి సవాలు విసిరేందుకు భారత్ కూడా సర్వసన్నద్ధంగా ఉంది. భారత అంతరిక్ష పరిశోధనా సంస్థ (ఇస్రో) 2035 నాటికి తన స్వంత ‘భారతీయ అంతరిక్ష స్టేషన్’ నిర్మించాలని లక్ష్యంగా పెట్టుకుంది. దీని మొదటి మాడ్యూల్ (BAS-1) లాంచ్ 2028లో ప్రారంభమవుతుంది. ప్రారంభంలో ఈ స్టేషన్ సుమారు 20 నుండి 25 టన్నుల బరువు ఉంటుంది. ఇందులో 2 నుండి 4 గురు వ్యోమగాములు కలిసి ఉండి పరిశోధనలు చేయవచ్చు. అంతరిక్షంలో రెండు నౌకలు ఒకదానితో ఒకటి అనుసంధానమయ్యే ‘స్పేస్ డాకింగ్’ వంటి సంక్లిష్టమైన సాంకేతికతపై భారత్ వేగంగా పనిచేస్తోంది. ఇది భారత అంతరిక్ష చరిత్రలోనే అత్యంత ప్రతిష్టాత్మకమైన ప్రాజెక్ట్ కానుంది.
స్వయం సమృద్ధం కానున్న భారత్
భారతదేశానికి స్వంత అంతరిక్ష కేంద్రం ఉండటం వల్ల కలిగే అతిపెద్ద ప్రయోజనం ఏమిటంటే.. మనం ఏ ప్రయోగం చేయాలన్నా ఇతర దేశాలపై ఆధారపడాల్సిన అవసరం ఉండదు. ఈ ప్రాజెక్ట్ ‘గగన్యాన్’ మిషన్ను బలోపేతం చేయడమే కాకుండా 2040 నాటికి చంద్రునిపై భారతీయ వ్యోమగామిని ల్యాండ్ చేసే కలకి బలమైన పునాది వేస్తుంది. ఈ స్టేషన్ పూర్తిగా స్వదేశీ సాంకేతికతతో నిర్మించబడుతుంది. మన శక్తివంతమైన రాకెట్ LVM3 కొత్త వెర్షన్ ద్వారా అంతరిక్షంలోకి పంపబడుతుంది. ఈ అడుగుతో అంతరిక్షంలో స్వంత అడ్రస్ ఉన్న అతికొద్ది దేశాల సరసన భారత్ నిలవనుంది.
Follow us
