France: ఫ్రాన్స్‌లో హింసాకాండ.. 1100 మంది అరెస్టు.. కారణమిదే..?

France: పోలీసుల కాల్పుల్లో మైనర్ బాలుడు మరణించిన తర్వాత ఫ్రాన్స్‌ (France)లో మొదలైన హింసాకాండ ఆగడం లేదు. ఈ ఘటన తర్వాత ఫ్రాన్స్‌లో అల్లకల్లోల వాతావరణం నెలకొంది. అల్లరి మూకలు వీధుల్లో బీభత్సం సృష్టిస్తున్నారు. వేలాది కార్లు, భవనాలకు నిప్పు పెట్టారు. మంగళవారం (జూన్ 27) జరిగిన ఈ ఘటన జరిగి నాలుగు రోజులు గడుస్తున్నా దేశవ్యాప్తంగా చెలరేగిన హింసాకాండకు ఊరట లభించడం లేదు.

గత రాత్రి 270 మందిని అరెస్టు చేశామని, హింసకు సంబంధించి మొత్తం అరెస్టుల సంఖ్య 1,100కి చేరుకుందని ఫ్రెంచ్ అంతర్గత మంత్రి గెరాల్డ్ డార్మానిన్ శనివారం తెలిపారు. గత రాత్రి అరెస్టులలో ఫ్రాన్స్‌లోని రెండవ అతిపెద్ద నగరమైన మార్సెయిల్‌లో 80 మందిని అరెస్టు చేసినట్లు వార్తా సంస్థ రాయిటర్స్ నివేదించింది. అరెస్టయిన నిరసనకారులలో చాలా మంది 14 నుండి 18 సంవత్సరాల మధ్య వయస్సు గలవారు ఉన్నారు. పరిస్థితి దిగజారుతున్న దృష్ట్యా అదనపు బలగాలను పంపాలని మార్సెయిల్ మేయర్ బెనాయిట్ పాయెన్ ప్రభుత్వాన్ని కోరారు. లూటీలు, హింసాత్మక దృశ్యాలు ఆమోదయోగ్యం కాదని ఆయన శుక్రవారం రాత్రి ట్వీట్ చేశారు.

Also Read: Maharashtra Bus Accident: మహారాష్ట్ర బస్సు ప్రమాదంపై పోలీసుల అనుమానం

దేశంలో ప్రస్తుత పరిస్థితులపై ఆందోళన వ్యక్తం చేసిన ఫ్రెంచ్ హోం మంత్రి గెరాల్డ్ డార్మెనిన్ నాల్గవ రాత్రి హింస కొద్దిగా తగ్గిందని, అయితే దేశంలో శాంతిని పునరుద్ధరించడానికి ప్రయత్నిస్తున్నామని చెప్పారు. పరిస్థితిని అదుపు చేసేందుకు 45 వేల మంది పోలీసులను మోహరించినట్లు ఆయన పేర్కొన్నారు. ఫ్రెంచ్ మీడియా ప్రకారం.. మార్సెయిల్, లియోన్‌లలో పరిస్థితి చాలా ఘోరంగా ఉంది. గ్రెనోబుల్, సెయింట్-ఎటియన్ ప్రాంతాల్లో అల్లర్లు, నిరసనకారులకు.. పోలీసులకు మధ్య ఘర్షణలు జరిగాయి. అధ్వాన్నమైన పరిస్థితిని దృష్టిలో ఉంచుకుని, ఫ్రెంచ్ ఫుట్‌బాల్ స్టార్ కైలియన్ బప్పే శాంతి కోసం విజ్ఞప్తి చేశారు. హింస ద్వారా ఎటువంటి పరిష్కారం కనుగొనబడదని అన్నారు.