TSPSC: మరో పరీక్ష వాయిదా వేసిన టీఎస్పీఎస్సీ.. జూన్ 17కు మార్పు..!
తెలంగాణ స్టేట్ పబ్లిక్ సర్వీస్ కమిషన్ (TSPSC) తాజాగా మరో పరీక్షను వాయిదా వేస్తూ కీలక నిర్ణయం తీసుకుంది. హార్టికల్చర్ ఆఫీసర్ పరీక్షను TSPSC వాయిదా వేసింది. టీఎస్పీఎస్సీ పేపర్ లీకేజీ కేసు తెలంగాణ వ్యాప్తంగా సంచలనం సృష్టించిన సంగతి తెలిసిందే.
- Author : Gopichand
Date : 29-03-2023 - 10:14 IST
Published By : Hashtagu Telugu Desk
తెలంగాణ స్టేట్ పబ్లిక్ సర్వీస్ కమిషన్ (TSPSC) తాజాగా మరో పరీక్షను వాయిదా వేస్తూ కీలక నిర్ణయం తీసుకుంది. హార్టికల్చర్ ఆఫీసర్ పరీక్షను TSPSC వాయిదా వేసింది. టీఎస్పీఎస్సీ పేపర్ లీకేజీ కేసు తెలంగాణ వ్యాప్తంగా సంచలనం సృష్టించిన సంగతి తెలిసిందే. ఈ క్రమంలో ఏప్రిల్ 4న జరగాల్సిన హార్టికల్చర్ ఆఫీసర్ పరీక్ష వాయిదా పడింది. ఈ పరీక్షను జూన్ 17న నిర్వహించనున్నట్లు కమిషన్ అధికారులు వెల్లడించారు.పేపర్ లీక్ అయి ఉంటుందన్న అనుమానంతో టీఎస్పీఎస్సీ హార్టికల్చర్ ఆఫీసర్ పరీక్షను వాయిదా వేసినట్లు తెలుస్తోంది. ఎలాంటి అవకతవకలు జరగకుండా చూసుకోవడంలో భాగంగా కొత్త ప్రశ్నాపత్రంతో జూన్ 17న పరీక్ష నిర్వహించనున్నట్లు చెబుతున్నారు.
తెలంగాణ రాష్ట్ర ప్రభుత్వ ఉద్యానవన శాఖలో 22 హార్టికల్చర్ ఆఫీసర్ పోస్టుల భర్తీకి డిసెంబర్ 22న TSPSC నోటిఫికేషన్ విడుదల చేసిన సంగతి తెలిసిందే. సంబంధిత విభాగాల్లో డిగ్రీ లేదా పీజీ డిగ్రీ పూర్తి చేసిన అభ్యర్థులు దరఖాస్తు చేసుకోవడానికి అర్హులు. ఈ పోస్టుల భర్తీకి జనవరి 3 నుంచి ఆన్లైన్ దరఖాస్తు ప్రక్రియ ప్రారంభమైంది అర్హులైన అభ్యర్థులు జనవరి 24 వరకు దరఖాస్తు చేసుకున్నారు.రాత పరీక్ష ద్వారా ఉద్యోగ ఎంపిక జరుగుతుంది.
పేపర్ల లీక్ కారణంగా ఇప్పటివరకు నిర్వహించిన నాలుగు పరీక్షల నోటిఫికేషన్లను TSPSC రద్దు చేసింది. నిర్వహించాల్సిన రెండు పరీక్షలను కూడా కమిషన్ వాయిదా వేసింది. ఇటీవల పేపర్ లీక్ కావడంతో అసిస్టెంట్ ఎగ్జిక్యూటివ్ ఇంజినీర్ (ఏఈఈ), అసిస్టెంట్ ఇంజనీర్ (ఏఈ), డివిజనల్ అకౌంట్స్ ఆఫీసర్ (డీఏవో) పరీక్షలను రద్దు చేశారు. గ్రూప్ 1 ప్రిలిమ్స్ పేపర్ లీక్ అయినట్లు గుర్తించిన టీఎస్పీఎస్సీ మెయిన్స్ పరీక్షను వాయిదా వేసి ప్రిలిమ్స్ ఫలితాలను రద్దు చేసింది. టౌన్ ప్లానింగ్ బిల్డింగ్ ఓవర్సీయర్, వెటర్నరీ అసిస్టెంట్ పరీక్షలు వాయిదా పడగా.. ఏప్రిల్లో జరగాల్సిన హార్టికల్చర్ ఆఫీసర్ పరీక్ష జూన్కు వాయిదా పడింది. గ్రూప్ 1 ప్రిలిమ్స్ పరీక్ష జూన్ 11న నిర్వహించనున్నారు.
తెలంగాణలో ప్రశ్నపత్రాల లీకేజీ కారణంగా రద్దు చేయబడిన వివిధ రిక్రూట్మెంట్ పరీక్షల కొత్త షెడ్యూల్ను TSPSC త్వరలో ప్రకటించనుంది. ఇప్పటికే నిర్ణయించిన పరీక్షల తేదీల్లో మార్పులు జరిగే అవకాశం ఉంది. గ్రూప్-1 ప్రిలిమినరీ పరీక్షను జూన్ 11న నిర్వహిస్తామని టీఎస్పీఎస్సీ ఇప్పటికే ప్రకటించిన విషయం తెలిసిందే.గ్రూప్-1 ప్రిలిమినరీని రద్దు చేసిన కమిషన్ అదే రోజున రీ-ఎగ్జామినేషన్ తేదీని ప్రకటించింది. అయితే.. గ్రూప్-1తో పాటు రద్దు చేయబడిన AEE, DAO, AE, వాయిదా పడిన TPBO, వెటర్నరీ అసిస్టెంట్ పోస్టులకు కొత్త తేదీలు ఖరారు చేయబడతాయి. కేంద్ర ప్రభుత్వం, వివిధ పోటీ పరీక్షల షెడ్యూల్ను సమీక్షించిన తర్వాత, TSPSC పరీక్షలకు తగిన తేదీలను వారంలోగా ప్రకటిస్తుంది. గ్రూప్-1, గ్రూప్-2, గ్రూప్-4 పరీక్షల మధ్య వ్యవధిని పరిశీలించి, తదనుగుణంగా నిర్ణయాలు తీసుకోనున్నారు.
ఏపీ గ్రూప్ 1 మెయిన్స్ పరీక్ష వాయిదా
మరోవైపు గ్రూప్ 1 మెయిన్స్ పరీక్షలను ఏపీపీఎస్సీ వాయిదా వేసింది. ఏప్రిల్ 23 నుంచి 29 వరకు జరగాల్సిన మెయిన్స్ పరీక్షలను జూన్ మొదటి వారానికి వాయిదా వేసినట్లు ఏపీపీఎస్సీ అధికారులు తెలిపారు. ఏప్రిల్ 24 నుంచి మే 18 వరకు యూపీఎస్సీ సివిల్స్ ఇంటర్వ్యూలు జరగనుండగా.. గ్రూప్ 1 మెయిన్స్ పరీక్షలను వాయిదా వేయాలని నిర్ణయించినట్లు అధికారులు స్పష్టం చేశారు. మెయిన్స్ పరీక్షలను జూన్ 3 నుంచి 9 వరకు నిర్వహిస్తామని ఏపీపీఎస్సీ ప్రకటించింది.తాజాగా యూపీఎస్సీ విడుదల చేసింది. సివిల్స్ ఇంటర్వ్యూ షెడ్యూల్. దీంతో గ్రూప్ 1 మెయిన్స్ పరీక్షలను నిర్వహించాలని ఏపీపీఎస్సీ నిర్ణయించింది. గ్రూప్ 1 పరీక్షకు హాజరయ్యే ఆంధ్రప్రదేశ్ నుండి 25 మంది అభ్యర్థులు UPSC సివిల్స్ ఇంటర్వ్యూలకు హాజరు కావాలి. ఈ అభ్యర్థులను దృష్టిలో ఉంచుకుని అధికారులు మెయిన్స్ పరీక్షలను వాయిదా వేశారు.
