Telangana Irrigation: తెలంగాణ ఇరిగేషన్ కు ప్రక్షాళన..

Telangana Irrigation

Telangana Irrigation: కాళేశ్వరం లిఫ్ట్ ప్రాజెక్టులో కుప్పకూలిన మేడిగడ్డ బ్యారేజీని సందర్శించేందుకు ఏర్పాట్లు చేయాలని నీటి పారుదల శాఖ మంత్రి ఉత్తమ్ కుమార్ రెడ్డి రాష్ట్ర నీటిపారుదల శాఖ ఉన్నతాధికారులను ఆదేశించారు. మేడిగడ్డ బ్యారేజీలో పిల్లర్‌ కూలిపోవడం చాలా తీవ్రమైన సమస్య అని ఆయన అభిప్రాయపడ్డారు. కాగా కాళేశ్వరం పర్యటనకు తనకు తోడుగా మేడిగడ్డ నిర్మాణం చేపట్టిన ఏజెన్సీ, అధికారులు ఉండేలా చూడాలన్నారు.

నీటి పారుదల శాఖ మంత్రిగా బాధ్యతలు చేపట్టిన తర్వాత తొలిసారిగా ఆ శాఖ ఉన్నతాధికారులతో సమీక్ష నిర్వహించారు ఉత్తమ్ కుమార్ రెడ్డి. పెండింగ్‌, ఇతర ప్రాజెక్టుల స్థితిగతులపై ఆరా తీశారు. ప్రాజెక్టుల గురించి ఈఎన్సీ మురళీధర్ రావు మంత్రికి వివరించారు. వచ్చే వారం నుంచి ఒక్కో ప్రాజెక్టుపై ప్రత్యేకంగా సమీక్ష నిర్వహిస్తామన్నారు ఉత్తమ్. మేడిగడ్డను ఎవరు కట్టినా ఘటనకు బాధ్యత వహించాలన్నారు. ప్రాజెక్టు కట్టిన ఏజెన్సీ, అధికారులే బాధ్యత వహించాల్సి ఉంటుంది. లక్ష కోట్ల ప్రాజెక్టు ద్వారా ఎకరా సాగుకు ఎంత ఖర్చవుతుందో చెప్పాలని అధికారులను కోరారు. ఎస్‌ఎల్‌బీసీ టన్నెల్‌ పనుల పురోగతిపై ఆరా తీశారు. సొరంగం పనుల సమయంలో కంపెనీకి బిల్లులు బకాయిలు ఉన్న సంగతి తెలిసిందే. రాష్ట్రంలోని 40 వేల ట్యాంకులపై ప్రత్యేక దృష్టి సారిస్తామని ఉత్తమ్ మీడియాకు తెలిపారు.

అంతకుముందు జరిగిన సమీక్షలో ఇటీవల మేడిగడ్డ బ్యారేజీ పిల్లర్ కూలిన ఘటనపై అధికారులు మంత్రికి వివరణ ఇచ్చారు. “మేము మేడిగడ్డ బ్యారేజీ నిర్మాణానికి 4,600 కోట్లు ఖర్చు చేసినట్లు పేర్కొన్నారు. ఒక స్తంభం 1.2 మీటర్ల మేర కుంగిపోవడంతో మిగతా మూడు స్తంభాలు దెబ్బతిన్నాయి. మొన్న సాయంత్రం స్తంభం కూలిన వెంటనే. ప్రాజెక్టుకు నీరు చేర్చాం. నీరు చేరిన తర్వాత పిల్లర్ కుంగిపోవడం తగ్గిందని అధికారులు మంత్రికి వివరించారు. అనంతరం మంత్రి ఉత్తమ్ స్పందిస్తూ ఇది చాలా తీవ్రమైన అంశమని, ప్రాజెక్టు సందర్శనకు ఏర్పాట్లు చేయాలని అధికారులను ఆదేశించారు. “అక్కడ ఎంత ఖర్చు పెట్టారు? సాగునీటి కోసం ఎంతమేర నిర్మాణాలు చేపట్టారు? ఒక్కో ఎకరం సాగుకు అయ్యే ఖర్చు ఎంత? అని మంత్రి అధికారులను ప్రశ్నించారు.

పాలమూరు-రంగారెడ్డి లిఫ్ట్‌ ప్రాజెక్టుపై పూర్తి వివరాలను సిద్ధం చేయాలని మంత్రి అధికారులను ఆదేశించారు. దీనిపై ప్రత్యేకంగా సమీక్షించనున్నారు. CWC అనుమతి లేకుండా ప్రాజెక్టులు ఎలా నిర్మిస్తారు? నిధులు ఎలా వసూలయ్యాయని ప్రశ్నించారు. నిర్మాణంలో ఉన్న ప్రాజెక్ట్‌లను థర్డ్ పార్టీ తనిఖీ చేయడం లేదా? కాళేశ్వరం ప్రాజెక్టు నిర్మాణానికి సీడబ్ల్యూసీ అనుమతి ఉందా? వర్షాలు కురిసినప్పుడు నీటిని ఎత్తిపోయాల్సిన అవసరం లేదని, నీటిపారుదల శాఖ అవినీతికి తావులేకుండా పారదర్శకంగా, సమర్థవంతంగా పనిచేయాలన్నారు. వందేళ్ల పాటు సాగాల్సిన ప్రాజెక్టు ఇంత త్వరగా పాడైపోవడం శోచనీయం. అలా ఎందుకు జరిగింది? అని మంత్రి అధికారులను ప్రశ్నించారు. ప్రాజెక్టుల వారీగా పూర్తి వివరాలతో సమీక్షకు వస్తామని అధికారులు తెలిపారు.

Also Read: CPI Narayana : ఏపీలో జగన్ ఓడిపోవడం ఖాయం – నారాయణ

Follow us