HYDRA : చార్మినార్‌ను కూల్చాలని ఎమ్మార్వో చెబితే కూల్చేస్తారా.. హైడ్రా కమిషనర్‌‌కు హైకోర్టు ప్రశ్న

HYDRA : హైదరాబాద్ నగరంలో హైడ్రా విభాగం జరుపుతున్న కూల్చివేతలపై అభ్యంతరం వ్యక్తం చేస్తూ దాఖలైన పిటిషన్లను హైకోర్టు ఇవాళ విచారించింది. ఈ విచారణకు హైడ్రా కమిషనర్‌ రంగనాథ్ వర్చువల్‌గా హాజరవగా,  అమీన్‌పూర్ తహసీల్దార్ నేరుగా హాజరయ్యారు. ఈసందర్భంగా అమీన్‌పూర్‌ తహసీల్దార్‌పై హైకోర్టు ఆగ్రహం వ్యక్తం చేసింది. భవనాన్ని 48 గంటల్లోగా ఖాళీ చేయాలని నోటీసులిచ్చి..  40 గంటల్లోపే ఎలా కూల్చేస్తారని న్యాయస్థానం సీరియస్ అయింది. తాము అడిగే ప్రశ్నలకు మాత్రమే సమాధానాలు చెప్పాలంటూ హైడ్రా కమిషనర్‌కు హైకోర్టు బెంచ్(HYDRA) స్పష్టం చేసింది. చార్మినార్‌ను కూల్చాలని అక్కడి ఎమ్మార్వో చెబితే కూల్చేస్తారా అని హైడ్రా కమిషనర్‌ను తెలంగాణ హైకోర్టు ప్రశ్నించింది. ‘‘కేవలం శని, ఆదివారాలు, సూర్యాస్తమయం తర్వాతే కూల్చివేతలు ఎందుకు చేపడుతున్నారు ? సెలవు రోజుల్లోనే అందరికీ నోటీసులు ఇచ్చి అత్యవసరంగా కూల్చివేయడానికి కారణం ఏమిటి ? శని, ఆదివారాల్లో నిర్మాణాలను కూల్చివేయొద్దని గతంలో కోర్టు తీర్పులు ఉన్నాయి కదా ?’’ అని హైకోర్టు ధర్మాసనం వ్యాఖ్యానించింది. ‘‘ప్రభుత్వ ఉద్యోగులు ఆదివారం ఎందుకు పని చేయాలి ? ఉన్నతాధికారులను మెప్పించేందుకు ఎవరూ చట్ట విరుద్ధంగా పని చేయొద్దు’’ అని న్యాయస్థానం సూచించింది.