Telangana : మంత్రి వర్గ విస్తరణకు అధిష్ఠానం గ్రీన్‌ సిగ్నల్‌.. కొత్తగా ముగ్గురు లేదా నలుగురికి మంత్రివర్గంలో చోటు..!
. ఈ విస్తరణలో ముగ్గురు లేదా నలుగురు కొత్త నేతలు మంత్రివర్గంలోకి రావొచ్చని పార్టీ వర్గాలు వెల్లడించాయి. వాస్తవానికి, రేవంత్ రెడ్డి ముఖ్యమంత్రిగా బాధ్యతలు చేపట్టిన దాదాపు ఆరు నెలల తర్వాత ఈ మంత్రివర్గ విస్తరణ జరగాల్సింది.
- By Latha Suma Published Date - 03:11 PM, Sat - 7 June 25
Telangana : తెలంగాణలో మంత్రివర్గ విస్తరణపై నెలలుగా కొనసాగుతున్న ఉత్కంఠకు తెరపడింది. రాష్ట్ర క్యాబినెట్‌ను విస్తరించేందుకు పార్టీ అధిష్ఠానం నుంచి తుది ఆమోదం లభించింది. ముఖ్యమంత్రి రేవంత్ రెడ్డి ఢిల్లీ పర్యటన అనంతరం, ఆదివారం మంత్రుల ప్రమాణ స్వీకార కార్యక్రమం జరగనుందన్న ప్రచారం జోరుగా సాగుతోంది. ఈ విస్తరణలో ముగ్గురు లేదా నలుగురు కొత్త నేతలు మంత్రివర్గంలోకి రావొచ్చని పార్టీ వర్గాలు వెల్లడించాయి. వాస్తవానికి, రేవంత్ రెడ్డి ముఖ్యమంత్రిగా బాధ్యతలు చేపట్టిన దాదాపు ఆరు నెలల తర్వాత ఈ మంత్రివర్గ విస్తరణ జరగాల్సింది. ప్రస్తుతం ఉన్న మంత్రులు 11 మంది మాత్రమే కాగా, రాష్ట్ర సర్వోన్నత పదవులకు ఇంకా ఖాళీలే ఉన్నాయనే విమర్శలు ఎప్పటి నుంచో వస్తున్నాయి. ఎట్టకేలకు ఈ ఖాళీలను భర్తీ చేయాలన్న దిశగా కాంగ్రెస్ అధిష్ఠానం నిర్ణయం తీసుకున్నట్లు సమాచారం.
Read Also: Delhi: పెళ్లాంతో గొడవ ఢిల్లీ సీఎంను చంపేస్తానని ఫోన్
ఇదిలా ఉండగా, విస్తరణకు ముందు సామాజిక సమీకరణాలపై పార్టీ శ్రేణులు విస్తృతంగా చర్చించాయి. దళితులు, వెనుకబడిన తరగతులు, మైనారిటీలకు ప్రాధాన్యత ఇవ్వాలని నిర్ణయించుకున్నట్లు తెలుస్తోంది. ప్రాంతీయ సమతుల్యతను దృష్టిలో ఉంచుకుని, ఉత్తర తెలంగాణ, దక్షిణ తెలంగాణ ప్రాంతాలకు సమాన ప్రాతినిధ్యం కల్పించేలా జాగ్రత్తలు తీసుకుంటున్నారు. ఈ క్రమంలో, సీఎం రేవంత్ రెడ్డి, పీసీసీ అధ్యక్షుడు మహేశ్ కుమార్ గౌడ్, పార్టీ ఇన్‌ఛార్జ్ మీనాక్షి నటరాజన్‌తో ఇప్పటికే కీలక సమావేశాలు ముగించారు. ఏయే నియోజకవర్గాలకు అవకాశం ఇవ్వాలి? కేబినెట్‌లోకి తీసుకురాబోయే వారిని ఏయే శాఖలకు బాధ్యతలు అప్పగించాలి? అనే విషయాలపై మంతనాలు సాగుతున్నాయి.
పార్టీలో నిష్టగా పనిచేస్తున్న, ఓటింగ్‌లో కీలకంగా నిలిచిన నేతలతో పాటు, కొన్ని సామాజిక వర్గాలను ప్రాతినిధ్యం ఇవ్వాలనే వ్యూహంతో ఎంపిక ప్రక్రియ జరుగుతోంది. కొంతమంది సీనియర్ నాయకులకు అవకాశం ఇవ్వాలా లేక యువ నేతలకే ఎక్కువ ప్రాధాన్యత కల్పించాలా అన్న విషయమై ఇంకా చర్చలు కొనసాగుతున్నట్లు సమాచారం. ఇంతకుముందు క్యాబినెట్‌లో చోటు దక్కక బహిరంగంగా అసంతృప్తిని వ్యక్తపరిచిన కొంతమంది ఎమ్మెల్యేల పేర్లు ఈసారి మళ్లీ చర్చలోకి వచ్చాయి. వారి అభిప్రాయాలను సమీక్షించిన తర్వాతే తుది జాబితా ఖరారవుతుందని సమాచారం. ఒక్కసారి రాష్ట్రపతి భవన్ నుంచి గవర్నర్ ఆమోదం వచ్చిన వెంటనే మంత్రుల ప్రమాణ స్వీకారం జరగనుంది. అంతేకాదు, ఈ విస్తరణ అనంతరం రాష్ట్ర పాలనలో మరింత వేగం తీసుకొచ్చేందుకు సీఎం చర్యలు చేపట్టే అవకాశం ఉంది.
Read Also: Jaishankar : దుష్టులు బాధితులతో సమానం కాదు..భారత్ ఉగ్రవాదాన్ని ఎన్నటికీ సహించబోదు : జైశంకర్‌
