Jaishankar : దుష్టులు బాధితులతో సమానం కాదు..భారత్ ఉగ్రవాదాన్ని ఎన్నటికీ సహించబోదు : జైశంకర్
బ్రిటన్ విదేశాంగ మంత్రి డేవిడ్ లామీతో ఢిల్లీలో జరిగిన సమావేశం సందర్భంగా జైశంకర్ ఈ వ్యాఖ్యలు చేశారు. పహల్గాంలో ఇటీవల జరిగిన ఉగ్రదాడిని తీవ్రంగా ఖండించినందుకు బ్రిటన్ ప్రభుత్వానికి ఆయన ధన్యవాదాలు తెలిపారు.
- By Latha Suma Published Date - 02:42 PM, Sat - 7 June 25
Jaishankar : భారత్ విదేశాంగ మంత్రి ఎస్‌. జైశంకర్ మరోసారి ఉగ్రవాదంపై భారత్ అవలంబిస్తున్న అవిశ్రాంత పోరాటాన్ని తేటతెల్లం చేశారు. దుష్టశక్తులు బాధితులతో సమానం కాలేరని స్పష్టంగా చెప్పారు. పాకిస్థాన్‌కు పరోక్షంగా హితవు పలుకుతూ, ఉగ్రవాదానికి మద్దతిచ్చే దేశాలను భారత్ ఇకపై సహించదని హెచ్చరించారు. బ్రిటన్ విదేశాంగ మంత్రి డేవిడ్ లామీతో ఢిల్లీలో జరిగిన సమావేశం సందర్భంగా జైశంకర్ ఈ వ్యాఖ్యలు చేశారు. పహల్గాంలో ఇటీవల జరిగిన ఉగ్రదాడిని తీవ్రంగా ఖండించినందుకు బ్రిటన్ ప్రభుత్వానికి ఆయన ధన్యవాదాలు తెలిపారు. ఉగ్రవాదాన్ని మేం ఎన్నటికీ సహించబోం. దానికి శాశ్వతంగా ముగింపు రావాల్సిందే. చెడుకు పాల్పడే వారిని బాధితులుగా చూడటమన్నది మాకు ఆమోదయోగ్యం కాదు. భాగస్వామ్య దేశాలు కూడా ఇది గుర్తించాలి అని జైశంకర్ ధ్వజమెత్తారు.
Read Also: Lakhpati Didi Yojana: దేశంలోని మహిళల ఆర్థిక పురోగతికి కేంద్రం పథకం
ఈ సందర్భంగా ఇరుదేశాల మధ్య ద్వైపాక్షిక సంబంధాలు, వాణిజ్య సహకారం, రక్షణ రంగంలో భాగస్వామ్యం వంటి అంశాలపై చర్చలు జరిగినట్లు జాతీయ మీడియా పేర్కొంది. బ్రిటన్‌తో ఉన్న సంబంధాలు మరింత బలపడాలని భారత్ ఆశిస్తోంది. జైశంకర్ వ్యాఖ్యలు, ఉగ్రవాదంపై దేశం అవలంబిస్తున్న స్పష్టమైన విధానాన్ని ప్రతిబింబిస్తున్నాయి. ఇదిలాఉండగా… పహల్గాంలో జరిగిన ఉగ్రవాద దాడిని ప్రపంచ దేశాలు ఖండించాయి. పాక్ మద్దతుతో ఉగ్రవాదులు ఈ దాడికి పాల్పడ్డారని నిఘా సంస్థలు నిర్ధారించాయి. ఈ దాడిలో పలువురు భద్రతా సిబ్బంది, పౌరులు ప్రాణాలు కోల్పోయారు. దీనిపై తీవ్ర ఆగ్రహం వ్యక్తం చేసిన భారత్ ‘ఆపరేషన్ సిందూర్’ పేరుతో పాక్ ప్రాయోజిత శిబిరాలపై లక్ష్యంగా దాడులు జరిపింది.
ఈ దాడుల అనంతరం భారత ప్రభుత్వం ప్రత్యేక అఖిలపక్ష బృందాలను విదేశాలకు పంపింది. ఉగ్రవాదంపై భారత్ చేస్తున్న పోరాటం, పాకిస్థాన్ పాత్ర గురించి వివరణ ఇచ్చేందుకు ఈ బృందాలు పలు దేశాలకు వెళ్లాయి. ప్రపంచ దేశాలు భారత్‌కు మద్దతు ప్రకటించి, బాధిత కుటుంబాలకు సంఘీభావం తెలిపారు. ఈ పరిణామాల నేపథ్యంలో, ఉగ్రవాదంపై అంతర్జాతీయ మద్దతును సాధించడంలో భారత్ కీలకంగా ముందంజ వేస్తోంది. జైశంకర్ వ్యాఖ్యలు ఈ క్రమంలోనే ఉన్నదిగా విశ్లేషకులు పేర్కొంటున్నారు. భారత్ ఉగ్రవాదాన్ని ఎదుర్కొనే విషయంలో ఎలాంటి రాజీ చేయదని, అంతర్జాతీయ మద్దతుతో దుష్టశక్తులను ఒళ్లు గగుర్పాటు చేయించే విధంగా చర్యలు తీసుకుంటుందని సంకేతాలు అందిస్తున్నాయి.
Read Also: Annadatta Sukhibhava : ఏపీ రైతులకు గుడ్‌న్యూస్‌.. ‘అన్నదాతా సుఖీభవ’ డబ్బుల జమ ఎప్పుడంటే..?
