BRS War Room: బీఆర్ఎస్ వార్ రూమ్స్ లో అసలేం జరుగుతోంది?

Brs War Room (1)

డా. ప్రసాదమూర్తి

BRS War Room: యుద్ధ రంగంలో సైనికుల చేతుల్లో ఆయుధాలు ఉంటాయి. ఎన్నికల యుద్ధ రంగంలో బీఆర్ఎస్ నిర్మించిన వార్రూమ్స్ లో సైనికుల చేతుల్లో ల్యాప్టాప్ లు ఉంటాయి. ప్రతి నియోజకవర్గంలోనూ ఒక వార్ రూమ్ లో డిజిటల్ నిపుణులు ల్యాప్టాప్ ద్వారా అభ్యర్థులు, పార్టీ నాయకులు, ఓటర్లు పార్టీ అధిష్టానానికి మధ్య అనుసంధాన కర్తలుగా వ్యవహరిస్తారు. 119 నియోజకవర్గాల్లో ఉండే ఈ వార్ రూమ్స్ నుండి నియోజకవర్గం వారీగా సమాచారం అంతా రాష్ట్రస్థాయి వార్ రూమ్ కి చేరుతుంది. ప్రతి వార్ రూమ్ కి నలుగురైదుగురు పర్యవేక్షకులు ఉంటారు. వీరిలో ఎక్కువగా పార్టీ అభిమానులు, లేదా పోటీలో ఉన్న అభ్యర్థుల కుటుంబ సభ్యులు ఉంటారు. వీరికి ప్రతి గ్రామ స్థాయిలోనూ కావలసిన సమాచారాన్ని అందించడానికి సహాయకులు ఉంటారు.

వార్ రూమ్స్ నుండి కీలక సమాచారం:
బీఆర్ఎస్ గత పదేళ్లుగా అధికారంలో ఉంది. సాధారణంగా ప్రజలు అధికారంలో ఉన్న పార్టీని చవిచూసిన తర్వాత, కొత్త ప్రభుత్వాన్ని కూడా చూస్తే ఎలా ఉంటుందనే ఉత్సాహాన్ని ఎక్కువగా చూపిస్తారు. ఇప్పటికే సర్వేలు చెబుతున్న దాని ప్రకారం బీఆర్ఎస్ కు రాష్ట్రవ్యాప్తంగా అధిక సంఖ్యలో వ్యతిరేకత ఉన్నట్టు అర్థమవుతుంది. అయితే ఈ వ్యతిరేకత ఏ స్థాయిలో ఉంది అనేది చాలా కీలకమైన విషయం. వ్యతిరేకత ప్రాథమిక స్థాయిలో ఉంటే, తమ పథకాలను సరిగా అందుకోలేక అసంతృప్తితో ఉంటే అలాంటి వ్యతిరేకతను సరిదిద్దుకోవచ్చు. తటస్థంగా ఉన్న ఓటర్లను తమ వైపు లాక్కోవచ్చు. అసంతృప్తితో ఉన్న నాయకులను బుజ్జగించడం ద్వారా కొంత వ్యతిరేకతను తగ్గించుకోవచ్చు. పూర్తిస్థాయిలో వ్యతిరేకంగా ఓటర్లు ఎంతమంది ఉన్నారు, దానికి కారణాలు ఏమిటి అనేది కూడా ఒక అంచనాకు రావచ్చు. ఇలా ఈ మొత్తం కార్యాచరణను అమలు పరచాలంటే గ్రామస్థాయి నుండి పూర్తి సమాచారం కేంద్ర స్థాయికి చేరుకోవాలి. ఆ సమాచారాన్ని అందించడానికి ఈ వార్ రూమ్స్ ని ఏర్పాటు చేశారు. ఇందులో పనిచేసే నిపుణుల వద్ద ప్రతి ఓటర్ యొక్క సమాచారం ఉంటుంది. ఓటరు రాజకీయ వైఖరి, మారుతున్న రాజకీయ ధోరణులు, సామాజిక స్థితిగతులు మొదలైన పూర్తి సమాచారం వార్ రూమ్ కి చేరుతుంది. దాని ఆధారంగా ఒక సామాన్య సూత్రాన్ని తీసుకొని, ఆ మేరకు లోపాలను సరిదిద్దుకొని, మెరుగైన ఎన్నికల ప్రచారం సాగించడానికి ఈ వార్ రూమ్స్ నుండి వస్తున్న సమాచారం కీలకంగా పనిచేస్తుంది

యువతలో అసంతృప్తి:
ఉద్యోగాల రూపకల్పనలో, పరీక్షల నిర్వహణలో, ప్రభుత్వం కొంత వైఫల్యం చెందిన విషయం యువతలో తీవ్ర అసంతృప్తిగా మారింది. తమ పట్ల యువత కొంచెం గుర్రుగా ఉన్నట్టు స్వయంగా బీఆర్ఎస్ వర్కింగ్ ప్రెసిడెంట్ మంత్రి కేటీ రామారావు అంగీకరించారు. యువతను తమవైపు ఆకర్షించే మెరుగైన ప్రణాళికలు రచించి, పథకాలు ప్రవేశపెట్టి, వాటిని వారి దాకా తీసుకువెళ్లే కార్యక్రమాన్ని కూడా ఈ వార్ రూమ్స్ అందించిన సమాచారం ఆధారంగా రూపొందించుకుంటారు. ప్రతి ఒక్క ఓటర్ ని మాలిమి చేసుకొని పోలింగ్ బూత్ వరకూ తీసుకువెళ్లే దాకా తాము కష్టించి పనిచేస్తామని బీఆర్ఎస్ నాయకులు అంటున్నారు. సభలు, సమావేశాలు, వాగ్దానాలు, పథకాలు, ప్రచారాలు ఒక ఎత్తు కాగా, ఈ వార్ రూమ్స్ ద్వారా సాధించే విజయం మరొక ఎత్తు కాగలదు. అందుకే బిఆర్ఎస్ నాయకులు వార్రూమ్స్ ని చాలా కీలకమైనవిగా భావిస్తున్నారు. ప్రభుత్వ వ్యతిరేకతను తగ్గించుకునే దిశగా పాలకులు పయనించడంలో ఈ వార్ రూమ్స్ ఎలా ఉపయోగపడతాయో, ఇలాంటి ప్రయత్నాల్లో ఇతర పార్టీలు కూడా ఎలాంటి ముందడుగు వేస్తాయో చూడాల్సి ఉంది. ప్రస్తుతానికి బీఆర్ఎస్ నాయకులు తమ ప్రచార రంగంలో ఈ వార్ రూమ్స్ ని మాత్రం తిరుగులేని ఆయుధాలుగా మార్చుకున్నారని చెప్పాలి.

Also Read: Thalaivar 170: ఇద్దరు లెజెండ్స్ కలిసిన వేళ.. అమితాబ్ తో రజనీ స్క్రీన్ షేర్

Follow us