Telangana: కాంగ్రెస్ ను ఇరుకున పెట్టేందుకు సిద్ధమైన బీఆర్ఎస్, బీజేపీ
తెలంగాణలో లోక్‌సభ ఎన్నికల పోలింగ్‌కు సర్వం సిద్ధమైంది. అధికారం కోసం కాంగ్రెస్, బీజేపీ భారీ ఎత్తున ఎన్నికల ప్రచార కార్యక్రమాలు నిర్వహిస్తున్నాయి. మరోవైపు రాష్ట్రవ్యాప్తంగా ఎన్నికల హీట్ తారాస్థాయికి చేరింది. తెలంగాణలో పదికి పైగా ఎంపీ సీట్లు గెలుచుకోవాలని బీజేపీ ప్రయత్నం చేస్తుంది
- By Praveen Aluthuru Published Date - 04:00 PM, Fri - 12 April 24
Telangana: తెలంగాణలో లోక్‌సభ ఎన్నికల పోలింగ్‌కు సర్వం సిద్ధమైంది. అధికారం కోసం కాంగ్రెస్, బీజేపీ భారీ ఎత్తున ఎన్నికల ప్రచార కార్యక్రమాలు నిర్వహిస్తున్నాయి. మరోవైపు రాష్ట్రవ్యాప్తంగా ఎన్నికల హీట్ తారాస్థాయికి చేరింది. తెలంగాణలో పదికి పైగా ఎంపీ సీట్లు గెలుచుకోవాలని బీజేపీ ప్రయత్నం చేస్తుంది.. అధికారం కోల్పోయిన బీఆర్ఎస్ లోకసభ ఎన్నికల్లో గెలిచి రాష్ట్రంలో కాస్త ప్రభావం చూపించాలని భావిస్తుంది. ఈ నేపథ్యంలో బీజేపీ, బీఆర్ఎస్ పార్టీలు అధికార పార్టీ కాంగ్రెస్ ని ఇరుకున పెట్టేందుకు సిద్ధమయ్యాయి.
అసెంబ్లీ ఎన్నికల్లో ఇచ్చిన 6 హామీలను అమలు చేయలేదని అధికార పార్టీ చెబుతున్నా నాలుగు హామీలను నెరవేర్చడంలో విఫలమైన కాంగ్రెస్‌ను ఇరుకున పెట్టేందుకు ప్రతిపక్ష బీఆర్ఎస్, బీజేపీ ప్రయత్నాలు చేస్తున్నాయి. హామీలు మరియు మిగిలిన హామీలను నెరవేర్చాలని, అలాగే ఓటర్లని నమ్మించిన కాంగ్రెస్ మోసం చేసిందని ప్రజల్లోకి బలంగా తీసుకెళ్తున్నాయి. కాంగ్రెస్ ప్రభుత్వం ఇచ్చిన హామీలను 100 రోజుల్లో నెరవేర్చకపోవడంపై బీఆర్ఎస్, బీజేపీ నేతలు టార్గెట్‌ చేస్తూ.. లోక్‌సభ ఎన్నికల్లో ఓట్లు అడిగే నైతిక హక్కు అధికార పార్టీకి లేదంటున్నారు. ఒక్క హామీని కూడా పూర్తిగా అమలు చేయడంలో కాంగ్రెస్ విఫలమైందని ప్రతిపక్షాలు ఆరోపిస్తున్నాయి.
డిసెంబరు 9న రేవంత్ రెడ్డి నేతృత్వంలోని ప్రభుత్వం అధికారంలోకి వచ్చిన రెండు రోజుల తర్వాత, టిఎస్‌ఆర్‌టిసి బస్సులలో మహిళలకు ఉచిత ప్రయాణ సౌకర్యాన్ని మరియు రాజీవ్ ఆరోగ్యశ్రీ కింద 5 లక్షల నుండి రూ. 10 లక్షల హామీలపై క్లారిటీ ఇచ్చింది. ఇక ప్రతి ఇంటికి 200 యూనిట్ల ఉచిత విద్యుత్, రూ. 500కి వంటగ్యాస్ సిలిండర్‌ అనే మరో రెండు హామీల అమలును ఫిబ్రవరి 27న ముఖ్యమంత్రి రేవంత్ రెడ్డి ప్రారంభించారు. మార్చి 11న ముఖ్యమంత్రి పేదల కోసం ఇందిరమ్మ ఇండ్లు పథకాన్ని ప్రారంభించారు. ఈ పథకం కింద ప్రభుత్వం మహిళల పేరుతో ఇళ్ల స్థలాలు పంపిణీ చేయడంతోపాటు ఇళ్ల నిర్మాణానికి రూ.5 లక్షల ఆర్థిక సాయం అందజేస్తుంది. రూ.22,500 కోట్లతో 4.50 లక్షల ఇందిరమ్మ ఇళ్లను మంజూరు చేసింది.
తెల్ల రేషన్ కార్డులు ఉన్న కుటుంబాలు నెలకు 200 యూనిట్ల వరకు విద్యుత్ వినియోగిస్తున్న వారు మార్చి నుంచి జీరో సబ్సిడీ పొందుతున్నారు. 10 లక్షల మంది వినియోగదారులకు జీరో బిల్లులు జారీ చేసినట్లు విద్యుత్ పంపిణీ సంస్థలు తెలిపాయి. అయితే అర్హులైన చాలా మందికి ఈ పధకాలు అందడం లేదని ప్రతిపక్షాలు దుమ్మెత్తిపోస్తున్నాయి. మార్చిలో జీరో బిల్లులు పొందిన కొందరు ఏప్రిల్‌లో రెండు నెలల బిల్లులు జారీ చేయడంతో గందరగోళం నెలకొంది. అదే విధంగా తెల్ల రేషన్ కార్డుదారులు రూ.500లకే వంటగ్యాస్ సిలిండర్లు పొందుతున్నారు. ఈ పథకం ద్వారా మొత్తం 40 లక్షల కుటుంబాలకు లబ్ధి చేకూరుతుందని ప్రభుత్వం తెలిపింది. అయితే చాలా కుటుంబాలు గ్యాస్ సబ్సిడీ పథకానికి అర్హులైనప్పటికీ తమను పక్కనబెట్టారని వాపోతున్నారు.
We’re now on WhatsApp. Click to Join
మరోవైపు అధికార పార్టీ నేతలు మోడల్ కోడ్ ఆఫ్ కాండక్ట్‌ను సాకుగా చూపి పథకాలను లబ్దిదారులకు అందించడం లేదని ప్రతిపక్షాలు ఆరోపిస్తున్నాయి. అయితే అర్హులైన కుటుంబాలన్నింటికీ లబ్ధి చేకూరేలా చూస్తామని ప్రభుత్వం ప్రజలకు భరోసా ఇస్తున్నారు. విపక్షాలు అసత్య ప్రచారం చేస్తున్నప్పటికీ ప్రభుత్వం హామీల అమలుకు కట్టుబడి ఉందని కాంగ్రెస్ చెప్తున్నది. సోనియాగాంధీ ఇచ్చిన ఏ ఒక్క హామీని కూడా ఈ ప్రభుత్వం వెనక్కి తీసుకునే ప్రశ్నే లేదని ముఖ్యమంత్రి రేవంత్ రెడ్డి ఇటీవల ఓ బహిరంగ సభలో అన్నారు.
గత ఎన్నికల సమయంలో కాంగ్రెస్ ‘మహాలక్ష్మి’, ‘రైతు భరోసా’, ‘గృహ జ్యోతి’, ‘ఇందిరమ్మ ఇండ్లు’, ‘యువ వికాసం’, ‘చేయూత’ అనే ఆరు హామీల కింద మహిళలు, రైతులు, యువత, నిరాశ్రయులు, వృద్ధులకు వివిధ హామీలు ఇచ్చారు. ప్రతి మహిళకు రూ.2,500 ఆర్థిక సహాయం, వృద్ధులకు నెలవారీ రూ.4,000, కౌలు రైతులతో సహా రైతులకు ఎకరాకు రూ.15,000 వార్షిక పెట్టుబడి సాయం, వ్యవసాయ కూలీలకు రూ.12,000 వంటి పథకాలపై కాంగ్రెస్ కట్టుబడి ఉందంటూ చెప్పుకొస్తుంది.
