PV Narasimha Rao : 20 ఏళ్ల తర్వాత కాంగ్రెస్ హెడ్ క్వార్టర్‌లో పీవీ నరసింహారావు ఫొటోలు

PV Narasimha Rao : తెలుగువాళ్లంతా గర్వించే గొప్ప నేత పీవీ నరసింహారావు . గతంలో మన దేశానికి ప్రధానమంత్రిగా సేవలు అందించే గొప్ప అవకాశం ఆయనకు లభించింది. తెలంగాణ ముద్దుబిడ్డ పీవీ నరసింహారావు 83 ఏళ్ల వయసులో 2004 సంవత్సరం డిసెంబరు 23న కన్నుమూశారు.  ఆయన ఈ లోకాన్ని భౌతికంగా వదిలిపెట్టి అప్పుడే 20 ఏళ్లు గడిచిపోయాయి. మొన్నటి వరకు కాంగ్రెస్ పార్టీ ప్రధాన కార్యాలయం ఢిల్లీలోని అక్బర్ రోడ్ 24వ నంబరు బంగ్లాలో ఉండేది. తాజాగా బుధవారం రోజు కాంగ్రెస్ పార్టీ హెడ్ క్వార్టర్‌ను ఢిల్లీలోని ‘9A కోట్లా మార్గ్’‌లో ఉన్న నూతన భవనంలోకి మార్చారు. దీనికి ఇందిరా భవన్ అని పేరు పెట్టారు. కాంగ్రెస్ పార్టీ పాత ఆఫీసులో మన పీవీ నరసింహారావు ఫొటో ఉండేది కాదు. అయితే  కొత్తగా ఏర్పాటు చేసిన ఆఫీసులో పీవీ ఫొటోను(PV Narasimha Rao) ఏర్పాటు చేశారు. కాంగ్రెస్ హెడ్ క్వార్టర్ ప్రారంభోత్సవం సందర్భంగా పార్టీకి చెందిన ఆరుగురు మాజీ ప్రధానమంత్రులు జవహర్‌లాల్ నెహ్రూ, లాల్ బహదూర్ శాస్త్రి, ఇందిరా గాంధీ, రాజీవ్ గాంధీ, పీవీ నర్సింహా రావు, మన్మోహన్ సింగ్‌ల పాలనలో సాధించిన విజయాలు, సంస్కరణలపై ప్రత్యేక వీడియోను ప్రసారం చేశారు. దీనిపై తెలుగు ప్రజల్లో, నేతల్లో హర్షాతిరేకాలు వ్యక్తం అవుతున్నాయి. కష్టకాలంలో కాంగ్రెస్ పార్టీకి సారథ్యం వహించిన ఘనుడిగా, దేశ ఆర్థిక వ్యవస్థలో సంస్కరణల బాటను వేసిన ధీరుడిగా పీవీని భారతదేశ చరిత్ర ఎప్పటికీ గుర్తుంచుకుంటుంది.గత సంవత్సరం మాజీ ప్రధాని పీవీకి కేంద్ర ప్రభుత్వం భారతరత్న పురస్కారాన్ని సైతం ప్రకటించింది.