Land Scam: ఆదిలాబాద్‌లో భారీ భూ కుంభకోణం వెలుగులోకి!

Land Scam: ఆదిలాబాద్ జిల్లాలో కోట్ల రూపాయల విలువైన ప్రభుత్వ భూమిని నకిలీ పత్రాలతో రిజిస్టర్ చేసుకున్న ఒక పెద్ద కుంభకోణం (Land Scam) వెలుగులోకి వచ్చింది. ఈ వ్యవహారంలో ప్రభుత్వ ఉద్యోగులు, రియల్ ఎస్టేట్ ఏజెంట్లతో కూడిన ముఠా పట్టుబడింది. ‘మెసేజ్ యువర్ ఎస్పీ’ కార్యక్రమం ద్వారా బాధితుల ఫిర్యాదుతో ఈ మోసం బయటపడింది. మావల పోలీసులు ఈ కేసులో ముగ్గురు నిందితులను అరెస్ట్ చేయగా, మరో కీలక నిందితుడు పరారీలో ఉన్నాడు.

కుంభకోణం వివరాలు

సెప్టెంబర్ 20న మావల పోలీసులు చేపట్టిన ఆపరేషన్‌లో ఈ కుంభకోణం బట్టబయలైంది. ఆదిలాబాద్ పట్టణంలోని టీచర్స్ కాలనీకి చెందిన ఆర్డబ్ల్యూఎస్ డీఈఈ నానం వెంకటరమణ, మావలకు చెందిన ఉష్క మల్ల రఘుపతి, రిమ్స్ ఆయుష్ విభాగం ప్రభుత్వ ఉద్యోగి బెజ్జవార్ సంజీవ్‌కుమార్‌లను పోలీసులు అరెస్టు చేశారు. ఈ ముఠా సుమారు రూ. 2 కోట్ల విలువైన 7 ప్లాట్లను నకిలీ పత్రాలతో అక్రమంగా రిజిస్టర్ చేసుకుంది.

Also Read: IND vs PAK: మ‌రికాసేపట్లో భార‌త్‌- పాక్ మ్యాచ్‌.. వాతావరణం ఎలా ఉంటుంది?

ఎలా జరిగింది?

బాధితుడు మిలింద్ కొర్తల్‌వార్ ఫిర్యాదుతో ఈ కేసు వెలుగులోకి వచ్చింది. మిలింద్‌కు చెందిన ప్లాట్లను ఈ ముఠా అక్రమంగా ఆక్రమించింది. ఈ ప్లాట్లకు సంబంధించిన అసలైన పత్రాలు బాధితుడి వద్ద ఉన్నప్పటికీ నిందితులు నకిలీ పత్రాలను సృష్టించి అక్రమంగా వాటిని రిజిస్టర్ చేసుకున్నారు. ఈ మోసానికి సబ్‌ రిజిస్ట్రార్ దుప్పలపూడి అశోక్‌కు రూ. 7 లక్షలు లంచం ఇచ్చి అదే ప్లాట్లను మళ్లీ రిజిస్టర్ చేసుకున్నట్లు పోలీసులు తెలిపారు. ఈ వ్యవహారం వెలుగులోకి వచ్చినప్పటి నుంచి సబ్ రిజిస్ట్రార్ అశోక్ పరారీలో ఉన్నాడు.

పోలీసుల చర్యలు

ఈ కేసులో మావల పోలీసులు తీవ్రంగా స్పందించారు. అరెస్టైన ముగ్గురు నిందితులపై IPC సెక్షన్లు 447, 427, 420, 467, 468, 471, 120-B కింద కేసులు నమోదు చేశారు. పరారీలో ఉన్న సబ్ రిజిస్ట్రార్ దుప్పలపూడి అశోక్‌పైనా కేసు నమోదు చేశామని, త్వరలో అతడిని పట్టుకుంటామని మావల సీఐ కర్ర స్వామి మీడియాకు వెల్లడించారు. ఈ భూకుంభకోణంలో మరికొందరు ఉన్నారా అనే దానిపై విచారణ కొనసాగుతోందని పోలీసులు తెలిపారు. ఈ ఘటనతో ఆదిలాబాద్‌లో భూ రిజిస్ట్రేషన్ల విషయంలో ప్రభుత్వ కార్యాలయాల్లో జరుగుతున్న అక్రమాలపై అనుమానాలు వ్యక్తమవుతున్నాయి.