Dream 11: ఆన్‌లైన్ గేమింగ్ బిల్ 2025తో డ్రీమ్11, మై 11 సర్కిల్‌లకు భారీ షాక్!

Dream 11: భారతదేశంలో ఆన్‌లైన్ గేమింగ్ రంగంలో విప్లవాత్మక మార్పులు తీసుకొచ్చేందుకు ఉద్దేశించిన ఆన్‌లైన్ గేమింగ్ బిల్ 2025 ఇప్పుడు చట్టంగా మారింది. పార్లమెంటు ఉభయ సభల్లోనూ ఆమోదం పొందిన ఈ బిల్లుకు రాష్ట్రపతి ఆమోదం లభించడంతో ఇకపై ఆన్‌లైన్ గేమింగ్ సంస్థలు తమ ఆర్థిక కార్యకలాపాలను పూర్తిగా మార్చుకోవాల్సి వస్తుంది. ఈ కొత్త చట్టం ముఖ్యంగా డబ్బును నేరుగా లావాదేవీలు చేసే ప్లాట్‌ఫారమ్‌లపై దృష్టి సారించింది. ఫలితంగా డ్రీమ్11 (Dream 11), మై 11 సర్కిల్ వంటి ప్రముఖ ఫాంటసీ గేమింగ్ యాప్‌లకు భారీ షాక్ తగిలింది.

ఇప్పటివరకు ఈ యాప్‌లు తమ వినియోగదారుల నుంచి డబ్బును వసూలు చేసి విజేతలకు నగదు బహుమతులను అందజేసేవి. అయితే కొత్త చట్టం ప్రకారం.. ఆన్‌లైన్ గేమింగ్ కంపెనీలు ఇకపై తమ వినియోగదారులతో నేరుగా ఆర్థిక లావాదేవీలు జరపకూడదు. ఈ కఠినమైన నిబంధనల నేపథ్యంలో డ్రీమ్11 తన వ్యాపార నమూనాలో గణనీయమైన మార్పులు తీసుకువచ్చింది. నగదు బహుమతులకు బదులుగా, వినియోగదారులకు ఖరీదైన గిఫ్ట్‌లు ఇవ్వాలని నిర్ణయించుకుంది.

Also Read: Lionel Messi: 2026 ప్రపంచ కప్ త‌ర్వాత ఫుట్‌బాల్‌కు గుడ్ బై చెప్పనున్న మెస్సీ?!

ఈ కొత్త విధానం ప్రకారం.. గేమ్‌లో మొదటి ర్యాంకు సాధించిన వినియోగదారుడికి కొత్త XUV కారు బహుమతిగా లభిస్తుంది. అలాగే రెండో ర్యాంకు సాధించిన వారికి రూ. 50,000 విలువైన బంగారం ఇవ్వనున్నారు. ఈ మార్పు కేవలం డ్రీమ్11కు మాత్రమే పరిమితం కాదు ఈ చట్టం పరిధిలోకి వచ్చే అన్ని గేమింగ్ సంస్థలకూ ఇది వర్తిస్తుంది. ఈ చట్టం ప్రధాన లక్ష్యం గేమింగ్ ప్రపంచంలో జరిగే డబ్బు సంబంధిత మోసాలను అరికట్టడం, ప్రజల ఆర్థిక భద్రతను పెంపొందించడం. దీని ద్వారా గేమింగ్ వ్యసనం వల్ల ప్రజలు కోల్పోయే డబ్బును కొంతవరకు నియంత్రించవచ్చని ప్రభుత్వం భావిస్తోంది.

ఈ మార్పులు ఆన్‌లైన్ గేమింగ్ పరిశ్రమలో ఒక కొత్త అధ్యాయానికి నాంది పలికాయి. భవిష్యత్తులో మరిన్ని గేమింగ్ కంపెనీలు తమ వ్యాపార పద్ధతులను ఈ కొత్త చట్టానికి అనుగుణంగా మార్చుకోవాల్సి ఉంటుంది. దీనివల్ల వినియోగదారులు కూడా మోసాలకు గురికాకుండా తమను తాము రక్షించుకోవడానికి అవకాశం లభిస్తుంది. మొత్తంగా ఈ చట్టం ఆన్‌లైన్ గేమింగ్‌లో పారదర్శకతను, నియంత్రణను తీసుకొచ్చి, ప్రజల ప్రయోజనాలను కాపాడనుంది.