WTC Final 2025: వరల్డ్ టెస్ట్ ఛాంపియన్‌షిప్ ఫైనల్ మ్యాచ్ డ్రా అయితే విజేత‌ను ఎలా ప్ర‌క‌టిస్తారు?

WTC Final 2025: ఐసీసీ వరల్డ్ టెస్ట్ ఛాంపియన్‌షిప్ ఫైనల్ 2025 (WTC Final 2025) సౌత్ ఆఫ్రికా, ఆస్ట్రేలియా మధ్య జరగనుంది. ఈ మ్యాచ్ లండన్‌లోని లార్డ్స్ క్రికెట్ గ్రౌండ్‌లో జరుగుతుంది. జూన్ 11 నుంచి 15 వరకు జరిగే ఈ మ్యాచ్‌లో వర్షం పడే అవకాశం ఉంది. అయితే ఒకవేళ ఈ మ్యాచ్ డ్రా అయితే విజేత ఎవరు? ఏ నియమం అమలులో ఉంటుంది? రిజర్వ్ డే గురించి ఏమిటి? ఇప్పుడు తెలుసుకుందాం.

ఇది ఐసీసీ వరల్డ్ టెస్ట్ ఛాంపియన్‌షిప్ మూడవ ఫైనల్. మొదటి ఎడిషన్ ఫైనల్‌లో న్యూజిలాండ్ భారత్‌ను ఓడించి టైటిల్ గెలుచుకుంది. రెండవ ఫైనల్‌లో ఆస్ట్రేలియా భారత్‌ను ఓడించింది. ఈసారి భారత్ ఫైనల్‌కు చేరుకోలేకపోయింది. బావుమా కెప్టెన్సీలో సౌత్ ఆఫ్రికా మొదటిసారి డబ్ల్యూటీసీ ఫైనల్ ఆడనుంది. ఇక ఆస్ట్రేలియా వరుసగా రెండోసారి ఫైనల్‌కు చేరుకుంది. తమ రెండో టైటిల్‌ను గెలవాలని కోరుకుంటోంది. ఈ టైటిల్ ఘర్షణ కోసం ఒక రిజర్వ్ డే కూడా ఉందని ఐసీసీ ప్ర‌క‌టించింది.

Also Read: Telangana Cabinet Expansion: తెలంగాణ కొత్త మంత్రులు వీరే.. నేడే ప్ర‌మాణ స్వీకారం!

WTC ఫైనల్ 2025 షెడ్యూల్

• తేదీ: జూన్ 11 నుంచి 15 వరకు
• రిజర్వ్ డే: జూన్ 16
• సమయం: భారత కాలమానం ప్రకారం మధ్యాహ్నం 3 గంటల నుంచి
• వేదిక: లార్డ్స్ క్రికెట్ గ్రౌండ్

డబ్ల్యూటీసీ ఫైనల్‌లో ఒక రిజర్వ్ డే ఉంది. ఇది వర్షం కారణంగా మ్యాచ్ అంతరాయం కలిగినప్పుడు లేదా తక్కువ కాంతి కారణంగా మ్యాచ్ ముందుగా ముగిసినప్పుడు ఆడే సమయాన్ని భర్తీ చేయడానికి నిర్ణయించబడింది. ఒకవేళ మ్యాచ్ డ్రా అయితే? ఏ నియమం అమలవుతుంది? ఇప్పుడు తెలుసుకుందాం.

WTC 2025 ఫైనల్‌లో వర్షం వస్తే విజేత ఎవరు?

డబ్ల్యూటీసీ 2023-25 పాయింట్స్ టేబుల్‌లో సౌత్ ఆఫ్రికా మొదటి స్థానంలో.. ఆస్ట్రేలియా రెండో స్థానంలో నిలిచింది. అయితే ఫైనల్ మ్యాచ్ డ్రా అయితే దీని ఆధారంగా విజేతను ప్రకటించరు. నియమం 16.3.3 ప్రకారం.. ఫైనల్ డ్రా అయితే రెండు జట్లను సంయుక్త విజేతలుగా ప్రకటిస్తారు. అలాగే బహుమతి డబ్బు రెండు జట్ల మధ్య సమానంగా పంచనున్నారు.

డబ్ల్యూటీసీ విజేత 2025 ప్రైజ్ మ‌నీ!

వరల్డ్ టెస్ట్ ఛాంపియన్‌షిప్ ఫైనల్ గెలిచిన జట్టుకు 3,600,000 యూఎస్ డాలర్లు లభిస్తాయి. ఇది భారత కరెన్సీలో సుమారు 30 కోట్ల రూపాయలు. రన్నరప్ అంటే ఓడిన జట్టుకు సుమారు 18 కోట్ల రూపాయలు లభిస్తాయి.

లార్డ్స్ క్రికెట్ గ్రౌండ్ పిచ్ రిపోర్ట్, వాతావరణ నివేదిక

లండన్‌లో జూన్ 11కి ముందు, తర్వాత కూడా వర్షం పడే అవకాశం ఉంది. వాతావరణ నివేదిక ప్రకారం.. జూన్ 11 నుంచి 15 వరకు నగరంలో మేఘావృతమైన వాతావరణం ఉంటుంది. వర్షం పడే అవ‌కాశాలు ఎక్కువ ఉన్నాయి.

లార్డ్స్ క్రికెట్ గ్రౌండ్ పిచ్ వేగవంతమైన బౌలర్లకు సహాయకరంగా ఉంటుంది. ఇక్కడ మంచి బౌన్స్, స్వింగ్ లభిస్తుంది. మొదటి ఇన్నింగ్స్‌లో ఇక్కడ సగటు స్కోరు 310. ఆట ముందుకు సాగేకొద్దీ బ్యాట్స్‌మెన్‌లకు ఇక్కడ మరింత సవాలుగా మారుతుంది. ఈ మ్యాచ్‌లో బౌలింగ్ బాగా చేసిన జట్టు విజయం సాధించే అవకాశం ఉంది. ఇప్పటివరకు ఇక్కడ 147 టెస్ట్ మ్యాచ్‌లు జరిగాయి. ఇందులో మొదట బ్యాటింగ్ చేసిన జట్టు 53 సార్లు, మొదట బౌలింగ్ చేసిన జట్టు 43 సార్లు గెలిచాయి.