Shubman Gill: భార‌త్ చెత్త రికార్డును మార్చ‌లేక‌పోతున్న శుభ‌మ‌న్ గిల్‌!

Shubman Gill: భారత క్రికెట్ జట్టు కెప్టెన్లు టాస్‌ల విషయంలో దారుణమైన రికార్డును కొనసాగిస్తున్నారు. వరుసగా 14 అంతర్జాతీయ మ్యాచ్‌ల్లో టాస్ గెలవలేకపోవడంతో టీమిండియా చెత్త రికార్డుల జాబితాలో అగ్రస్థానంలో నిలిచింది. తాజాగా ఇంగ్లండ్‌తో మాంచెస్టర్‌లోని ఓల్డ్ ట్రాఫోర్డ్‌లో జరుగుతున్న నాల్గవ టెస్ట్‌లో కూడా కెప్టెన్ శుభ్‌మన్ గిల్ (Shubman Gill) టాస్ ఓడిపోయాడు. ఇంగ్లండ్ కెప్టెన్ బెన్ స్టోక్స్ టాస్ గెలిచి మొదట బౌలింగ్ ఎంచుకున్నాడు.

టాస్ ఓటమిలో ప్రపంచ రికార్డు

భారత్ చివరిసారిగా ఈ ఏడాది జనవరిలో ఇంగ్లండ్‌తో జరిగిన టీ20 మ్యాచ్‌లో టాస్ గెలిచింది. పురుషుల అంతర్జాతీయ క్రికెట్‌లో అత్యధిక టాస్‌లు కోల్పోయిన రికార్డు గతంలో వెస్టిండీస్ పేరిట ఉండేది. వారు 1999లో వరుసగా 12 టాస్‌లు కోల్పోయారు. ఇంగ్లండ్ జట్టు కూడా వరుసగా 11 టాస్‌లు కోల్పోయి ఈ జాబితాలో ఉంది. ఇప్పుడు భారత్ వరుసగా 14 మ్యాచ్‌ల్లో టాస్ కోల్పోయి ఈ చెత్త రికార్డును సొంతం చేసుకుంది.

Also Read: Minister Lokesh: మంత్రి లోకేష్ చొరవతో విశాఖకు పెట్టుబడుల వరద.. 50 వేల ఉద్యోగాలు!

టాస్ కోల్పోయిన కెప్టెన్లు

ప్రస్తుతం మూడు ఫార్మాట్‌లలో భారత జట్టు కెప్టెన్సీని ముగ్గురు వేర్వేరు ఆటగాళ్లు నిర్వహిస్తున్నారు. ఈ సమయంలో టాస్ కోల్పోయిన భారత కెప్టెన్లలో రోహిత్ శర్మ, సూర్యకుమార్ యాదవ్, శుభ్‌మన్ గిల్ ఉన్నారు. శుభ్‌మన్ గిల్ ఇంగ్లండ్‌తో జరుగుతున్న టెస్ట్ సిరీస్‌లో తన కెప్టెన్సీ డెబ్యూ చేశాడు. అయితే కెప్టెన్‌గా అతను ఇప్పటివరకు ఆడిన నాలుగు టెస్ట్ మ్యాచ్‌లలోనూ టాస్ కోల్పోయాడు. భారత్ తరపున చివరిసారిగా టాస్ గెలిచిన కెప్టెన్ సూర్యకుమార్ యాదవ్. వన్డే మ్యాచ్‌లలో మాత్రమే భారత జట్టు వరుసగా 15 టాస్‌లు కోల్పోయిన రికార్డును కలిగి ఉంది.

మాంచెస్టర్ టెస్ట్, టాస్ ప్రాముఖ్యత

శుభ్‌మన్ గిల్ మాంచెస్టర్ టెస్ట్‌లో టాస్ కోల్పోయినప్పటికీ టీమిండియాకు మొదట బ్యాటింగ్ చేసే అవకాశం లభించింది. అయినప్పటికీ గిల్ తాము మొదట బ్యాటింగ్ చేయాలని కోరుకున్నామని చెప్పాడు. గణాంకాలను పరిశీలిస్తే ఓల్డ్ ట్రాఫోర్డ్ మైదానంలో టాస్ గెలిచి మొదట బౌలింగ్ ఎంచుకున్న జట్టు ఇప్పటివరకు విజయం సాధించలేదు. ఈ అంశం భారత జట్టుకు కొంత సానుకూల అంశం కావచ్చని క్రీడా పండితులు భావిస్తున్నారు.