Shreyas Iyer: శ్రేయ‌స్ అయ్య‌ర్‌పై ప్ర‌శంస‌లు కురిపించిన టీమిండియా మాజీ క్రికెట‌ర్‌!

Shreyas Iyer: టీమ్ ఇండియా స్టార్ ఆటగాడు శ్రేయస్ అయ్యర్ (Shreyas Iyer) ప్రస్తుతం భారత టీ20, వన్డే జట్లకు దూరంగా ఉన్నాడు. అయితే రాబోయే ఆస్ట్రేలియా సిరీస్‌కు మాత్రం అతని ఎంపిక జరిగింది. 2024లో ఇంగ్లండ్‌తో జరిగిన చివరి టెస్ట్ మ్యాచ్‌ను భారత్ తరఫున ఆడాడు. ఇక చివరి టీ20 మ్యాచ్‌ను 2023లో ఆడాడు. అయితే ఇప్పుడు అయ్యర్‌కు ఒక పెద్ద శుభవార్త అందబోతోంది. దీని గురించి మాజీ క్రికెటర్ మహ్మద్ కైఫ్ ఒక భారీ అంచనా వేశారు.

మహ్మద్ కైఫ్ చేసిన పెద్ద అంచనా

మహ్మద్ కైఫ్.. శ్రేయస్ అయ్యర్‌ను కొనియాడటంతో పాటు త్వరలో అతనికి జట్టులో స్థానం దక్కుతుందని జోస్యం చెప్పారు. అయ్యర్ ఎంపిక త్వరలోనే జరుగుతుందని ఆయన నమ్ముతున్నారు. ఈ మేరకు ఆయన ‘ఎక్స్’ (గతంలో ట్విట్టర్) వేదికగా ఇలా పోస్ట్ చేశారు. “శ్రేయస్ అయ్యర్‌ని కలవడం చాలా సంతోషంగా ఉంది. ఎంత గొప్ప ఆటగాడు! టెస్ట్ అరంగేట్రంలోనే సెంచరీ, 2023 వన్డే ప్రపంచ కప్ హీరో, మూడు ఐపీఎల్ జట్లను ఫైనల్స్‌కు చేర్చిన ఏకైక కెప్టెన్. టీ20 జాతీయ జట్టులో కూడా ఎంపిక అవుతాడు. ఓపిక పట్టు, అద్భుతమైన భవిష్యత్తు నీ కోసం ఎదురు చూస్తోంది. శ్రేయస్” అని అన్నారు.

Also Read: Create History : రేపు చరిత్ర సృష్టించబోతున్నాం – మంత్రి లోకేశ్

ఆస్ట్రేలియాపై కీలక బాధ్యత

ఆస్ట్రేలియాతో జరగబోయే వన్డే సిరీస్‌కు శ్రేయస్ అయ్యర్‌కు కీలక బాధ్యత అప్పగించారు. అతన్ని జట్టుకు వైస్‌-కెప్టెన్‌గా నియమించారు. దీనికి ముందు అయ్యర్ భారత్ తరఫున చివరి మ్యాచ్ ఛాంపియన్స్ ట్రోఫీ ఫైనల్‌లో ఆడాడు. ఆ తర్వాత ఇప్పుడు అక్టోబర్ 19 నుంచి జరగనున్న ఆస్ట్రేలియాతో సిరీస్‌లో కనిపించనున్నాడు.

శ్రేయస్ అయ్యర్ కెరీర్ వివరాలు

శ్రేయస్ అయ్యర్ కెరీర్‌ను పరిశీలిస్తే అతను ఇప్పటి వరకు భారత్ తరఫున 14 టెస్ట్ మ్యాచ్‌ల్లో 36.86 సగటుతో 811 పరుగులు చేశాడు. 70 వన్డే మ్యాచ్‌ల్లో 48.22 సగటుతో 2845 పరుగులు సాధించాడు. 51 టీ20 మ్యాచ్‌ల్లో ఈ కుడిచేతి వాటం బ్యాట్స్‌మెన్ 30.66 సగటుతో 1104 పరుగులు చేశాడు.