DK Shivakumar : కర్ణాటక రాజకీయాల్లో సంచలనం.. అసెంబ్లీలో డీకే శివకుమార్ ఆర్ఎస్ఎస్ గీతం

Dk Shivakumar

DK Shivakumar : కర్ణాటక రాజకీయాల్లో ఊహించని పరిణామం చోటుచేసుకుంది. రాష్ట్ర ఉప ముఖ్యమంత్రి, కాంగ్రెస్ సీనియర్ నేత డీకే శివకుమార్ అసెంబ్లీ సభా వేదికపైనే రాష్ట్రీయ స్వయంసేవక్ సంఘ్ (ఆర్ఎస్ఎస్) గీతాన్ని పాడి అందరినీ ఆశ్చర్యపరిచారు. ఈ సంఘటన ఒక్కసారిగా రాజకీయ వేడిని పెంచగా, కాంగ్రెస్ ఇరుకులో పడింది. మరోవైపు, బీజేపీకి మాత్రం ఇది అచ్చొచ్చిన ఆయుధంలా మారింది. ఇటీవల బెంగళూరులోని చిన్నస్వామి స్టేడియం వద్ద జరిగిన తొక్కిసలాట ఘటనపై కర్ణాటక అసెంబ్లీలో చర్చ కొనసాగుతోంది. ఈ సందర్భంగా ప్రతిపక్ష నేత ఆర్. అశోక మాట్లాడుతూ – “డీకే శివకుమార్ ఒకప్పుడు ఆర్ఎస్ఎస్ నిక్కర్ (పాత యూనిఫాం) ధరించేవారు” అని వ్యాఖ్యానించారు. ఈ వ్యాఖ్యపై సరదాగా స్పందించిన శివకుమార్, తన సీటు నుంచి లేచి, ఆర్ఎస్ఎస్ గీతమైన “నమస్తే సదా వత్సలే మాతృభూమి” పాడటం ప్రారంభించారు. అ అకస్మాత్తుగా జరిగిన ఈ ఘటనతో సభలో ఒక క్షణం హాస్యాస్పద వాతావరణం నెలకొనగా, అనంతరం ఇది తీవ్ర రాజకీయ చర్చకు దారితీసింది.

ఈ సంఘటనకు సంబంధించిన వీడియో బయటకు రావడంతో బీజేపీ వెంటనే దాడి ప్రారంభించింది. బీజేపీ జాతీయ అధికార ప్రతినిధి ప్రదీప్ భండారీ మాట్లాడుతూ.. “ప్రధాని మోదీ స్వాతంత్య్ర దినోత్సవ ప్రసంగంలో ఆర్ఎస్ఎస్ ప్రస్తావించారని కాంగ్రెస్ విమర్శించింది. కానీ ఇప్పుడు అదే కాంగ్రెస్ నాయకులు ఆ సంస్థ గీతాలు పాడుతున్నారు. ఇది కాంగ్రెస్ ద్వంద్వ వైఖరికి నిదర్శనం” అని ఎద్దేవా చేశారు. అలాగే, “డీకే శివకుమార్ ఆర్ఎస్ఎస్ గీతం పాడితే రాహుల్ గాంధీ, ఆయన బృందం షాక్‌కు గురై ఉంటారు. కాంగ్రెస్‌లో ఆయన నాయకత్వాన్ని ఎవరూ సీరియస్‌గా తీసుకోవడం లేదని ఇది చూపిస్తోంది” అని పేర్కొన్నారు.

Chiru Birthday : ”వన్ అండ్ ఓన్లీ మెగాస్టార్” అంటూ అల్లు అర్జున్ ట్వీట్..దారికి వచ్చినట్లేనా..?

రాజకీయంగా పెద్ద ఎత్తున విమర్శలు రావడంతో డీకే శివకుమార్ స్పష్టతనిచ్చారు. తాను పుట్టుకతోనే కాంగ్రెస్ వాడినని, జీవితాంతం కాంగ్రెస్‌లోనే కొనసాగుతానని ఆయన స్పష్టం చేశారు. “నేను ఎవరినైనా శత్రువులుగా చూడను. ప్రతి ఒక్కరినీ అధ్యయనం చేస్తాను. అందుకే ఆర్ఎస్ఎస్ గురించి కూడా తెలుసుకున్నాను. కానీ బీజేపీతో కలిసే ప్రశ్నే లేదు. ప్రతిపక్షాలు ఎగతాళి చేస్తే వాటికి సమాధానం చెప్పడం నా కర్తవ్యం. అందుకే సరదాగా పాడాను. దానికి రాజకీయ రంగు పులమవద్దు” అని ఆయన అన్నారు.

ఈ సంఘటనతో కాంగ్రెస్ అసౌకర్యకర పరిస్థితిలో పడింది. ఎందుకంటే పార్టీ ఉన్నత నాయకత్వం ఎప్పటినుంచో ఆర్ఎస్ఎస్‌ను కఠినంగా విమర్శిస్తోంది. కానీ కాంగ్రెస్ ఉప ముఖ్యమంత్రి అసెంబ్లీలోనే ఆ సంస్థ గీతం పాడటం, బీజేపీకి భారీ బలమిచ్చింది.
రాజకీయ విశ్లేషకుల అభిప్రాయం ప్రకారం, ఈ ఘటన కాంగ్రెస్‌లో వ్యూహాత్మక గందరగోళాన్ని బయటపెట్టగా, బీజేపీకి మాత్రం రాబోయే ఎన్నికల ప్రచారంలో దూకుడు చూపించేందుకు కొత్త అస్త్రం అందించినట్టయింది. ఏదేమైనా, డీకే శివకుమార్ ఒక సరదా చర్యగా చేసిన ఈ ఆలాపన, ఇప్పుడు కర్ణాటక రాజకీయాల్లో కొత్త చర్చకు కేంద్ర బిందువుగా మారింది.

OpenAI : భారత్‌లో ఓపెన్‌ఏఐ దృష్టి.. ఢిల్లీలో తొలి కార్యాలయం

Follow us