Chhattisgarh : భారీ ఎన్‌కౌంటర్‌.. 20 మంది నక్సల్స్‌ మృతి..!

Chhattisgarh : బస్తర్‌ అటవీ ప్రాంతాల్లో మావోయిస్టుల నిర్మూలన దిశగా భద్రతా బలగాలు మరో కీలక విజయాన్ని నమోదు చేశాయి. ఛత్తీస్‌గఢ్‌లోని బీజాపూర్‌ జిల్లాకు ఆనుకుని ఉన్న అటవీ ప్రాంతాల్లో సోమవారం జరిగిన భారీ ఎన్‌కౌంటర్‌లో మొత్తం 20 మంది మావోయిస్టులు మృతి చెందారు. భద్రతా బలగాలు, మావోయిస్టుల మధ్య తీవ్ర కాల్పులు జరగడంతో మావోయిస్టుల తరపున భారీ ప్రాణనష్టం జరిగింది. ఇప్పటివరకు 11 మృతదేహాలకు పోస్టుమార్టం పూర్తయినట్లు అధికారులు తెలిపారు. మిగతా మృతదేహాల గుర్తింపు ప్రక్రియ కొనసాగుతోంది.

Read Also: Nissan : 20 వేల మంది ఉద్యోగుల కోతకు సిద్ధమవుతున్న నిస్సాన్‌.. ?

ఈ ఎన్‌కౌంటర్‌ దేశవ్యాప్తంగా మావోయిస్టులపై కేంద్రం చేస్తున్న ప్రత్యేక ఆపరేషన్లలో భాగంగా జరిగింది. 2007లో ప్రారంభమైన ‘సల్వాజుడుం’ ఉద్యమం ద్వారా మావోయిస్టుల నిర్మూలనకు కేంద్రం నేరుగా జోక్యం చేసుకోవడం మొదలైంది. అదే క్రమంలో ప్రస్తుతం ‘ఆపరేషన్‌ కగార్‌’ పేరిట తుది దశ మిషన్‌ కొనసాగుతోంది. ఈ ఆపరేషన్‌ కీలక ఘట్టంలోకి ప్రవేశించినట్లు భద్రతా వర్గాలు పేర్కొంటున్నాయి. ఇటీవల కేంద్ర హోంశాఖ మంత్రి అమిత్‌ షా చేసిన ప్రకటన ప్రకారం, 2026 మార్చి నాటికి దేశంలో మావోయిస్టు ప్రభావాన్ని పూర్తిగా నిర్మూలిస్తామని కేంద్రం లక్ష్యంగా పెట్టుకుంది. ఈ సందర్భంగా అమిత్‌షా మాట్లాడుతూ.. “మావోయిస్టు భావజాలానికి భారత్‌లో స్థానం లేదని, ప్రజాస్వామ్యానికి భంగం కలిగించే వారిని ఉపేక్షించేది లేదని” స్పష్టం చేశారు.

ఇదిలా ఉండగా, మావోయిస్టుల ఆధిపత్యం గల కీలక ప్రాంతాల్లో భద్రతా బలగాలు తమ ఆక్రమణ చర్యలను మరింత వేగవంతం చేస్తున్నాయి. బీజాపూర్‌, సుక్మా, దంతేవాడ వంటి ప్రాంతాల్లో రెగ్యులర్‌ ఇంటెలిజెన్స్‌ ఆధారంగా కార్యకలాపాలు కొనసాగుతుండటం విశేషం. తాజా ఎన్‌కౌంటర్‌ కూడా గూఢచారుల సమాచారం మేరకే ముందస్తు ప్రణాళికతో నిర్వహించబడిందని సమాచారం. ఈ ఘర్షణతో మావోయిస్టు క్యాడర్‌లో ఆందోళన నెలకొంది. పలువురు కీలక నేతలు మృతి చెందినట్టు సమాచారం ఉన్నప్పటికీ, అధికారికంగా ఇది నిర్ధారణ కాలేదు. భవిష్యత్తులో మరింత మంది మావోయిస్టుల పట్టుబాటుకు, అడ్డగింపుకు భద్రతా బలగాలు రంగంలోకి దిగనున్నట్లు తెలుస్తోంది.

Read Also: UPI Down: మ‌రోసారి యూపీఐ డౌన్‌.. ఫోన్ పే, గూగుల్ పే యూజ‌ర్ల‌కు షాక్‌!