Jr. Artist : ప్రేమ పేరుతో జూ.ఆర్టిస్ట్ ను మోసం చేసిన జిమ్ ట్రైనర్.. 15 లక్షలు స్వాహా

Jr. Artist : హైదరాబాద్‌లో ఒక యువతిని ప్రేమ పేరిట మోసం చేసిన ఘటన వెలుగులోకి వచ్చింది. ఆంధ్రప్రదేశ్‌ రాష్ట్రానికి చెందిన యువతి, సినిమా ఇండస్ట్రీలో జూనియర్ ఆర్టిస్టుగా పనిచేస్తున్న సమయంలో జరిగిన ఈ ఘటన కలకలం రేపుతోంది. 2019లో హైదరాబాద్‌కి వచ్చిన బాధిత యువతి, సినీ పరిశ్రమలో జూనియర్ ఆర్టిస్టుగా ప్రవేశించింది. 2020లో గాయత్రి హిల్స్‌లో నివాసం ఉంటున్న ఓ జిమ్ ట్రైనర్‌తో ఆమెకు పరిచయం ఏర్పడింది. కొద్దికాలంలోనే వీరి పరిచయం ప్రేమగా మారి, సహజీవనంగా కొనసాగింది. అయితే, కొంతకాలానికే ట్రైనర్ ఆమెను దూరం పెట్టడం ప్రారంభించాడు.

జిమ్ ట్రైనర్ పెళ్లి చేయాలనుకోవడం లేదని గ్రహించిన యువతి, ఆంధ్రప్రదేశ్‌లోని తన సొంత ఊరికి వెళ్లిపోయింది. అయితే, 2023 నవంబరులో మళ్లీ హైదరాబాద్‌కి వచ్చిన ఆమెతో తిరిగి సంప్రదింపులు ప్రారంభించిన ట్రైనర్, పెళ్లి చేసుకుంటానని నమ్మించాడు. కానీ పెళ్లికి ఖర్చు అవసరమని చెప్పి ఆమె నుంచి రూ.15 లక్షలు తీసుకున్నాడు.

డబ్బులు ఇచ్చిన కొద్దిరోజులకే ట్రైనర్ మళ్లీ దూరం పెడుతుండడంతో యువతి అతని గురించి విచారణ చేయగా, అతనికి ముందే వివాహమైందన్న విషయం బయటపడింది. తనను మోసం చేశాడని గ్రహించిన ఆమె, అతనికి డబ్బులు ఇవ్వమని అడిగినా తప్పించుకొని తిరుగుతున్నాడని పోలీసులకు ఫిర్యాదు చేసింది.

బాధితురాలి ఫిర్యాదుతో స్పందించిన పోలీసులు జిమ్ ట్రైనర్‌ను అరెస్టు చేసి విచారణ ప్రారంభించారు. ప్రేమ పేరుతో డబ్బులు వసూలు చేసి మోసం చేసిన ఈ ఘటనపై కేసు నమోదు చేసి పోలీసులు తదుపరి దర్యాప్తు చేస్తున్నారు. ఇలాంటి మోసాలపై ప్రజలు అప్రమత్తంగా ఉండాలని, గుర్తింపు లేని సంబంధాల్లో అప్రమత్తత అవసరమని పోలీస్ అధికారులు సూచిస్తున్నారు.

RajaSaab Teaser : రాజాసాబ్ టీజర్ మామూలుగా లేదుగా.