GHMC : పాత జీహెచ్‌ఎంసీ చట్టానికి స్వస్తి .. హైదరాబాద్‌‌లో కొత్త రూల్స్ ..!

Draft of ‘Core Urban Region Bill–2026’ released.

హైదరాబాద్ నగర అభివృద్ధిని భవిష్యత్ అవసరాలకు అనుగుణంగా తీర్చిదిద్దే లక్ష్యంతో తెలంగాణ ప్రభుత్వం కీలక నిర్ణయం తీసుకుంది. దశాబ్దాలుగా అమలులో ఉన్న పాత పట్టణ పాలన విధానాలకు బదులుగా ఆధునిక నగర అవసరాలకు సరిపోయే సమగ్ర చట్టాన్ని తీసుకురావడానికి ప్రభుత్వం ముందడుగు వేసింది. ఈ క్రమంలో ‘కోర్ అర్బన్ రీజియన్ (ఇంటిగ్రేటెడ్ గవర్నెన్స్) బిల్లు–2026’ ముసాయిదాను అధికారికంగా విడుదల చేసింది. నగర పరిపాలనలో పారదర్శకత, సమర్థత, ప్రజల భాగస్వామ్యాన్ని పెంచే దిశగా రూపొందించిన ఈ బిల్లుపై ప్రజల అభిప్రాయాలను ప్రభుత్వం ఆహ్వానిస్తోంది. ప్రస్తుతం అమలులో ఉన్న 1955 నాటి జీహెచ్‌ఎంసీ చట్టంలోని అనేక నిబంధనలు కాలానుగుణ మార్పులకు అనుగుణంగా లేకపోవడంతో వాటిని పూర్తిగా పునర్వ్యవస్థీకరించాలని ప్రభుత్వం నిర్ణయించింది. వేగంగా విస్తరిస్తున్న హైదరాబాద్‌ను ప్రపంచ స్థాయి మహానగరంగా తీర్చిదిద్దాలంటే ఆధునిక పట్టణ పాలన అవసరమనే అభిప్రాయంతో ఈ కొత్త చట్టాన్ని రూపొందిస్తున్నట్లు అధికారులు పేర్కొన్నారు.

కొత్త ముసాయిదా బిల్లులో సమగ్ర పట్టణ ప్రణాళిక, వేగవంతమైన పౌర సేవలు, సాంకేతిక ఆధారిత పరిపాలన, పర్యావరణ పరిరక్షణ, సుస్థిర అభివృద్ధి వంటి అంశాలకు ప్రత్యేక ప్రాధాన్యం కల్పించారు. ముఖ్యంగా నెట్ జీరో కార్బన్ ఉద్గారాల లక్ష్యాన్ని సాధించేలా పట్టణ నిర్వహణ విధానాలను బలోపేతం చేయడంపై దృష్టి సారించారు. అలాగే ప్రజారోగ్య రక్షణ, పారిశుధ్య వ్యవస్థ మెరుగుదల, మౌలిక సదుపాయాల విస్తరణ, ట్రాఫిక్ నిర్వహణ వంటి కీలక అంశాలను కూడా బిల్లులో పొందుపరిచినట్లు సమాచారం. వ్యాపార అనుకూల వాతావరణాన్ని మరింత మెరుగుపరచడం, పెట్టుబడులను ఆకర్షించడం, అనుమతుల ప్రక్రియను సులభతరం చేయడం ద్వారా ‘ఈజ్ ఆఫ్ డూయింగ్ బిజినెస్’కు ఊతమివ్వడమూ ఈ బిల్లులో ప్రధాన లక్ష్యంగా ప్రభుత్వం పేర్కొంది. నగర అభివృద్ధి, పౌర సేవల నాణ్యత, పరిపాలనా సామర్థ్యాన్ని ఒకే వేదికపైకి తీసుకురావాలనే ఉద్దేశంతో ఈ చట్టాన్ని రూపొందిస్తున్నట్లు వెల్లడించింది.

ఈ బిల్లుపై నగర ప్రజలు, పట్టణాభివృద్ధి నిపుణులు, రెసిడెంట్ వెల్ఫేర్ అసోసియేషన్లు, పౌరసమాజ సంస్థలు, స్వచ్ఛంద సంస్థలు తమ అభిప్రాయాలు, సూచనలు అందించాలని ప్రభుత్వం కోరింది. ప్రజల భాగస్వామ్యంతో మరింత సమర్థవంతమైన చట్టాన్ని రూపొందించాలనే లక్ష్యంతో జూలై 24, 2026లోగా ఆన్‌లైన్ లేదా మున్సిపల్ శాఖకు లిఖితపూర్వకంగా సూచనలు పంపే అవకాశం కల్పించింది. హైదరాబాద్ భవిష్యత్ పట్టణ పరిపాలనకు ఈ బిల్లు కీలక మలుపు కానుందని, ప్రజల అవసరాలకు అనుగుణంగా ఆధునిక, పారదర్శక, సుస్థిర పాలనకు ఇది బాటలు వేస్తుందని ప్రభుత్వం ఆశాభావం వ్యక్తం చేసింది. కొత్త చట్టం అమల్లోకి వస్తే నగర పాలనలో సమన్వయం పెరగడంతో పాటు పౌర సేవల నాణ్యత మరింత మెరుగుపడే అవకాశాలు ఉన్నాయని పట్టణాభివృద్ధి వర్గాలు అభిప్రాయపడుతున్నాయి.

Follow us