Bihar Elections: బీహార్ ఎన్నికలు 2025.. తొలి దశలో 467 నామినేషన్లు రద్దు!
ఎన్నికల సంఘం నిబంధనల ప్రకారమే కొన్ని నామినేషన్లను రద్దు చేసినట్లు తెలిపింది. రద్దు చేయబడిన నామినేషన్లలో లోపాలు ఉండటం వల్లే ఈ నిర్ణయం తీసుకున్నామని, ఇది పారదర్శకతను నిర్ధారించడానికి కూడా సహాయపడుతుందని ఈసీ పేర్కొంది.
- By Gopichand Published Date - 04:08 PM, Wed - 22 October 25
Bihar Elections: బీహార్ శాసనసభ ఎన్నికలు (Bihar Elections) 2025 రణరంగంలో నామినేషన్ పత్రాల పరిశీలన రాజకీయ పార్టీలను కుదిపేసింది. తొలి దశలోని 121 స్థానాలకు సంబంధించి మొత్తం 467 నామినేషన్లు రద్దు కాగా రెండో దశ పరిశీలనలో కూడా డజన్ల కొద్దీ అభ్యర్థులు పోటీ నుంచి తప్పుకోవాల్సి వచ్చింది.
నామినేషన్లు ఎందుకు రద్దయ్యాయి?
ఎన్నికల సంఘం (ఈసీ) ప్రకారం.. వివిధ రాజకీయ పార్టీల సభ్యులు దాఖలు చేసిన దరఖాస్తులలో లోపాల కారణంగా నామినేషన్లు రద్దు చేయబడ్డాయి. కొందరు అభ్యర్థులు అఫిడవిట్‌ను అసంపూర్తిగా దాఖలు చేశారు. మరికొందరికి తగినంత మంది ప్రపోజర్లు లేరు. ఇంకొందరి ఓటరు జాబితాలో రెండు చోట్ల ఎంట్రీలు ఉన్నాయి. మొదటి దశ నామినేషన్ పత్రాలు ఉపసంహరించుకోవడానికి చివరి తేదీ అక్టోబర్ 20, 2025 కాగా.. నవంబర్ 6న తొలి దశ పోలింగ్ జరగనుంది.
మహాకూటమికి మరో షాక్!
కైమూర్ జిల్లాలో మహాకూటమికి మరో ఎదురుదెబ్బ తగిలింది. మోహనియా స్థానం నుంచి ఆర్జేడీ అభ్యర్థి శ్వేతా సుమన్ నామినేషన్‌ను ఎన్నికల సంఘం రద్దు చేసింది. నామినేషన్ రద్దు కావడంతో ఉత్తరప్రదేశ్‌లోని చందౌలీ జిల్లాకు చెందిన శ్వేతా సుమన్ కన్నీళ్లు పెట్టుకుంది.
మహాకూటమి, ఎన్డీఏకు సవాలుగా నామినేషన్ల రద్దు
రాజకీయ విశ్లేషకుల అభిప్రాయం ప్రకారం.. పలువురు కీలక అభ్యర్థుల నామినేషన్లు తిరస్కరణకు గురికావడం వల్ల సీట్ల సర్దుబాటుపై ప్రభావం పడే అవకాశం ఉండటంతో నామినేషన్ల రద్దు మహాకూటమికి, ఎన్డీఏకు ఇద్దరికీ సవాలుగా మారింది. ఆర్జేడీ అభ్యర్థి శ్వేతా సుమన్ తన ప్రచారాన్ని కూడా ప్రారంభించినప్పటికీ ఆమె నామినేషన్ రద్దయింది. ఆమె నివాస ధృవీకరణ పత్రం, కుల ధృవీకరణ పత్రంకు సంబంధించిన పూర్తి వివరాలు సమర్పించలేదని తెలుస్తోంది.
Also Read: Sanju Samson: ఆర్సీబీలోకి సంజు శాంస‌న్‌.. ఇదిగో ఫొటో!
సాంకేతిక కారణాలతో భోజ్‌పురి నటి నామినేషన్ రద్దు
మొదటి దశలో సారన్ జిల్లాలోని మఢౌరా అసెంబ్లీ స్థానంలో ఎన్డీఏ కూటమికి కూడా తొలి షాక్ తగిలింది. ఇక్కడ లోక్ జనశక్తి పార్టీ (రామ్‌విలాస్) అభ్యర్థి, భోజ్‌పురి నటి సీమా సింగ్ నామినేషన్‌ను సాంకేతిక కారణాల వల్ల రద్దు చేశారు. అదేవిధంగా తూర్పు చంపారన్ జిల్లాలోని మధుబన్ స్థానంలో ముగ్గురు స్వతంత్ర, చిన్న పార్టీల అభ్యర్థులు (రణధీర్ కుమార్, అభిషేక్ కుమార్, లక్ష్మణ్ సాహ్) నామినేషన్లు కూడా పత్రాలు పూర్తి చేయనందున రద్దు చేయబడ్డాయి.
డబుల్ ఎంట్రీలు, ప్రపోజర్ల వివరాలు లేకపోవడం
సుగౌలీ అసెంబ్లీ నియోజకవర్గం నుంచి మహాకూటమికి చెందిన వికాస్‌శీల్ ఇన్సాన్ పార్టీ (వీఐపీ) అభ్యర్థి శశి భూషణ్ సింగ్ నామినేషన్‌ను కూడా ఎన్నికల సంఘం రద్దు చేసింది. ఆయన తమ ప్రతిపాదకుల (ప్రపోజర్స్) వివరాలను సమర్పించలేదని ఈసీ తెలిపింది. కాగా ప్రస్తుతం జెహానాబాద్‌లో మహాకూటమి అభ్యర్థి రాహుల్ శర్మ ఓటరు జాబితాను పరిశీలిస్తున్నారు. ఆయనపై రెండు చోట్ల ఓటరు జాబితాలో పేరు ఉన్నట్లు ఆరోపణలు ఉన్నాయి.
నియమాల ప్రకారమే రద్దు చేశామన్న ఈసీ
ఎన్నికల సంఘం నిబంధనల ప్రకారమే కొన్ని నామినేషన్లను రద్దు చేసినట్లు తెలిపింది. రద్దు చేయబడిన నామినేషన్లలో లోపాలు ఉండటం వల్లే ఈ నిర్ణయం తీసుకున్నామని, ఇది పారదర్శకతను నిర్ధారించడానికి కూడా సహాయపడుతుందని ఈసీ పేర్కొంది. అయితే ఈ పరిణామం రాజకీయ వర్గాల్లో కలకలం సృష్టించింది. ఎన్డీఏ దీనిని ‘నియమాల విజయం’ అని పేర్కొనగా.. మహాకూటమి దీనిని ‘ఒత్తిడి రాజకీయాలు’గా అభివర్ణించింది.
