Ramadan 2026 : ఎల్లుండి రంజాన్.. రేపు సెలవు లేదు

ఆంధ్రప్రదేశ్ రాష్ట్రంలో రంజాన్ (ఈద్-ఉల్-ఫితర్) పండుగ తేదీ మారడంతో ప్రభుత్వం సెలవు దినాల్లో స్వల్ప మార్పులు చేసింది. తొలుత మార్చి 20న సెలవు ఉంటుందని భావించినప్పటికీ, నెలవంక దర్శనం ఆధారంగా మతపెద్దలు మార్చి 21న (శనివారం) పండుగ జరుపుకోవాలని సూచించారు. దీంతో ప్రభుత్వం రేపు అంటే మార్చి 20వ తేదీని (శుక్రవారం) సాధారణ పని దినంగా ప్రకటించింది. అన్ని ప్రభుత్వ కార్యాలయాలు, విద్యా సంస్థలు యథావిధిగా పనిచేస్తాయని స్పష్టం చేస్తూ, శనివారం నాటిని పబ్లిక్ హాలిడేగా మారుస్తూ ఉత్తర్వులు జారీ చేసింది.

ఈ హఠాత్తు మార్పుతో ప్రభుత్వ ఉద్యోగులు, విద్యార్థుల్లో కొంత గందరగోళం నెలకొన్నప్పటికీ, పండుగ ప్రాముఖ్యతను బట్టి ప్రభుత్వం ఈ నిర్ణయం తీసుకుంది. అయితే, ప్రస్తుతం రాష్ట్రవ్యాప్తంగా జరుగుతున్న పదో తరగతి (SSC) పరీక్షలపై ఈ సెలవు ప్రభావం ఏ మేరకు ఉంటుందనేది ఆసక్తికరంగా మారింది. షెడ్యూల్ ప్రకారం మార్చి 21న ఇంగ్లిష్ పేపర్ పరీక్ష జరగాల్సి ఉంది. పండుగ రోజున పరీక్ష నిర్వహించడంపై ముస్లిం మైనారిటీ విద్యార్థులు, వారి తల్లిదండ్రుల నుంచి అభ్యర్థనలు వస్తుండటంతో, ప్రభుత్వం ఈ పరీక్షను వాయిదా వేస్తుందా లేక యథావిధిగా నిర్వహిస్తుందా అనే అంశంపై ఇంకా అధికారిక క్లారిటీ రావాల్సి ఉంది.

రంజాన్ పండుగ ముస్లిం సోదరులకు అత్యంత పవిత్రమైనది. నెల రోజుల పాటు కఠిన ఉపవాస దీక్షలు ముగించుకుని ఈద్ జరుపుకుంటున్న తరుణంలో, ప్రభుత్వం ఇస్తున్న ఈ సెలవు వారికి వెసులుబాటు కల్పించనుంది. విద్యాశాఖ అధికారులు మాత్రం పరీక్షల నిర్వహణపై ఉన్నతాధికారులతో చర్చిస్తున్నట్లు సమాచారం. ఒకవేళ పరీక్ష వాయిదా పడితే, దానిని ఏ తేదీన నిర్వహిస్తారో త్వరలోనే ప్రకటించే అవకాశం ఉంది. అప్పటి వరకు విద్యార్థులు అధికారిక ప్రకటన కోసం వేచి చూడక తప్పదు.

Follow us