Ugadi Panchangam 2026 : ఉగాది రాజకీయ పంచాంగం .. ఏ పార్టీ జాతకం ఎలా ఉంది?

తెలంగాణ రాజకీయ ముఖచిత్రంలో 2026 ఉగాది పంచాంగ శ్రవణం అత్యంత ప్రాధాన్యత సంతరించుకుంది. గాంధీ భవన్‌, తెలంగాణ భవన్‌, మరియు బీజేపీ రాష్ట్ర కార్యాలయాల్లో పండితులు ఆయా పార్టీల జాతకాలను విశ్లేషించారు. అధికార కాంగ్రెస్ పార్టీ విషయానికి వస్తే, ముఖ్యమంత్రి రేవంత్ రెడ్డి పాలనకు ఈ ఏడాది ఎటువంటి ఢోకా లేదని, ప్రభుత్వానికి ప్రజల్లో మంచి పేరు వస్తుందని పండితులు జోస్యం చెప్పారు. గ్రహగతులు అనుకూలంగా ఉండటంతో పాలనాపరమైన చిక్కులు తొలగిపోతాయని, పార్టీలో సమన్వయం పెరుగుతుందని గాంధీ భవన్‌ వేదికగా వినిపించిన పంచాంగం పార్టీ శ్రేణుల్లో ఉత్సాహాన్ని నింపింది.

మరోవైపు, ప్రధాన ప్రతిపక్షం బీఆర్ఎస్ (BRS) కార్యాలయంలో జరిగిన పంచాంగ శ్రవణంలో పండితులు విభిన్నమైన విశ్లేషణలు చేశారు. ప్రస్తుత ప్రభుత్వ తీరుపై ప్రజల్లో నెమ్మదిగా అసంతృప్తి పెరుగుతుందని, అది విపక్షానికి రాజకీయ బలంగా మారుతుందని వివరించారు. ముఖ్యంగా పార్టీ కీలక నేత కవితకు రాబోయే రోజుల్లో ప్రజా మద్దతు గణనీయంగా పెరుగుతుందని, గ్రహస్థితి ఆమెకు అనుకూలంగా మారుతోందని పండితులు పేర్కొన్నారు. కేడర్‌లో ధైర్యాన్ని నింపేలా, పార్టీ పునర్వైభవం దిశగా అడుగులు పడతాయని తెలంగాణ భవన్‌లో జరిగిన శ్రవణం స్పష్టం చేసింది.

ఇక భారతీయ జనతా పార్టీ (BJP) విషయానికి వస్తే, జాతీయ మరియు రాష్ట్ర స్థాయిలో ఈ ఏడాది కూడా తమ హవా కొనసాగుతుందని పండితులు ధీమా వ్యక్తం చేశారు. దేశవ్యాప్తంగా పార్టీకి తిరుగులేని ఆదరణ లభిస్తుందని, రాష్ట్రంలో కూడా పార్టీ బలోపేతం కావడానికి గ్రహబలం తోడవుతుందని వివరించారు. మొత్తానికి, ప్రతి పార్టీ కార్యాలయంలోనూ పండితులు ఆయా పార్టీలకే విజయావకాశాలు ఉన్నాయని చెప్పడం గమనార్హం. జనం నాడి ఎలా ఉన్నా, పంచాంగం మాత్రం అన్ని పార్టీలకూ “శుభం” పలకడం విశేషం. ఈ అంచనాలు క్షేత్రస్థాయిలో ఎంతవరకు నిజమవుతాయో చూడాలి.

Follow us