Kidney Stones: కిడ్నీలో రాళ్లను గుర్తించడమెలా? అయితే ఈ జాగ్రత్తలు పాటించండి..

Kidney Stones Symptoms

Kidney Stones  కిడ్నీలో రాళ్ల సమస్య నేడు చిన్నా పెద్దా తేడా లేకుండా ప్రతి ఒక్కరినీ వేధిస్తోంది. ఆహారపు అలవాట్లు, నీరు తక్కువగా తాగడం వల్ల ఈ సమస్య తీవ్రమవుతోంది. అయితే దీనిని ప్రారంభ దశలోనే గుర్తించడం ఎలా? భరించలేని నొప్పితో పాటు శరీరం ఇచ్చే ఇతర హెచ్చరిక సంకేతాలు ఏంటి? ఈ విషయాలపై డాక్టర్ విష్ణుభోట్ల శశాంక, సీనియర్ కన్సల్టెంట్ యూరాలజీ, సిటిజన్స్ స్పెషాలిటీ హాస్పిటల్ పూర్తి వివరాలు అందించారు.

నేటి ఆధునిక జీవనశైలిలో ఆహారపు అలవాట్లు మన ఆరోగ్యంపై తీవ్ర ప్రభావం చూపుతున్నాయి. ముఖ్యంగా తక్కువగా నీరు తాగడం, అధికంగా ఉప్పు ఉన్న పదార్థాలు తీసుకోవడం వల్ల కిడ్నీ సంబంధిత సమస్యలు విపరీతంగా పెరుగుతున్నాయి. వీటిలో కిడ్నీలో రాళ్ల సమస్య అత్యంత ప్రధానమైనది. అయితే ఈ సమస్య తీవ్రం కాకముందే మన శరీరం కొన్ని హెచ్చరిక సంకేతాలను ఇస్తుంది.

డాక్టర్ ఏం చెప్పారు?

కిడ్నీలో రాళ్లు సాధారణంగా 30 నుంచి 50 ఏళ్ల మధ్య వయసు ఉన్నవారిలో ఎక్కువగా కనిపిస్తాయి. అయితే, మారుతున్న జీవనశైలి వల్ల ప్రస్తుతం యువతలో కూడా ఈ సమస్య పెరుగుతుంది. గతంలో పురుషుల్లో ఇవి ఎక్కువగా కనిపించేవి. కానీ ఇటీవల కాలంలో మహిళల్లో కూడా ఈ సమస్య పెరగడం వల్ల ఆ వ్యత్యాసం తగ్గుతుంది. పిల్లల్లో ఇవి తక్కువగా ఉన్నప్పటికీ.. జన్యుపరమైన కారణాలు, జీవక్రియ లోపాలు, డీహైడ్రేషన్ అంటే నీరు తక్కువ తాగడం వల్ల వచ్చే అవకాశం ఉంది.

నడుము నొప్పి అంటే సాధారణం కాదు

కిడ్నీలో రాళ్లు ఉన్నప్పుడు కనిపించే అత్యంత సాధారణ లక్షణం నొప్పి. అయితే ఇది సాధారణ కండరాల నొప్పిలా ఉండదు. నడుముకు ఒక పక్కన లేదా వెనుక భాగంలో ఆకస్మికంగా తీవ్రమైన నొప్పి మొదలవుతుంది. ఈ నొప్పి క్రమంగా పొత్తికడుపు కింది భాగానికి, గజ్జల వైపు పాకుతున్నట్లు అనిపిస్తుంది. కొందరిలో ఈ నొప్పి తరచుగా వచ్చి పోతుంటుంది, మరికొందరిలో నిరంతరం వేధిస్తుంది.

నడుము పక్కన, వెనుక భాగంలో వచ్చే ఇటువంటి విభిన్నమైన నొప్పిని కిడ్నీ సమస్యగా అనుమానించాలని డాక్టర్ తెలిపారు. నొప్పి తీవ్రత రాళ్ల పరిమాణంపై కాకుండా, అవి కిడ్నీలో ఎక్కడ ఉన్నాయి, కదులుతున్నాయా అనే దానిపై ఆధారపడి ఉంటుంది.

మూత్ర విసర్జనలో కనిపించే మార్పులు

కిడ్నీల ప్రధాన విధి రక్తాన్ని వడపోసి వ్యర్థాలను మూత్రం ద్వారా పంపడం. రాళ్లు మూత్రనాళంలో కదులుతున్నప్పుడు లేదా అడ్డుపడినప్పుడు అనేక ఇబ్బందులు ఎదురవుతాయి.

• మంట, నొప్పి: మూత్ర విసర్జన చేసే సమయంలో తీవ్రమైన మంట లేదా నొప్పి కలగడం కిడ్నీ రాళ్లకు బలమైన సంకేతం.
• రక్తం పడటం: మూత్రం ఎరుపు, పింక్ లేదా గోధుమ రంగులో వస్తుంటే లోపల గాయాలు అవుతున్నాయని అర్థం. మూత్రంలో రక్తం కనిపిస్తే ఏమాత్రం ఆలస్యం చేయకుండా వైద్యులను సంప్రదించాలి.
• దుర్వాసన, చిక్కదనం: మూత్రం సాధారణం కంటే చిక్కగా, క్లౌడీగా కనిపిస్తూ, తీవ్రమైన దుర్వాసన వస్తుంటే అది లోపల పేరుకుపోయిన ఇన్ఫెక్షన్‌ను సూచిస్తుంది.
• చుక్క చుక్కగా రావడం: మూత్రానికి వెళ్లాలని అనిపించినా, వెళ్లినప్పుడు మాత్రం కొద్దికొద్దిగా చుక్కల రూపంలో మాత్రమే రావడం రాళ్లు అడ్డుపడుతున్నాయనడానికి గుర్తు.

జీర్ణ వ్యవస్థలో అసౌకర్యం

కిడ్నీ సమస్యలకు, జీర్ణ వ్యవస్థకు నాడీ సంబంధిత కనెక్షన్ ఉంటుంది. కిడ్నీలో రాళ్లు ఉన్నప్పుడు చాలామందిలో వికారం, వాంతులు చేసుకునే భావన కలుగుతుంది. దీనివల్ల ఆకలి తగ్గిపోతుంది. పొట్ట ఉబ్బరంగా అనిపించడం, మలబద్ధకం వంటి సమస్యలు కూడా తలెత్తుతాయి. ఈ లక్షణాలను సాధారణ గ్యాస్ట్రిక్ సమస్యగా భావించి పొరపడే అవకాశం ఉంటుంది. కాబట్టి వీటిని నిర్లక్ష్యం చేయకూడదు. ఆకస్మికంగా బరువు తగ్గడం కూడా కిడ్నీ ఆరోగ్యం దెబ్బతింటున్నట్లు సూచించే సంకేతం.

ఇతర సంకేతాలు

శరీరంలో ఇన్ఫెక్షన్ స్థాయి పెరిగినప్పుడు జ్వరం, వణుకు రావచ్చు. కిడ్నీలో రాళ్ల వల్ల మూత్రనాళ ఇన్ఫెక్షన్ తలెత్తినప్పుడు అధిక ఉష్ణోగ్రతతో కూడిన జ్వరం కనిపిస్తుంది. దీనితో పాటు పొత్తికడుపులో అల్లాడిపోయే నొప్పి వస్తుంది. చాలామంది కిడ్నీ నొప్పిని సాధారణ నడుము నొప్పిగా భావించి పెయిన్ కిల్లర్స్ వాడుతుంటారు. అది కిడ్నీల పనితీరును మరింత దెబ్బతీస్తుందని వైద్యులు హెచ్చరిస్తున్నారు.

నివారణ మార్గాలు

వైద్య నిపుణుల సూచనల ప్రకారం కిడ్నీలో రాళ్లు రాకుండా ఇలా జాగ్రత్త పడవచ్చు.

1. నీరు ఎక్కువగా తాగడం: రోజుకు కనీసం 2.5 నుంచి 3 లీటర్ల నీరు తాగడం వల్ల మూత్రం పలుచబడి రాళ్లు ఏర్పడకుండా ఉంటాయి.
2. ఆహార మార్పులు

• ఉప్పు మరియు ప్రాసెస్ చేసిన ఆహారాన్ని తగ్గించాలి.
• నిమ్మ, నారింజ వంటి సిట్రస్ జాతి పండ్లను తీసుకోవాలి.
• పాలకూర, నట్స్ వంటి ‘ఆక్సలేట్’ ఎక్కువగా ఉండే పదార్థాల్ని పరిమితం చేయాలి.
• శారీరక శ్రమ: బరువు అదుపులో ఉంచుకోవడం, క్రమం తప్పకుండా వ్యాయామం చేయడం అవసరం.
• చివరగా: పైన పేర్కొన్న లక్షణాలు ఏవైనా కనిపిస్తే వెంటనే డాక్టర్‌ను సంప్రదించడం మంచిది. త్వరగా గుర్తించడం వల్ల భవిష్యత్తులో వచ్చే సమస్యలను అరికట్టవచ్చు.

Follow us