ఊపిరితిత్తుల ఇన్‌ఫెక్షన్ నిమోనియా.. సంకేతాలివే!?

Pneumonia

Pneumonia: నిమోనియా అనేది ఊపిరితిత్తులకు వచ్చే ఒక తీవ్రమైన ఇన్‌ఫెక్షన్. ఇందులో ఊపిరితిత్తుల్లోని గాలి గదులలో నీరు, మ్యూకస్ లేదా చీము చేరుతుంది. ఇది ‘లోయర్ రెస్పిరేటరీ ట్రాక్ట్ ఇన్‌ఫెక్షన్’ కిందకు వస్తుంది. సాధారణంగా జలుబు చేసినప్పుడు ఆ ఇన్‌ఫెక్షన్ ముక్కు నుండి గొంతుకు, అక్కడి నుండి ఊపిరితిత్తులకు చేరడం వల్ల శ్వాసనాళాల్లో వాపు వస్తుంది. దీనివల్ల శ్వాస తీసుకోవడం కష్టమవుతుంది. నిమోనియాకు సంబంధించి హెచ్చరిక సంకేతాలు, లక్షణాలు, చికిత్స వివరాలు కింద తెలుసుకుందాం.

నిమోనియా హెచ్చరిక సంకేతాలు

ఛాతీ నొప్పి: నిమోనియా ప్రధాన సంకేతం ఛాతీ నొప్పి. దగ్గినప్పుడు, తుమ్మినప్పుడు లేదా గట్టిగా శ్వాస తీసుకున్నప్పుడు ఈ నొప్పి మరింత పెరుగుతుంది.

కఫం లేదా రక్తంతో కూడిన దగ్గు: ఊపిరితిత్తుల్లోని గాలి గదులు చీము లేదా ద్రవంతో నిండటం వల్ల దగ్గు వచ్చినప్పుడు కఫం పడుతుంది. కొన్నిసార్లు దగ్గులో రక్తం కూడా పడవచ్చు.

జ్వరం, వణుకు: ఇన్‌ఫెక్షన్ వల్ల శరీరంలో ఆక్సిజన్ స్థాయిలు మారి రక్తపోటుపై ప్రభావం చూపుతాయి. దీనివల్ల తీవ్రమైన జ్వరం, చలి (వణుకు) వస్తాయి. దీనితో పాటు అలసట, కళ్లు తిరగడం వంటివి కనిపిస్తాయి.

ఆకలి లేకపోవడం: సాధారణ జలుబులా కాకుండా నిమోనియా వచ్చినప్పుడు ఆకలి పూర్తిగా తగ్గిపోతుంది. ఇన్‌ఫెక్షన్‌తో శరీరం పోరాడుతున్నప్పుడు వాంతులు లేదా విరేచనాలు కూడా అయ్యే అవకాశం ఉంది.

Also Read: మీరు ఆధార్ కార్డును ఆన్‌లైన్‌లో స్వయంగా అప్డేట్ చేసుకోండిలా!

నిమోనియా లక్షణాలు

• కీటాణుల రకం, రోగి వయస్సు, వారి ఆరోగ్య స్థితిని బట్టి లక్షణాలు మారుతుంటాయి.
• శరీరం మొత్తం అలసటగా అనిపించడం.
• వృద్ధులలో శరీర ఉష్ణోగ్రత సాధారణం కంటే తగ్గిపోవడం.
• శ్వాస తీసుకోవడంలో ఇబ్బంది (శ్వాస ఆడకపోవడం).
• ఛాతీలో అసౌకర్యంగా ఉండటం.

కారణాలు

ముఖ్యంగా బ్యాక్టీరియా, వైరస్‌లు నిమోనియాకు కారణమవుతాయి. సాధారణంగా మన శరీరం ఈ కీటాణులతో పోరాడగలదు. కానీ రోగనిరోధక శక్తి తక్కువగా ఉన్నప్పుడు లేదా కీటాణుల సంఖ్య ఎక్కువగా ఉన్నప్పుడు అవి ఊపిరితిత్తులపై దాడి చేస్తాయి.

చికిత్స- జాగ్రత్తలు

మందులు: నిమోనియా చికిత్సలో భాగంగా వైద్యులు యాంటీబయాటిక్స్ సూచిస్తారు. దగ్గు, జ్వరం తగ్గడానికి ప్రత్యేక మందులు ఇస్తారు.

ఆసుపత్రిలో చేరడం: రోగి వయస్సు 65 ఏళ్ల కంటే ఎక్కువగా ఉన్నా.

కిడ్నీ సమస్యలు లేదా ఇతర కాంప్లికేషన్స్ ఉన్నా.

శ్వాస తీసుకోవడం చాలా కష్టంగా ఉన్నా.

శరీర ఉష్ణోగ్రత బాగా పడిపోయినా ఆసుపత్రిలో చేరడం తప్పనిసరి.

గమనిక: పైన పేర్కొన్న లక్షణాలు కనిపిస్తే వెంటనే వైద్యుడిని సంప్రదించడం శ్రేయస్కరం. నిర్లక్ష్యం చేస్తే ఇది ప్రాణాపాయానికి దారితీయవచ్చు.

Follow us