AP News : శ్రీవారి దర్శనం కోసం వెళుతుండగా.. అనుకోని ఘటన..

AP News : తిరుమల శ్రీవారి దర్శనం కోసం బయల్దేరిన భక్తుల యాత్ర విషాదంలో ముగిసింది. ఊహించని రోడ్డు ప్రమాదం ఒకే కుటుంబం ముగ్గురి ప్రాణాలను కబళించగా, మరో ఏడుగురికి తీవ్ర గాయాలు అయ్యాయి. ఈ దుర్ఘటన శనివారం తెల్లవారుజామున ప్రకాశం జిల్లాలోని ఉలవపాడు మండలం చాగోల్లు సమీపంలో చోటుచేసుకుంది. పల్నాడు జిల్లా మాచవరం మండలం కొత్త గణేషునిపాడు గ్రామానికి చెందిన ఓ కుటుంబం, తమ బంధువులతో కలిసి తిరుమల శ్రీ వెంకటేశ్వర స్వామివారి దర్శనానికి తుఫాన్ వాహనంలో బయల్దేరారు. ఉదయం ప్రయాణం కొనసాగుతుండగా, చాగోల్లు వద్ద ఎదురుగా వచ్చిన లారీ ఆ తుఫాన్ వాహనాన్ని ఢీకొట్టింది. ఢీకొన్న శబ్దం, ప్రభావం అంత తీవ్రంగా ఉండటంతో వాహనం పూర్తిగా దెబ్బతింది.

Jharkhand : ప‌ట్టాలు త‌ప్పిన గూడ్స్ రైలు.. వందే భార‌త్ స‌హా ప‌లు రైళ్లు ర‌ద్దు..!

ఈ ప్రమాదంలో నంబుల వెంకట నరసమ్మ (55), నంబుల సుభాషిణి (30), అభిరామ్ (3) అక్కడికక్కడే మృతిచెందారు. మిగిలిన వారిలో ఏడుగురికి తీవ్ర గాయాలు కాగా, అందులో ఇద్దరి పరిస్థితి విషమంగా ఉన్నట్లు వైద్యులు తెలిపారు. స్థానికులు ప్రమాదాన్ని గమనించి వెంటనే పోలీసులకు సమాచారం అందించారు. ఉలవపాడు పోలీసులు ఘటనా స్థలానికి చేరుకొని, సహాయక చర్యలు చేపట్టి గాయపడిన వారిని సమీపంలోని కావలి ఏరియా ఆసుపత్రికి తరలించారు. అనంతరం మెరుగైన వైద్యం కోసం కొంతమందిని నెల్లూరుకు రవాణా చేశారు.

ప్రమాద సమయంలో తుఫాన్ వాహనంలో డ్రైవర్ సహా 12 మంది ప్రయాణికులు ఉన్నారని పోలీసులు తెలిపారు. లారీ ఏకంగా ఎదురుగా వచ్చి ఢీకొట్టిందా? లేక డ్రైవర్ నియంత్రణ కోల్పోయాడా? అనే కోణంలో పోలీసులు దర్యాప్తు చేస్తున్నారు. తమ ఆరాధ్య దేవుడిని దర్శించుకోవడానికి సంతోషంగా బయల్దేరిన కుటుంబం ఇలా రహదారిపైనే దుర్ఘటనకు గురవడం గ్రామంలో తీవ్ర విషాదాన్ని మిగిల్చింది. మృతుల ఇళ్ల వద్ద ఆర్తనాదాలు మార్మోగుతున్నాయి. గ్రామస్తులు, బంధువులు కంటతడి పెట్టి సంతాపం వ్యక్తం చేస్తున్నారు. ఈ ప్రమాదంపై పోలీసులు కేసు నమోదు చేసి, లారీ డ్రైవర్‌ను గుర్తించేందుకు చర్యలు ప్రారంభించారు.

Phone Tapping Case : KCR కుటుంబ సభ్యులు దుర్మార్గులు – బండి సంజయ్ .