Egg Price Hike: కొండెక్కిన గుడ్డు.. రికార్డు స్థాయికి కోడిగుడ్డు ధరలు

Egg prices skyrocket... hitting record levels.

హైదరాబాద్ నగరంలో సామాన్యుడికి అత్యంత చౌకైన ప్రొటీన్ ఆహారంగా నిలిచే కోడిగుడ్డు ధరలు ఒక్కసారిగా కొండెక్కాయి. మార్కెట్లో డిమాండ్, సప్లై మధ్య తీవ్ర వ్యత్యాసం ఏర్పడటంతో రిటైల్ మార్కెట్లో ఒక్కో కోడిగుడ్డు ధర రికార్డు స్థాయిలో రూ. 8 నుండి రూ. 9 కి చేరింది. సాధారణంగా శీతాకాలంలో మాత్రమే పెరిగే  గుడ్డు ధరలు, ఈ విధంగా వర్షాకాలంలోనే భారీగా పెరగడం పట్ల వినియోగదారులు మరియు వ్యాపార వర్గాలు తీవ్ర ఆందోళన వ్యక్తం చేస్తున్నాయి. కోడిగుడ్డు ధరలు ఈ రేంజ్ లో పెరగడానికి పౌల్ట్రీ రంగంలో ఉత్పత్తి వ్యయం విపరీతంగా పెరిగిపోవడమే ప్రధాన కారణమని హైదరాబాద్‌కు చెందిన పౌల్ట్రీ రైతులు చెబుతున్నారు. కోళ్లకు పెట్టే ప్రధాన దాణా అయిన సోయాబీన్ ధర గత కొన్ని నెలల్లో కేజీ రూ. 35 నుండి ఏకంగా రూ. 68 కి పెరగ్గా, మొక్కజొన్న ధర కూడా క్వింటాళ్ల వారీగా రూ. 20 నుండి రూ. 28 కి పెరిగింది. ఒక అంచనా ప్రకారం లక్ష కోళ్లు ఉన్న ఫారానికి దాణా ఖర్చుల కోసమే రోజుకు అదనంగా లక్ష రూపాయల వరకు భారం పడుతోంది. దీనికి తోడు వేసవి తీవ్రత వల్ల వేలాది కోళ్లు మృత్యువాత పడటం, రవాణా ఖర్చులు (డీజిల్ ధరలు) పెరగడం వల్ల మార్కెట్లోకి గుడ్ల సరఫరా (Supply Crunch) గణనీయంగా తగ్గి ధరల పెరుగుదలకు దారితీసింది.

గుడ్డు ధరల పెరుగుదల ప్రభావం మాంసం మార్కెట్‌పై కూడా స్పష్టంగా కనిపిస్తోంది. హైదరాబాద్ మార్కెట్లో ప్రస్తుతం కిలో లైవ్ చికెన్ ధర రూ. 290 నుండి స్కిన్‌లెస్ చికెన్ ధర రూ. 320 వరకు పలుకుతోంది. పౌల్ట్రీ ఫారాలలో ఉత్పత్తి 20 శాతం మేర పడిపోవడంతో ఈ ధరల పెరుగుదల తప్పలేదని హోల్‌సేల్ వ్యాపారులు చెబుతున్నారు. మధ్యతరగతి, పేద కుటుంబాలు ప్రొటీన్ కోసం ఎక్కువగా ఆధారపడే గుడ్లు, చికెన్ ధరలు ఇలా సామాన్యుడికి అందనంత ఎత్తుకు చేరడంతో నెలవారీ ఇంటి బడ్జెట్‌పై తీవ్ర ప్రభావం పడుతోంది. రాబోయే రోజుల్లో దాణా ధరలు స్థిరపడి, ఉత్పత్తి పెరిగితే తప్ప ధరలు తగ్గే అవకాశం లేదని మార్కెట్ విశ్లేషకులు భావిస్తున్నారు.

Follow us